ရှီရှန်း ( ႐ွီ႐ွန္း) Book 3 Arc 11 to....

Arc 11.8

Unicode

တစ်စုံတစ်ယောက်က အမြန်ဆုံးအလျင်နဲ့ ရှီရှန်းဆီကို သေရည်တစ်အိုးကမ်း‌ပေးလိုက်တယ်

ရှီရှန်းက အမျိုးသမီးရဲ့ မေးစေ့ကိုညှစ်ပြီး ပါးစပ်ကို အတင်းအကျပ်ဖွင့်စေလိုက်ကာ သေရည်အိုးကို အဆက်မပြတ်လောင်းထည့်တော့တယ်

"အဟွတ်..အဟွတ်..ဂလု.."

ခန်းမထဲမှာ ရှီရှန်းလက်ထဲက အမျိုးသမီးရဲ့ သေရည်ကို အသဲအသန်မျိုချနေရတဲ့အသံကိုပဲ ကြားနေရပြီး ဘယ်သူတစ်ဦးတစ်ယောက်ကမှ အသက်တောင်ကျယ်ကျယ်မရှုရဲကြဘူး..

အိမ်ရှေ့စံနဲ့ ကျန့်ဇီတို့တောင်မှ ရှီရှန်းရဲ့ လက်ရဲဇာတ်ရဲအပြုအမူကြောင့် အံ့အားသင့် ထိတ်လန့်နေကြတယ်

'အမတ်ချုပ်ကြီး ရူးသွားပြီလား..'

လင်းယွဲ့ကတော့ ထိုင်နေရာကတောင် မထဘဲ ရှီရှန်းရဲ့ ပုံရိပ်ကို အကဲခတ်နေတယ်

သူမရဲ့ မျက်နှာက ပုံမှန်အတိုင်း တည်တည်တံ့တံ့သာဖြစ်ပြီး ခါတိုင်းလိုပဲ သီးသန့်ဆန်တဲ့ အရှိန်အဝါတွေ လွှမ်းခြုံထားတယ် အပေါ်ယံမျက်နှာထားကိုကြည့်ပြီး ဘယ်သူကမှ သူမဒေါသထွက်နေတယ်လို့ ထင်နိုင်ကြမှာမဟုတ်ဘူး..ဒါပေမယ့် ခံစားချက်ကတော့..ဒီခန်းမထဲက အခြားလူတွေပါမက သူတောင် သူမဒေါသအကြီးအကျယ်ထွက်နေမှန်း ခံစားမိတယ်

ရှီရှန်းက အမျိုးသမီးရဲ့ပါးစပ်ထဲကို သေရည်အိုးပေါင်းများစွာလောင်းထည့်လို့အပြီးမှာတော့ သူမရဲ့မေးစေ့ကို လွှတ်ပေးလိုက်ပြီး မျက်နှာကို သုံးလေးချက်လောက်ပုတ်လိုက်တယ် "သောက်ချင်သေးလား.."

" *ဂေ့!..* " အမျိုးသမီးက လေချဉ်တစ်ချက်တက်လိုက်ပြီး ကြောက်လန့်တကြား အသဲအသန် ခေါင်းရမ်းပြတယ်

"ခွမ်း!!.." ရှီရှန်းက အနားက သေရည်အိုးအလွတ်တွေကို ကန်လိုက်တာကြောင့် သေရည်အိုးတွေ အစိတ်စိတ်အမြွှာမြွှာကွဲသွားကြပြီး အထဲမှာ ကျန်နေတဲ့ သေရည်အနည်းငယ်က ကြမ်းပြင်ပေါ်ကို ဖိတ်စင်သွားတယ်

ရှီရှန်းက သေရည်အိုးအကွဲစတွေကြားမှာရပ်ရင်း အသံတစ်သံထွက်ဖို့တောင်ကြောက်နေကြပုံရတဲ့ အမျိုးသမီးထုကြီးကို အေးစက်စွာ ဝှေ့ကြည့်လိုက်တယ်