Bi De • Pan Yu Xin De Rui la ||Myanmar Translation||

53

Album နှင့်ပတ်သတ်သည့်အကြောင်းများ ပြောပြီးနောက်မှာတော့ အစည်းအဝေးလည်း ပြီးဆုံးသွားခဲ့ပြီး သွမ့်ယိခွန်း ရှဲ့ကျူရှင်းတစ်ယောက်တည်းကိုသာ ဆက်နေရစ်စေသည်။

ဝမ်ချောင် ပျင်းတိပျင်းရွဲ့ထရပ်ပြီးနောက် ရှဲ့ကျူရှင်းကို အပြင်မှာ စောင့်နေမည်ဟု လက်ဟန်ပြလိုက်ရာ ရှဲ့ကျူရှင်းကလည်း ခေါင်းညိတ်ပြလာခဲ့သည်။

အဖွဲ့သားများ အပြင်ထွက်ပြီးတာနှင့် တံခါးပြန်ပိတ်ပေးသွားသည်။

သွမ့်ယိခွန်း ပြုံးလျက်ပြောလာသည်။ "အခုတလော မဆိုးဘူးပဲ။ စကားလည်းမများကြတော့ဘူး။"

ရှဲ့ကျူရှင်း ပြန်ပြောလိုက်သည်။ "စကားများစရာကိစ္စလည်း သိပ်မရှိပါဘူး။" 

သွမ့်ယိခွန်း မျက်ခုံးပင့်လျက် ပြောလာသည်။ "မင်းတို့နှစ်ယောက်တွဲနေတယ်ဆိုတဲ့ကိစ္စကြီးကို ဘာလို့ ငါ့ကိုတစ်ခွန်းမပြောရတာလဲ။"

ရှဲ့ကျူရှင်း : "..." 'ဘယ်အဖွဲ့သားကများ ဒီလိုကိစ္စတွေအထိ ပြန်ပြောရတာကြိုက်နေတာလဲ။'

သွမ့်ယိခွန်း အပြုံးမမည်သည့်အပြုံးတစ်ခုဖြင့် ပြောလာသည်။ "ငါ သူ့အစ်ကို မပြောပြထားဘူး။ မင်းတို့ဘာသာမင်းတို့ ဂရုစိုက်ကြ။"

ရှဲ့ကျူရှင်းမှာ "ကျွန်တော်တို့ဂရုစိုက်ပါမယ်။" ဟုသာ ပြန်ပြောနိုင်တော့သည်။

သွမ့်ယိခွန်း လေးလေးနက်နက်ဆက်ပြောသည်။ "အလုပ်အကြောင်းပြောရအောင်။ တရုတ်နှစ်ကူးအတွက်ရိုက်ခဲ့တဲ့ဇာတ်ကားက ရလဒ်ကောင်းတွေရနေတယ်၊ မင်းသရုပ်ဆောင်တာကလည်း အတော်လေးကောင်းတော့ အခုက သံပူနေတုန်း ဝင်ရိုက်ပြီး သရုပ်ဆောင်တဲ့လမ်းဘက် ထိုးဖောက်ရမယ့်အချိန်ကောင်းပဲ။"

ရှဲ့ကျူရှင်းပြောလိုက်သည်။ "ဒါပေမယ့် ကျွန်တော် သရုပ်ဆောင်ပိုင်းကို တစ်ခါမှမလေ့လာဖူးဘူး။ ဧည့်သည်အနေနဲ့ သီချင်းဆိုပေးတာမျိုးက ရပေမယ့် တကယ့်ဇာတ်ကောင်တွေကို ကိုင်ဖို့ကျ ..."

သွမ့်ယိခွန်းပြောလာသည်။ "အဲ့တော့လည်း ဘာဖြစ်လဲ။ အခုနာမည်ကြီးနေတဲ့ မင်းသား၊ မင်းသမီး တော်တော်များများကလည်း အနုပညာကျောင်းပြီးတွေ မဟုတ်ဘူး။ နာမည်တစ်ခုရလာရင် ဝင်ရိုက်လို့ရမယ့်ဒရမ်မာတွေက သူ့အလိုလိုရောက်လာတာပဲ။ အဲ့တာကို အခွင့်ကောင်းယူပြီး သရုပ်ဆောင်ပိုင်းကို ဖြည်းဖြည်းချင်းလေ့ကျင့်ယူပေါ့။"