اسكريبتات

اسكريبت (٤٨) "هدير هاشم"

_حولوه لدكتور السجن حالا، لازم نتأكد من سلامة عقله.

السجن!
داخل الجدران دي حياة تانية، بعيدة كل البعد عن العالم برا، فيها القوي والضعيف والمكسور والمنهوب، والأهم فيها البريء، عدى عليا حالات كتير وانا هنا، ومعظمهم نفس الشخصية، مجرد مجرم.

اللي قتل، واللي سرق، واللي نصب، لكن أصعب قضية كانت اللي قدامي دي.

_ مش عايز تقول حاجة؟
_ مفيش حاجة أقولها، اه قتلته وهقتله تاني.
_ ده ابوك!
بصلي وسكت فاتنهدت وانا بعدل نضارتي_ لازم تتكلم، عمل فيك ايه؟
_ كلامي مش هيفيد، انا شخص كده كده ميت، مش هتفرق كتير.

نظرة اليأس والانتقام في عينه بتأكدلي أنه فعلا لو أبوه قدامه هيقتله من غير تردد، بس هل ده احساس خاص بأبوه ولا بأي شخص؟ كنت حاسة باحساسين والاتنين متناقضين، يا اعمل اختباراتي بعملية ومهنية وأخرج برا اقولهم النتيجة، يا ألاقي مبرر لقتله!

_ أحكي جرب تحكي صدقني ممكن اساعدك.
_ لو خلصتي يا دكتورة عايز أرجع الزنزانة تاني.

قضية مش مفهومة، غامضة وفي حاجات كتير واقعة وضايعة فيها، والأهم من كل ده إحساسي بالمسئولية تجاة حياة شخص هو اصلا بايعها.

_ علشان كده مكنتش حابة التخصص ده!
_ صدقيني يا ماما، أنا متأكدة أن في حاجة، مش هيقتل ابوه من فراغ، وخصوصا أن مكتوب في الورق أنه الابن الوحيد وكمان الوريث الوحيد للهيصة دي.
_ بصي يا تاج، رفضي للتخصص ميقللش من شطارتك فيه، أنا اه بكون خايفة عليكي لكني متأكدة أنك قوية وقد كل ده، شوفي قلبك واسمعي كلامه زي ما دايما عودتك، قلبك عمر إحساسه ما يخيب.

يوم جديد، بلهفة جديدة لحل القضية دي، دخلت للمأمور وطلبت تولي الحالة من الناحية الطبية، وهو وافق، كان عندي امل غريب اني هسمعه، طلبت زيارة واتوافقت، كنت متحفزة لشوفته وعندي عزيمة وإصرار اني أسمع...

_ بص يا استاذ عدي خروج من هنا قبل ما تحكي اللي حصل مش هيحصل، قاعدة انا وانت لحد ما تتكلم.
بصلي ورجع لف وشه وبص للسقف_ مهو انت لازم تتكلم، مراعاة فضولي بس...
قرب فجأة فاتخضيت_ الفضول اوقات كتير بيكون خطر.
اتنهدت_ وايه الجديد؟  الحياة كلها مخاطر.
_ طب خليني معاكي، ايه يضمنلك اني لما احكي اكون بقول الحقيقة؟
_ وهتكدب ليه؟
_ وهقول الصدق ليه؟ انا كده كده لابس التهمة.
_ شكلك ميوحيش انك بتكدب
ضحك باستهزاء_ بس يقتل صح؟
عدلت نضارتي _ بص يا استاذ عدي استهزائك بالكلام أو حتى رفضك للجلسة دي مش هيغير حاجة، وعلشان انا حاسة اني ضيف غير مرغوب فيه منك فممكن تحكي اللي حصل علشان امشي وتخلص مني للأبد.
_ لا عادي انتي مُسليه، خليكي يومين قبل الجلسة.

بصيتله، بيستفزني ليخرج أسوأ ما فيا وانا اصلا خلقي قد خرم الإبرة، بس ولو لازم اتحمل، ابتسمت...