Unicode
အခန်း ( ၃၅ )
၄၅ မိနစ်လောက်နေတော့ ကျီဇယ့်ဟွေ့ လေ့ကျင့်ရေးအခန်းသို့ ရောက်လာ၏။ ကံမကောင်းအကြောင်းမလှစွာပဲ ဝန်ထမ်းတွေအတွက် ကော်ဖီတွေဝယ်လာပါသည့်တိုင် သူဝယ်လာတာတွေက ဝယ်ထားတာကြာသွားပြီဖြစ်၍ မပူတော့ပေ။ ဝန်ထမ်းတွေလက်ထဲမှာ ကိုင်ထားနှင့်ပြီးသော ကော်ဖီနှင့် နို့လက်ဖက်ရည်များကို ကျီဇယ့်ဟွေ့မြင်သွား၏။ သူ စိတ်ထဲကမပါဘဲ ရယ်မောလိုက်ချေ၏။ “ ရှောင်ကျယ်က သိပ်အကင်းပါးတာပဲ။ ”
ကျယ်ယန် အပြုံးလေးဖြင့် စကားပြန်လိုက်၏။ “ စီနီယာ ကျွန်တော့်ကို သင်ပြပေးထားလို့ပါ။ ”
ရိုက်ကူးရေးအချိန်မကျသေး၍ ကင်မရာမန်းက သူတို့နောက်ကို လိုက်မလာပေ။ ထိုအချိန်တွင် အခန်းထောင့်အသီးသီးက ကင်မရာအသေများကိုမူ ဖွင့်ထားပြီးပြီ။ ကျီဇယ့်ဟွေ့သည် သူ့မျက်နှာမပေါ်လောက်သော ရှုထောင့်ကိုရှာကာ ခပ်ဖွဖွ ပြုံးလိုက်၏။ “ မင်းက တကယ်ကို တော်ပါပေတယ်။ ”
“ စီနီယာက ကျွန်တော့်အတွက် ကြိုးကြိုးစားစား လမ်းခင်းပေးထားတာကိုး။ ကျွန်တော်လည်း အမြဲတမ်း ပိုကြိုးစားရတော့တာပေါ့။ ”
“……”
ကျီဇယ့်ဟွေ့ ဘေးသို့ပြန်လှည့်သွားသည်နှင့် စီနီယာတစ်ယောက်၏ အသွင်အပြင်ကောင်းကို ပြန်တပ်ဆင်လိုက်သည်။ “ ရှောင်ကျယ် ကိုယ် မနေ့က ပြန်သွားတော့ အဲ့ဒီအကြောင်းကို တွေးခဲ့သေးတယ်။ သီချင်းပြောင်းတာက ပိုကောင်းမယ်လို့ ထင်တယ်။ ‘ နွေဆောင်းဦးညီဓား (One Sword is Equal to Spring and Autumn)’ဆိုရင်ရော ဘယ်လိုထင်လဲ။ ”
နွေဆောင်းဦးညီဓားက ကျီဇယ့်ဟွေ့၏ ပွဲဦးထွက်သီချင်းဖြစ်ကာ ဂန္တဝင်သိုင်းဇာတ်လမ်းတစ်ခုခု၏ ဇာတ်ဝင်သီချင်းဖြစ်သည်။ ပုံစံက အထိန်းအကွပ်မဲ့ကာ သူရဲကောင်းဆန်၏။ သီချင်းဆိုဖို့ လိုအပ်ချက်တွေက ဒေါသလှိုင်းများလောက် အရမ်းမမြင့်သည့်တိုင် အသံအရမ်းရွေး၏။ အသံတိုင်း ဆိုလို့မရနိုင်ချေ။
အရေးကြီးဆုံးအချက်သည်ကား တီဗွီစီးရီးကြောင့်လည်း ပါသည်။ " နွေဆောင်းဦးညီဓား " ကို တီဗွီဒရာမာပရိသတ်များက မြတ်နိုးသဘောကျကြကာ ဂန္တဝင်တေးတစ်ပုဒ်အဖြစ် မှတ်ယူထားကြသည်။ စိတ်ခံစားချက်များနှင့် သီချင်းဆိုပုံက တီဗွီစီးရီးနှင့် တွဲဆက်ထားပြီးဖြစ်ရာ နောက်ထပ်တေးသွားအသစ်ပြောင်းဖို့ရန် ခက်ခဲပေလိမ့်မည်။ ယခင်နှစ်များအတွင်း သိုင်းကားဇာတ်လမ်းကို အကြိမ်ကြိမ်အထပ်ထပ် ထပ်မံထုတ်လွှင့်ပြသခဲ့သည့် ကျေးဇူးဖြင့် တီဗွီဒရာမာပရိသတ်များသည် နွေဆောင်းဦးညီဓားကို အကြိမ်များစွာ နားရည်ဝလျက်ရှိပြီး နွေဆောင်းဦးညီဓားသီချင်း၏ လူထုအမြင်များသည်လည်း အထင်ကြီးလေးစားမှုများသာ စွဲမြဲနေတော့၏။
