Bi De • Pan Yu Xin De Rui la ||Myanmar Translation||

17

သူ မကြားချင်ယောင်ဆောင်ပြီးသာ powerbank ကို တွေ့တာနှင့် ဖုန်းအားသွင်းလိုက်သည်။

မနက်ဖြန်က တနင်္လာနေ့ဖြစ်ပြီး IceDream အဖွဲ့ကို လူကြားထဲ ချပြမည့်အစီအစဉ်ကလည်း မနက်ဖြန် စတင်မှာဖြစ်၏။ ပထမဆုံးချပြခံရမည့်သူဖြစ်သည့်အလျောက် သူက မနက်ဖြန် ည ၈ နာရီတွင် လူထုအမြင်ရှေ့မှောက်သို့ ရောက်လာတော့မှာဖြစ်သည်။

သိပ်မကြာခင်မှာပဲ သူက ကောင်မလေးတွေ အတင်းအဖျင်းပြောစရာခေါင်းစဉ်ကောင်းတစ်ခုဖြစ်လာတော့မှာဖြစ်ပြီး လမ်းမှာမြင်တွေ့မိ၍ 'သူက အရမ်းချောတာပဲ' ဟု ပြောဖြစ်ခဲ့သည့်သူစိမ်းတစ်ယောက် မဟုတ်နေတော့။

ဝမ်ချောင်ကတော့ နေဖင်ထိုးတဲ့အထိ အိပ်နေပြီးမှ ပျင်းရိပျင်းရွဲနှင့် ထကာ အိမ်ပြန်လိုက်သည်။

သူ့ဒုတိယအစ်ကိုဖြစ်သူ ဝမ်ကျင်းက ပထမထပ်တွင် စာအုပ်ဖတ်လျက် ထိုင်နေပြီး သူ ခရီးဆောင်အိတ် ဆွဲဝင်လာတာကို မြင်တာနှင့် မျက်မှောင်ကြုတ်သွားတော့သည်။ "မင်း ပြန်လာနေမှာတော့ မဟုတ်ပါဘူးနော်။"

အစက စိတ်လှုပ်ရှားပျော်ရွှင်နေသည့်ဝမ်ချောင်မှာ ရုတ်ချည်းဆိုသလို မျက်နှာပျက်သွားလေသည်။ "ဘာသဘောလဲ။ ကျွန်တော့်မိသားစုက ကျွန်တော် ပြန်လာတာကိုတောင် မပျော်ဘူးပေါ့လေ။"

ဝမ်ကျင်း တစ်ဖက်ပြန်လှည့်သွားပြီး သူ့စာအုပ်ကိုသာ ဆက်ဖတ်နေလိုက်သည်။ "နားအေးပါးအေး နေရတဲ့ရက်လေး နည်းနည်းပါးပါး ရကာမှ။"

ဝမ်ချောင်မှာ ထိုကဲ့သို့ ကြားလိုက်ရခြင်းအတွက် စိတ်မပျော်မရွှင်ဖြစ်လို့သွားသည်။ ထို့ကြောင့် သူ ပါးစပ်ဖွင့်ဟပြီး အားနည်းချက်ကို ထိုးနှက်လာတော့သည်။ "ခင်ဗျားရဲ့နားအေးပါးအေးနဲ့သာ ပျော်ပျော်ကြီးနေလိုက်တော့။ အဲ့တာကြောင့် အသက် ၃၀ ကျော်တာတောင် ရည်းစားမရသေးတာ အံ့ဖွယ် ဟုတ်မနေတော့ဘူး။"

ဝမ်ကျင်း : "..."

ဝမ်ချောင် ပြောပြီးတာနှင့် တစ်ခုခုမှားယွင်းနေသလို ခံစားလိုက်ရတာမို့ ခရီးဆောင်အိတ်ကိုတောင် ယူမနေတော့ဘဲ အပေါ်သို့ အပြေးတက်သွားလိုက်သည်။ သို့ပေမယ့် ခြေလှမ်းအနည်းငယ်မျှ လှမ်းပြီးတာနှင့် သူ့ကို ဝမ်ကျင်းက ဖမ်းမိသွားပြီး လှေကားလက်ရန်းပေါ် ဖိထားရင်း အားဖြင့် ဆွဲစိတ်လာသည်။ သူ့မှာ အော်ဟစ်ရင်း ညှာတာပေးဖို့ ပြောနေရ၏။ "အား! ကျွန်တော် မှားတယ်၊ ကျွန်တော်မှားတယ်လို့! မဆွဲဆိတ်နဲ့တော့!  အာ့ အာ့ အာ့ ... နာတယ် နာတယ် နာတယ်လို့!!"