Bi De • Pan Yu Xin De Rui la ||Myanmar Translation||

2

"ငါက ပေ့ကျင်း အကတက္ကသိုလ် တက်ခဲ့တာ။"

ဝမ်ချောင် မျက်လုံးများ တောက်ပလာတော့သည်။ "အာဟ! ဒါဆို ငါတို့က အိမ်နီးနားချင်းတွေပဲ။ ငါက မင်းကျူ ဂီတတက္ကသိုလ်က၊ ကျောင်းဝင်နှစ်က 09၊ ကြည့်ရတာ .. ငါတို့ ရွယ်တူဖြစ်မယ်? မင်းက ဘယ်နှစ်ကလဲ။"

ရှဲ့ကျူရှင်း သူ့ကို မင်္သကာသလို ကြည့်ပြီး ပြောလိုက်သည်။ "ကျောင်းဝင်နှစ်က 08၊ မွေးတဲ့နှစ်က 1992"

ဝမ်ချောင် ပိုလို့တောင် ပျော်သွားသည်။ "ငါလည်း 1992မှာ မွေးတာပဲ!! ငါ့ရဲ့ အီစီကလီကောင်မလေးတွေ တော်တော်များများလည်း မင်းတို့ ကျောင်းကိုသွားတာ၊ အကုန်လုံးနဲ့ အဆက်အသွယ် မလုပ်ဖြစ်တော့တာတောင် တော်တော်ကြာပြီ။ ငါ မှတ်မိတာဆိုလို့ မင်းတို့ ကျောင်းကန်တင်းက မာစလာ အမွှေးအကြိုင်နဲ့ သိုးသားဟင်းပဲ၊ အခုတော့ အာ့လို အရသာ ထပ်မစားရတော့ဘူး။ ငါ မင်းတို့ကျောင်းကို ခဏခဏ လာလည်တာ၊ ငါတို့ အရင်က တွေ့ဖူးလောက်မယ်။"

ရှဲ့ကျူရှင်း သူ့ကို တွေ့ဖူးလား၊ မတွေ့ဖူးလားဆိုတာ မမှတ်မိ၊ သို့ပေမယ့် ဒီလူက သူတို့ တက္ကသိုလ်နှင့် ကပ်ရပ်ရှိနေသည့် တက္ကသိုလ်မှ ဆိုတာကိုတော့ ယုံကြည်သည်။ သူ့ကျောင်းမှာက မိန်းကလေး အများအပြားရှိပြီး ယောက်ျားလေးက သိပ်အများကြီး မရှိ။ ဘေးကပ် ကျောင်းမှ ကောင်လေး တော်တော်များများက သူတို့ကျောင်းထဲ လျှောက်ပတ်ငမ်းဖို့ နေ့တိုင်းလာလေ့ရှိ၏။

ဝမ်ချောင် ထပ်မေးသည်။ "မင်း ကတာ လုံးဝ အဆင်ပြေတယ်ဆိုတော့ သီချင်းကော ဆိုနိုင်လား။"

သူ အရင်တစ်ခေါက်က ရှဲ့ကျူရှင်းနှင့် တွေ့ခဲ့တာကို လုံးဝ မမှတ်မိ၊ ရှဲ့ကျူရှင်းကလည်း ထိုကိစ္စကို မပြောပြချင်။ ထို့ကြောင့် သူ မမှတ်မိသလို ဟန်ဆောင်ပြောလိုက်သည်။ "ဘာအတွက်လဲ။"

ဝမ်ချောင် ပြုံးပြီး ပြောလာသည်။ "မင်းကို အလုပ်တစ်ခုနဲ့ မိတ်ဆက်ပေးမလို့။ ငါ့ကို မင်း သီချင်းဆိုနည်း သိလားသာ ပြော၊ တအား ကောင်းစရာမလိုဘူး။ အသံအတက်အကျ မှန်အောင် မဆိုတတ်တဲ့သူ*မဟုတ်ရင် ရတယ်။"

[T/N : tone-deaf]

ရှဲကျူရှင်း ထိုအကြောင်းကို တွေးကြည့်ရင်း 'ဒါ Survivalပွဲအတွက် နေမယ်။' ဟု ကောက်ချက်ချလိုက်သည်။