Bi De • Pan Yu Xin De Rui la ||Myanmar Translation||

34

သူ့သူငယ်ချင်းမှန်း သိလိုက်တာနှင့် ဝမ်ချောင် ချက်ချင်းဆိုသလို စိတ်ပျော်သွားတော့သည်။ ရယ်လျက် သူ ပြန်ပြောလိုက်သည်။ "မဟုတ်တာတွေ ပြောမနေနဲ့။ ဒီနေ့က မင်းမွေးနေ့တဲ့လား။"

သူ့သူငယ်ချင်းဖြစ်သူလည်း ရယ်သွားသည်။ "ငါက ဘာလို့များ မင်းကို လိမ်ရမှာလဲ။ တကယ် ဒီနေ့ဟ။ ငါက ဆောင်းလယ်ပွဲတော် နေ့လည် ၁၂ နာရီအတိမှာ မွေးတာမို့ ငါ့မိဘတွေက နာမည်တောင် ချိုးယန်လို့ ပေးထားတာလေ။ ဒါနဲ့ မင်း လာမှာလား။"

[T/N : 秋阳 : 秋 က ဆောင်းဦးဆိုတဲ့အဓိပ္ပါယ်ရပြီး 阳 က နေမင်းဆိုတဲ့သဘောပါတဲ့။]

ဝမ်ချောင်မှာလည်း ဘာမှလုပ်စရာမရှိနေ။ သို့နှင့် သူပြောလိုက်တော့သည်။ "မင်းမွေးနေ့ကို ငါ ဘာလို့ မလာရမှာလဲ။ မင်း ဘယ်မှာလဲ။"

အလုပ်သမားတော်တော်များများ ပိတ်ရက်ရတာမို့ ကုမ္ပဏီတွင် လူနည်းစုသာ ရှိနေသည်။

ဧည့်ကြိုကောင်တာမှာ တာဝန်ကျနေတဲ့ဝန်ထမ်းက ရှဲ့ကျူရှင်းကို မြင်ချိန် တအံ့တဩဖြင့်ပြောလာသည်။ "Tomas, အပေါ်ရုံးခန်းမှာ ဘယ်သူမှ မရှိဘူး။ ရှင် တစ်ခုခုလိုချင်တာရှိရင် မနက်ဖြန်အထိ စောင့်ရလိမ့်မယ်။"

ရှဲ့ကျူရှင်း သူ့ကို ပြန်ပြောလိုက်သည်။ "ရတယ်။ ကျွန်တော် ဒီကို ခဏလောက် အကလေ့ကျင့်ချင်လို့ရောက်လာတာ။"

သူ ဓာတ်လှေကားရှိရာသို့ ဦးတည်သွားလိုက်ပြီး တံခါးပွင့်လာမှာကို စောင့်နေချိန်မှာပဲ ကောင်မလေးနှစ်ယောက်ရဲ့ တီးတိုးပြောနေသံကို ကြားလိုက်ရလေသည်။ "ရုပ်ကလည်း ချောတယ်၊ အရမ်းလည်း ကြိုးစားတယ်။ အဲ့တာကြောင့်မို့လည်း သူက ပေါ်ပြူလာအများဆုံးဖြစ်နေတာ။ အချို့သောခေါင်းဆောင်တွေနဲ့တော့ မတူဘူးပေါ့၊ ကျစ်ကျစ်"

ဓာတ်လှေကားမှန်အတွင်းပေါ်နေတဲ့ သူ့ပုံရိပ်က မျက်မှောင်ကြုတ်သွားတာကို သူ မြင်လိုက်ရတော့သည်။

သူ ဘယ်အချိန်ကတည်းကများ ဝမ်ချောင့်ကို မကောင်းပြောတာတွေ ကြားရတာ မကြိုက်တော့တာပါလိမ့်။

အကလေ့ကျင့်ခန်းထဲ ရောက်ချိန် သူ သီချင်းဖွင့်ထား၍ သွေးပူအောင်လုပ်လျက် အခြေခံအဆင့်များ လေ့ကျင့်ပြီးမှ 'Summer Ice' သီချင်းရဲ့ကကွက်များ ကို ကလိုက်တော့သည်။