Bi De • Pan Yu Xin De Rui la ||Myanmar Translation||

28

ဝမ်ချောင်လည်း သူ တက်တက်ကြွကြွမရှိနေမှန်း တွေ့တာမို့ အရှက်မရှိပြောလာသည်။ "ငါလည်း အိပ်ချင်နေတာ။ မင်းအိမ်မှာလိုက်ပြီး ခဏလောက် အိပ်ဦးမယ်။"

အိမ်ပြန်လို့ အိပ်ရာပေါ်လှဲလျောင်းပြီးချိန် ဝမ်ချောင် မအိပ်သွား။ ထိုအစား ရှဲ့ကျူရှင်းဘက်လှည့်ရင်းသာ အဆက်မပြတ် စကားများပြောနေတော့သည်။ "မင်းအိပ်ရာက သိပ်ပြီးသက်တောင့်သက်သာမရှိဘူး။ ငါ မင်းကို အသစ်တစ်ခုဝယ်ပေးမယ်။ ငါအခုအိပ်နေတဲ့ Latex အိပ်ရာက မဆိုးဘူး။ သူက ခေါင်းအုံး နှစ်လုံးပါတယ်။ ပြီးတော့ မင်းရဲ့လိုက်ကာကလည်း အရမ်းနက်လွန်းတယ်။ ငါ နောက်မှ အသစ်ဝယ်ပေးမယ်။ ငါက အပြာရောင်ကြိုက်တယ်။"

ရှဲ့ကျူရှင်း ပက်လက်လှဲရင်း သူ့ဘက်လှည့်မကြည့်။ "မင်းက ငါ့အိမ်ကလိုက်ကာအရောင်လည်း လိုက်ဂရုစိုက်နေတာပဲလား။"

ဝမ်ချောင် ရယ်ရင်းရုတ်တရက်ပြောလာသည်။ "အခုဆို ငါတို့ မြန်မြန် အောင်မြင်လာဖို့ မျှော်လင့်နေမိပြီ။"

ဝမ်ချောင် ထိုကဲ့သို့ပြောလာချိန် ရှဲ့ကျူရှင်းမှာ နည်းနည်းတော့ အံ့ဩသွားရသည်။ ကျန်အဖွဲ့သားများအကုန် မြန်မြန်အောင်မြင်ဖို့မျှော်လင့်ကြပေမယ့် ဝမ်ချောင်တော့ မပါနေခဲ့။ သူတစ်ယောက်တည်းကသာ အောင်မြင်မှုအပေါ် ဂရုသိပ်မစိုက်ပုံပေါ်လှသည်။ သူ့မှာ ပိုက်ဆံလည်း လိုအပ်နေခြင်း မရှိတာမို့ အောင်မြင်မှုအတွက် ဘာသိဘာသာဖြစ်နေသည်။ သူ ဒီအနုပညာလောကထဲ ဝင်ခဲ့တာလည်း အိုင်ဒေါဖြစ်ချင်တာကြောင့် မဟုတ်။ လုပ်စရာမရှိ၊ ပျင်းနေခြင်းကြောင့် လာပျော်ပါးခြင်းသာ။

သူက ရှဲ့ကျူရှင်းကို လှမ်းပုတ်ပြီး ပျော်ပျော်ကြီး ဆက်ပြောသည်။ "ငါတို့ အောင်မြင်လာတဲ့အခါကျ မင်းလည်း ပိုက်ဆံတွေ အများကြီးရှိလာလိမ့်မယ်။ မင်းက အိမ်အကြီးကြီးတစ်လုံးဝယ်၊ ပြီးရင် ငါတို့ အတူနေကြမယ်။ ငါ မင်းကို အိမ်လခတော့ ပေးမှာပေါ့။ ပြီးရင် လိုက်ကာ၊ အိပ်ရာခင်း၊ စောင်တွေကအစ အကုန် အပြာရောင်ပြောင်းထားမယ်။ ငါတို့မှာ အလုပ်ရှိလာရင် အတူလုပ်မယ်။ အလုပ်မရှိဘူးဆို အိမ်မှာပဲ ဂိမ်းတွေဆော့ကြမယ်! ညဘက်ဆို သရဲကား တူတူကြည့်မယ်၊ ပြီးရင် မင်းက ငါ အိမ်သာသွားမှာကို လိုက်ခဲ့ပေး။ အာ ဟုတ်သား၊ အိမ်သာခုံကလည်း အပြာရောင်ပဲ ဖြစ်သင့်တယ်!"