ထိုအကြောင်းအရင်းများကြောင့် ထိုသို့သော ဂန္တဝင်သီချင်းမျိုးကို မူရင်းအဆိုတော်နှင့်အတူ ပြီးပြည့်စုံအောင်ပြန်ပြင်ဖို့ရန်က သိပ်ကိုခက်ခဲလွန်းလှပေသည်။ ဤသီချင်း၏ ပရိသတ်များ မဝေဖန် အပြစ်မတင်နိုင်စေဖို့ ကောင်းမွန်စွာ ချောချောမွေ့မွေ့ဖျော်ဖြေရန်မှာ ကျယ်ယန်အတွက် အလွန်တရာကို ခက်ခဲလွန်းချေ၏။
ကျယ်ယန်သည် ကျီဇယ့်ဟွေ့အမေးကို ချက်ချင်းတန်းမဖြေဘဲ အကြံပေးလိုက်၏။ “ ဆရာကျီ မနေ့ကတော့ ဒေါသလှိုင်းများသီချင်းကို လိုက်လျောညီထွေဖြစ်အောင် ကြိုးစားကြည့်ထားဖို့ ကျွန်တော့်ကို ပြောခဲ့တယ်နော်။ ကျွန်တော် အကြံတစ်ချို့ပေါ်လာတာနဲ့ သီချင်းကို ပြောင်းထားသေးတယ်။ အရင်နားထောင်ကြည့်ပြီး ပြောင်းထားတာတွေကို ကြည့်ချင်လား။ ”
သီချင်းပြောင်းတာက ကျီဇယ့်ဟွေ့၏ ရုတ်တရက် အကြံပြုချက်ပင်။ မနေ့က ကျီဇယ့်ဟွေ့၏ အကြံပြုချက်ဖြင့် ကျယ်ယန်သည် ဒေါသလှိုင်းများသီချင်းကို ပြုပြင်ခဲ့၏။
ကျီဇယ့်ဟွေ့က ခေါင်းညိတ်၏။ “ ဒါဆိုလည်း ထပ်ဆိုပြပါဦး။ အမှန်တော့ ကိုယ်လည်း ဒေါသလှိုင်းများသီချင်းကို လက်လျော့ဖို့ ဝန်လေးနေတာ။ သီချင်းပြောင်းဖို့ကိုလည်း အတိအလင်း မသတ်မှတ်ရသေးပါဘူးလေ။ မင်းရဲ့ ဒေါသလှိုင်းများ သီချင်းပြင်တာက ပိုကောင်းနေရင်လည်း အရင်အတိုင်းပဲ ဒီသီချင်းကို ဆိုကြတာပေါ့။ ”
“ ကျေးဇူးတင်ပါတယ် ဆရာကျီ ”
ကျယ်ယန်က ပျော်ရွှင်သွားသည့် အမူအရာဖြင့် လေ့ကျင့်ရေးအခန်းထဲက စန္ဒယားရှိရာသို့ လျှောက်သွား၏။ သူ ခုံရှည်ပေါ်မှာထိုင်ပြီး အဖုံးကိုမကာ စန္ဒယားခလုတ်များပေါ် လက်တင်လိုက်၏။ သူ တီးမလို့ပြင်နေရင်းမှ ရုတ်တရက်လက်ရုတ်ကာ ကျီဇယ့်ဟွေ့ကို လှည့်ကြည့်သည်။ “ ဆရာကျီ ကျွန်တော်စပြီနော်။ ”
ကျီဇယ့်ဟွေ့က ‘ ကျယ်ယန်က တကယ်ကြီး စန္ဒယားတီးတတ်တယ်ဟ ’ ဆိုသော အံ့သြမှုကို ထိန်းချုပ်ရင်း ခေါင်းညိတ်ပြလာသည်။
အခန်းထဲက ဝန်ထမ်းများသည် သူတို့နှစ်ယောက်ကြားက အပြန်အလှန် စကားပြောသံများကိုကြားကာ အဓိကအချက်ကို သိရှိသွားကြ၏။ လက်ထောက်က ကြိုတင်ရိုက်ကူးထားဖို့ ကင်မရာမန်းကို ခေါ်လိုက်သည်။
Chapter 35
Start from the beginning
