"စိတ်အေးအေးထားပါ သားလင်းထင်ရဲ့...အားလုံးအဆင်ပြေမယ်လို့ ဆရာဝန်ကြီးတွေလည်း ရှင်းပြသွားတယ်လေ နော်"
ခွဲစိတ်ခန်းရှေ့မှာ ဂဏာမငြိမ်ဖြစ်နေတဲ့ ကျနော့်ပုံက အန်တီသိင်္ဂီတောင် သတိထားမိပြီး ပြန်နှစ်သိမ့်နေရတဲ့အဖြစ်။
ဒီနေ့ဟာ ဘန်ကောက်က ဆေးရုံကြီးတစ်ခုမှာ လိုအပ်တဲ့ခွဲစိတ်မှုလုပ်ရတဲ့နေ့ဖြစ်ပါတယ်။
ဆရာဝန်တွေရဲ့ရှင်းပြချက်အရ ၁လအတွင်း အခြေအနေဟာလည်း အထိအခိုက်မရှိ ပိုမိုကောင်းလာခဲ့တာမို့ ဒီခွဲစိတ်မှုဟာလည်း အားလုံးအဆင်ပြေပြနဲ့ ပြီးမယ်ဆိုတာသိရပေမယ့် စိုးရိမ်စိတ်ကိုတော့ မတားဆီးနိုင်ခဲ့။
မတော်တဆဆိုတဲ့ ကြိုမမြင်နိုင်တဲ့ အခြေအနေမျိုးတွေကို တွေးပူမိပြီးကို စိတ်ပူနေမိတော့တာပါပဲ။"ဟုတ်ကဲ့ အန်တီသိင်္ဂီ...အဆင်ပြေမယ်ဆိုတာသိပေမယ့် လူက စိတ်ပူနေတာ ထိန်းမရဘူးဖြစ်နေတယ်"
"အဟင်း...ဒါပေါ့ သားရယ်...ဖြစ်တတ်ပါတယ်၊ကံတရားကိုမယုံတောင် သားရဲ့လူဆိုးလေးကိုယုံပြီး စိတ်အေးအေးထား ဟုတ်ပလား"
ပုခုံးပြင်ကို လက်နဲ့အသာပုတ်ပေးရင်း နှစ်သိမ့်ပေးတဲ့ အန်တီသိင်္ဂီ၊နွေဦးရဲ့ ပေါ့ပါးပျော်ရွှင်တတ်တဲ့ စိတ်ထားတွေဟာ သူ့မေမေဆီကနေ အမွေဆက်ခံထားပုံပါပဲ။
"ဟုတ် အန်တီသိင်္ဂီ...ကျွန်တော် အားလုံးထက် သူ့ကိုပဲ ယုံနေပါ့မယ်"
"အင်း ကောင်းတယ်..ဒါနဲ့ လင်းထင်လေးက တို့ကို ဘယ်တော့မှ မာမီလို့ခေါ်မှာလဲကွယ်
သားမက်လောင်းလေးက အန်တီသိင်္ဂီလို့ပဲခေါ်နေတာက သူစိမ်းဆန်တယ် မခံစားရဘူးလား ဟမ်"ပြုံးလျက်နဲ့ဆိုသူကို အနည်းငယ်ပူထူနေတဲ့ မျက်နှာနဲ့ပဲ ကြည့်ရင်း ပြုံးနေမိတယ်။
စတွေ့ကတည်းက ခုချိန်ထိ မပြောင်းလဲတဲ့စိတ်ရင်းနဲ့ ဆက်ဆံပေးတဲ့ ဒီအမျိုးသမီးကို ကျနော်ကိုယ်တိုင်လည်း မိခင်တစ်ယောက်လို ခင်တွယ်မိပါတယ်။"မေမေလို့ ခေါ်လို့ရလားဗျ"
"အိုး....သိပ် ရတာပေါ့၊ကြားတာနဲ့ကို နွေးထွေးသွားတာပဲ"
YOU ARE READING
နွေဦးလေပြည် ချစ်သက်သေတည်(ေႏြဦးေလျပည္ ခ်စ္သက္ေသတည္)(Completed)
RomanceStart Date:March 20,2022 End Date :September20,2022 A beautiful love story between two boys,called Saw Nway Oo and Linn Htin Yaung