"မာမီ.....သားကျောင်းသွားဖို့ ပြင်နေတာ၊ ဦးကျော် ဟင်းလာပို့ရင်လည်း ဒီတိုင်းပဲ ရေခဲသေတ္တာထဲ ထည့်ထားလို့ ပြောလိုက်နော်"
ဆံပင်ကို သပ်ရပ်အောင် ပြုပြင်ဖြီးသင်ရင်း လေလှိုင်းကနေတဆင့် မာမီ့ကို အမှာစကားပါးတော့ "အင်းအင်း"ဆိုတဲ့ တုံ့ပြန်သံနဲ့အတူ မာမီ့ရဲ့ သြဝါဒတချို့ကိုလည်း ပြန်နားထောင်ရသည်။
နှစ်နှစ်ဆိုတဲ့ အချိန်ကာလကို ချိုတလှည့်ခါးတလှည့် လွမ်းနာကျရင်း ကုန်ဆုံးပြီးနောက် ဒီနေ့က တက္ကသိုလ်ပထမနှစ်တက်ရမယ့် အချိန်ပင်ဖြစ်သည်။
ကိုယ့်အရင် ၁၀တန်းအောင်သွားကြတဲ့ သူငယ်ချင်းတွေက နိုင်ငံခြားကျောင်းသွားသူ၊ဆေးကျောင်းတက်သူနဲ့ မျိုးစုံနေပေမယ့် ကျနော်ကတော့ မပြောင်းလဲတဲ့ မူလရည်ရွယ်ချက်အတိုင်း နိုင်ငံခြားဘာသာတက္ကသိုလ်မှာ ဝါသနာမပါဆုံးသော အင်္ဂလိပ်စာမေဂျာကို လျှောက်ခဲ့ပြီး တစ်ယောက်သောသူရဲ့ ခြေရာတွေထပ်နေမယ့် တက္ကသီလာမှာ ကျောင်းတက်ဖို့သာ ရွေးချယ်ခဲ့ခြင်းပေ။
၁၀တန်းဖြေပြီးတဲ့နောက် ဒယ်ဒီ့ကိုဝင်ကူရင်း စကော့တလန်ကို လိုက်ရဖို့ မျက်နှာချိုသွေးပေမယ့် ခေါင်းမာတဲ့ဒယ်ဒီက သူ့စကားကိုမပြင်
ပြန်လာတဲ့အထိ ဒီမှာပဲ စောင့်နေရမယ်၊အလုပ်ကိစ္စကြောင့်ကလွဲပြီး ဘယ်နိုင်ငံကိုမှ မသွားရဆိုပြီးသာ တစ်ချက်လွတ်အမိန့်နဲ့ ဆက်လက်ပြီး passportသိမ်းထားခဲ့ပြန်သည်။
ဒယ်ဒီ့ကို အမြင်ကတ်ကတ်နဲ့ အိမ်မှာမနေဘူးဆိုကာ ၈မိုင်က ဒယ်ဒီ့အပိုင်residenceတစ်ခုမှာမျက်နှာပြောင်ပြောင်နဲ့ နေနေတာ ၃လပင်ပြည့်တော့မည်။
ကြီးပုက ဟင်းမျိုးစုံချက်ပြီး ဦးကျော်က နေ့တိုင်းမပျက်မကွက်လာပို့တာမို့ ကိုယ်တိုင်လည်း ဘာမှလုပ်စရာမလို။မီးဖိုခန်းနဲ့ကိုယ်နဲ့က ဘာမှမသက်ဆိုင်သလို နေခဲ့တာကို သိကြလို့လည်း ဒယ်ဒီကလွဲ အိမ်ရှိလူကုန်အကဲပိုကြတာမျိုးပင်။
ကိုယ်တိုင်ကားမောင်းခွင့် ရကတည်းက ဦးကျော်ကို မမောင်းခိုင်းတော့တာမို့ ကျနော့်နောက် လိုက်စရာမလိုတော့တဲ့ ဦးကျော်ဟာ ထမင်း၊ဟင်းလာပို့ရင်းနဲ့ပဲ ကျနော့်နောက်ကို လိုက်ရပြန်သည်။
အခုလည်း ထမင်းဘူး၊ဟင်းဘူးတွေလာပို့ဦးမှာမို့ ကျောင်းသွားမယ့်အကြောင်းပြောရင်း ထားခဲ့ဖို့ မှာနေရတာပါ။မဟုတ်ရင် ဦးကျော်ဟာ ကျနော့်ကို မတွေ့ရမချင်း ပြန်မည်မဟုတ်မှန်း ကျနော့်ကို သိပ်သံယောဇဥ်ကြီးတဲ့ အထိန်းတော်ကြီးအကြောင်း သိနှင့်ပြီးသားဖြစ်နေလေပြီ။
![](https://img.wattpad.com/cover/300810189-288-k129731.jpg)
YOU ARE READING
နွေဦးလေပြည် ချစ်သက်သေတည်(ေႏြဦးေလျပည္ ခ်စ္သက္ေသတည္)(Completed)
RomanceStart Date:March 20,2022 End Date :September20,2022 A beautiful love story between two boys,called Saw Nway Oo and Linn Htin Yaung