The Star around the Sun 明日星程 [Unicode]

Chapter 80

ထို့ကြောင့် သူ အားနာစိတ်ဝင်လာတော့သည်။ "ခင်ဗျား ခက်ခက်ခဲခဲ ကြိုးစားပေးတာတွေအတွက် ကျေးဇူးတင်ပါတယ်။"

ရှရှင်းချန်က ကိစ္စများကို မခက်ခဲအောင် လုပ်နေမှန်း ဟွမ်းကျီစင်း တွေ့ချိန်မှာတော့ သူလည်း သူ့ချည်းကပ်နည်းအား တစ်မျိုးပြောင်းလိုက်သည်။ "မင်းအစ်ကိုကြီး အလုပ်ကြိုးစားနေတာကို ထောက်ပြီး မင်း ငါ ပြောမှာလေး နားထောင်ပေးလို့ မရဘူးလား။"

ရှရှင်းချန် သူ ဘာပြောချင်တာလဲ သိနေပေမယ့်လည်း ပြန်ပြောပေးလိုက်သည်။ "ခင်ဗျား ပြော။"

ဟွမ်းကျီစင်း ပြောလိုက်သည်။ "မင်း ယန်ယိုမင်နဲ့ နေလို့ရတယ်။ ငါလည်း မင်းကို ဖျောင်းဖြလို့ရတာမှ မဟုတ်တာ။ ဒါပေမယ့် မင်း အဆောက်အဦးထဲကို သူနဲ့အတူ ဝင်တာ၊ ထွက်တာ မလုပ်ဖို့ သတိရ။ မင်း ဘာသာ ဝင်တာ ထွက်တာဖြစ်ဖြစ်၊ ငါ မင်းကို လာကြိုတာဖြစ်ဖြစ် လူတွေမြင်ရင်တောင် မင်း အဲ့မှာ တိုက်ခန်းအသစ် ဝယ်လိုက်တယ်လို့ ပြောလို့ရတယ်။ သူ့အိမ်ကတော့ .. ဘယ်သူကမှ သူ ဘယ်လိုနေ နေလဲ လိုက်စစ်ဆေးလို့ မရဘူးလေ။ ဒါပေမယ့် မင်းနဲ့ သူသာ အတူ ဝင်ထွက် လုပ်ခဲ့ရင်တော့ ရှင်းပြဖို့ ခက်သွားလိမ့်မယ်။"

ရှရှင်းချန် ပြောလိုက်သည်။ "ကျွန်တော် သိတယ်။"

"ရှရှင်းချန်" ဟွမ်းကျီစင်း သူ့အား နောက်ကြည့်မှန်မှ တစ်ကြိမ်ပြန်လှမ်းကြည့်လိုက်ပြီး သူ့အသံကလည်း နစ်ဝင်နေသည်။ "မင်း သိတာကို ပြောချင်တာ မဟုတ်ဘူး။ မင်း နားထောင်ချင်ရမှာ။"

ရှရှင်းချန် သူ့ကို လှမ်းကြည့်ရင်း ဒီတစ်ကြိမ်မှာတော့ အချိန်အနည်းငယ် တိတ်ဆိတ်သွားသည်။ ထို့နောက်တွင်မှာ — "ကောင်းပြီ၊ ကျွန်တော် ခင်ဗျားကို ကတိပေးတယ်။"

ဟွမ်းကျီစင်း ဆက်ပြောသည်။ "ငါ အရင်တုန်းက ပြောထားဖူးသလိုပဲ သိသွားလို့မရဘူးဆိုတာ အများပြည်သူနဲ့ မီဒီယာသမားတွေကိုပဲ မဟုတ်ဘူး၊ မင်း အမျိုးအဆွေတွေ သူငယ်ချင်းတွေကော၊ ယန်ယိုမင်ဘက်က အပေါင်းအဖော်သူငယ်ချင်းတွေကော ပါတယ်။"

ရှရှင်းချန် ရုတ်တရက်ဆိုသလို ချန်းဟိုင်လန်ကို တွေးမိသွားပေမယ့်လည်း သူ ပြောလိုက်သည်။ "ဟုတ်"