Unicode
အခန်း ( ၃၉ )ကျီဇယ်ဟွေ့သည် ကျယ်ယန်ကို သူတို့နယ်ပယ်က လူတွေဖွင့်သော ကော်ဖီဆိုင်သို့ ခေါ်သွား၏။ ဆိုင်တည်နေရာက လမ်းနှင့် နည်းနည်း အလှမ်းဝေးကာ မျက်နှာစာမှာလည်း ကျဥ်းကျဥ်းလေးပင်။ အပြင်ကကြည့်လျှင် အထင်ကြီးစရာ တစ်ကွက်မှ မရှိသော်ငြားလည်း အထဲဝင်သွားလျှင်တော့ လုံးဝကို ကွဲပြားခြားနားသွားသည်။
ကျီဇယ်ဟွေ့ အထဲဝင်သွားတာနှင့် မနေနိုင် မထိုင်နိုင် ဆိုလာသည်။
“ ငါသာမပါရင် မင်းလိုလူသစ်တစ်ယောက်က ဘယ်တော့မှ ဆိုင်ထဲဝင်နိုင်မှာမဟုတ်ဘူး။ ”ကျယ်ယန် ပြန်ဖြေသည်။ “ ဆရာကျီ ကျွန်တော့်ကို ဒီလိုမထိမဲ့မြင်ဆက်လုပ်နေမယ်ဆိုရင် မကြာခင် ဒီအသိုင်းအဝိုင်းမှာ ဆရာ့ရဲ့အဆင့်အတန်းဆုံးရှုံးပြီး ဒီနေရာကို ထပ်ဝင်ခွင့်မရတော့ဘူးလို့ ယုံထားလိုက်။ ”
ကျီဇယ့်ဟွေ့ ချောင်းဟန့်ကာ စကားရပ်၏။ ထိုအစား ရှောင်ကျင်းက ကျယ်ယန်ကို ကြိမ်ဖန်တလဲလဲ လှမ်းကြည့်လာသည်။
ကျီဇယ်ဟွေ့သည့် ကျယ်ယန့်ကို သုံးနေကျ အခန်းထဲသို့ ခေါ်လာ၏။ သူက စားပွဲထိုးကို ကော်ဖီနှင့် အချိုပွဲအမြောက်အများကို သာမန်ကာလျှံကာမှာ၍ အဓိကအချက်ကို ဖြတ်ပြောလိုက်၏။
“ မင်း ဘာလိုချင်တာလဲ။ ”“ အလျှင်မလိုပါဘူးဗျာ။ လုပ်ငန်းကိစ္စမပြောခင် လက်ရှိအခြေအနေကို ရှင်းကြတာပေါ့။ ” ကျယ်ယန်သည် မတ်မတ်ထိုင်ကာ စားပွဲခုံကို လက်ညှိုးထိုး၏။ “ စုံတွဲသီချင်းရဲ့ သဲလွန်စတွေအားလုံးကို ခင်ဗျားတို့ မဖျက်နိုင်ဘူး။ " တေးဂီတဧကရာဇ်က ဘယ်သူလဲ " အပိုင်းသစ်အတွက် ထုတ်လုပ်ရေးကိုလည်း စပြီးနေပြီ။ ကျီဇယ့်ဟွေ့အတွက် edit ပေးလို့ရတဲ့အပိုင်းတွေမှာလည်း ရည်ရွယ်ချက်ရှိရှိ တေးသွားကို ပြောင်းပစ််တယ်။ သီချင်းပြောင်းတယ်။ ပြောင်းခိုင်းတဲ့ သီချင်းကိုလည်း မသုံးပြန်ဘူး။ သီချင်းဆိုတာလည်း ဆိုးဆိုးရွားရွားနဲ့။ ဧည့်သည်ဒိုင်လူကြီးတွေ ဝေဖန်တာ ခံရသေးတယ်။ စင်ပေါ်မှာ မျက်နှာပျက်ရတယ်။ ဒါရိုက်တာကို ရိုက်ကူးရေးဖျက်ဖို့နဲ့ ဖျော်ဖြေရေးကို ပြန်ရိုက်ဖို့ အတင်းအကျပ် ဖိအားပေးပြန်တယ်။ ဒီမကောင်းသတင်းတွေ ထွက်လာတာနဲ့အမျှ ပြိုပျက်သွားသောပိုးအိမ်ရဲ့ ရောင်းအားအတွဲကလည်း ချက်ချင်းရပ်သွားမယ်လို့ ကျွန်တော်အတတ်ပြောရဲတယ်။ စီနီယာကျီလည်း ကျောထောနောက်ခံနည်းနည်းတော့ ဆုံးရှုံးသွားမှာပဲ။ ”