Bi De • Pan Yu Xin De Rui la ||Myanmar Translation||

24

[Unicode]

'လမ်းခွဲလိုက်ပြီ'

အဖွဲ့သားများ ယန်ကျားကျားကိုမြင်ချိန် နည်းနည်းတော့အံ့ဩသွားပေမယ့် သူ့ပုံစံအနေအထားနှင့် အဝတ်အစားများကြောင့် သူတို့အကုန်လုံး သူ့ကို ဝမ်ချောင်ခေါ်လာတဲ့ကောင်မငယ်လေးလို့ ထင်သွားကြပြီး သူ့အနားမှ ခပ်ခွါခွါနေကြလေသည်။

သူမမှာ ရှက်ရွံ့နေတာမို့ မျက်နှာပါ တည်တင်းသွားရတော့သည်။

ဝမ်ချောင်ကလည်း သူမဘာသာ အရူးလုပ်မိနေတာကို မြင်ရခြင်းအား သဘောကျနေသည့်အပြင် အထူးတလှယ်လည်း မမိတ်ဆက်ပေးချင်တာမို့ မသိချင်ယောင်ဆောင်ထားလိုက်သည်။

ရှဲ့ကျူရှင်းကတော့ ထိုကဲ့သိုမလုပ်နိုင်တာမို့ ကြားထဲမှ ဝင်မိတ်ဆက်ပေးရတော့သည်။ "ဒါက ယန်ကျားကျား၊ ငါ့သူငယ်ချင်း။ သူလည်း ဘာမှလုပ်စရာမရှိနေတာနဲ့ ငါတို့နဲ့တူတူလိုက်ခဲ့တာ။"

အဖွဲ့သားများအနေနှင့် သူတို့ လျန်ရှီအိမ်ကို ဘာလို့ကောင်မလေးခေါ်လာတာလဲ နားမလည်ပေမယ့် ရှဲ့ကျူရှင်းက အသိတရားကင်းမဲ့နေသူ မဟုတ်။ ထိုကောင်မလေးက ဝမ်ချောင်ခေါ်လာတာ မဟုတ်မှန်း သိတာနှင့် အဖွဲ့သားများအကုန် သူမအပေါ် အခုနကထက် ပို၍ဖော်ဖော်ရွေရွေရှိလာတော့သည်။ အထူးသဖြင့် ချန်းယောင့်လို စွဲမက်ဖွယ်ရာရှောင်ကျယ်ကျဲမျိုး မမြင်ဖူးသူအတွက် အသစ်အဆန်းလိုဖြစ်နေပြီး အကြိမ်ရေ အနည်းငယ်မျှ စကား စပြောနေလေ့ရှိလေသည်။

သူတို့ လျန်ရှီအိမ်ရှိရာ အောက်ထပ်သို့ရောက်ချိန် အထဲဝင်ရန် ကတ်လိုနေတာမို့ ဝမ်ချောင် လျန်ရှီကို ဖုန်းခေါ်လိုက်ပေမယ့် ထိုသူက အပြင်မှာ ကိစ္စတစ်ခုလုပ်နေဆဲဖြစ်သည်။

လျန်ရှီက ထပ်တိုး၍ပြောလာသည်။ "ငါတို့တွေ ဟော့ပေါ့စားကြမှာ မဟုတ်လား။ မင်းသူငယ်ချင်းတွေကို ခေါ်ပြီး အသားနည်းနည်း၊ အရွက်နည်းနည်း သွားဝယ်ထားလေ။ အရက်ဝယ်ခဲ့ဖို့လည်း သတိရဦး။ မင်းတို့အကုန်ဝယ်ပြီးတဲ့အချိန် ငါလည်း အိမ်ရောက်နေလောက်ပြီ။"

စူပါမားကတ်က ဂိတ်ရဲ့အပြင်ဘက်တွင်သာ။ ဝမ်ချောင် အောက်ထပ်မှာ ကားထိုးထားခဲ့ပြီး အုပ်စုလိုက်ခေါ်၍ စူပါမားကတ်ထဲ ပစ္စည်းဝယ်ဖို့ သွားကြတော့သည်။ သူတို့တွေ အသီးအရွက်၊ အသား၊ ငါးအသားလုံး၊ ပုစွန်ဖက်ထုတ်၊ သောက်စရာနှင့် အသီးများ ဝယ်ခဲ့ကြသည်။ လူတိုင်းရဲ့လက်ထဲတွင် အိတ်အကြီးကြီးတစ်ထုတ် ကိုင်ထားလျက်ရှိနေကြပြီး ထိုကောင်လေးများက ဒေါက်ဖိနပ်မြင့်စီးထားတဲ့ယန်ကျားကျားအပေါ် စာနာထောက်ထားသည့်အနေနှင့် သူမကို ဘာမှ မသယ်ခိုင်း။