اسكريبتات

اسكريبت (١) "آية الإبشيهي"

"ياما عيون شاغلوني.. لكن ولا شغلوني إلا عيونك إنت.."

=أنا قولت مليون مرة مش عاوز اسمع النشاز ده.
أخدت نفس طويل وطلعته بهدوء وكملت اللي بعمله
=أنتِ يابنتي مابتعرفيش تعملي حاجه إلا لما تغني؟
كنت بغسل المواعين لما دخل.. فـ اتكلمت من غير ما ابصله
"بعرف اكيد."
=بتعرفي تصدعيني وبس.. تعرفي تذكري ربنا في سرك وتُسكتِ.
بصيتله بضيق
"اكيد بذكر الله.. بعدين ايه اسكتِ انتِ دي؟"
كان شكله متعصب
=أنا ماشي.. ماشي.
"ماله ده!"
طلعت لعمتي كانت قاعدة في الصالة
"ايه ابنك ده يا عمتو.. دا بدل مايشكرني اني باجي اروق البيت يعني"
-ما أنتِ عارفة مراد ياليل.. بيتعصب من أقل حاجة
"بس أنا ماعملتش حاجه يعني.. الله!"
-خلاص بقى ماتزعليش تعالي.
"لا أنا مش بزعل من مراد كده كده"
ضحكنا سوا
-ربنا يهديه ويهديكِ يارب.
"يارب يا عمتو..أنا همشي دلوقتي عشان أميرة زمانها جات من الشغل."
-ماشي ياحبيبتي سلميلي عليها كتير.
"الله يسلمك حاضر..مع السلامة"
مشيت وروحت بيتنا... مش بعيد عن بيت عمتي احنا في أول الشارع وهما بعدنا بشويتين كده.

_ها وبعدين؟
"بصلي"
_وبعدين؟
"فبصيتله"
_ها
"قام ضحك"
_وبعدين؟
حطيت ايدي على خدي وابتسمت
"فضحكتله"
_هايل يا فنانة هايل..كات بقى.
بصيتلها بغيظ
"ايه يا أميرة"
_ايه ياروح أميرة..أنا بس بقول كفاية أحلام لحد كده.
"قصدك إني بقول أي كلام يعني؟"
_لا خلاص..بس بذمتك مراد ضحكلك؟
ربعت ايدي بضيق
"لا"
_طب ابتسملك حتى؟
هزيت رجلي بعصبية
"لا"
_بصلك؟
"طب والله بص لي"
_اكيد وهو بيرمي الدبش فوق نفوخك لازم يبصلك.
"اهو أنتِ كده دايمًا، تحبي اوي تكسري مجاديفي"
حدفتني بالمخدة وهيا بتتكلم
_مجاديف ايه يا ام مجاديف مش لما يبقى عندك مركب الأول ولا حتى نرسالك على بر؟
"بر ايه؟ ايه في كلامي مش مفهوم، بحبه فيها ايه مايتفهمش؟"
_هو يا ليل..هو مش شايفك.
"ما أنا بحاول اخليه يشوفني اهو"
_غلط.. اللي بتعمليه ده غلط يا حبيبتي
"ليه بس؟"
_هقولك للمرة المليون.. عشان أنتِ يا ليل تستاهلي يتعمل عشانك المستحيل مش أنتِ اللي تعملي، ومش محتاجة تقنعي حد بيكِ.. مش محتاجة تشاوري لحد عشان تظهري نفسك، أنتِ يتمشيلك بلاد لجل نظرة بس منك.
قعدت مكاني وسِكت
_كمان كنت سمعت جملة عجبتني أوي.. المرأة في الإسلام، يُسعى إليها ولا تَسعى هي البتة، مرغوبة لا راغبة، يُخطى ليه ألف ميل،ولا تتزحزح هيا حتى تأتيها طالبًا.
"طب والعمل؟"
_ترجعي لورا كام خطوة..لو هو معجب بيكِ او بيحبك وعايزك في حياته هيسعى لده بكل الطرق الممكنة.. أنتِ تستاهلي، بعدين أنتِ نسياني بقالك فترة طويلة.
اخدت نفس وانا بفكر في كلامها
"نسياكِ فين بس.. ما انا معاكِ اهو"
_مش كنتِ وعداني فستان خطوبتي أنتِ اللي هتعمليه..كمان عمالة الف لوحدي على حاجتي وأنتِ ولا هنا.
"أنتِ اللي بتخلصي شغل وتطلعي من غير ماتقولي لحد"
_خلاص يا ستي..ابدأي بقى في الفستان عشان مافضلش غير اسبوعين، كمان كذا واحده من صحابنا سألوني وقفتي شغلك فجأة ليه؟
بصيتلها بسخرية
"كنت باخد كورس في الأعمال المنزلية عند عمتك"
فضلت تضحك وضحكت معاها من غُلبي
"بقى انا اروح اساعد امه في شغل البيت وكمان مايقوليش كلمة عدلة"
_مش قولنا خلاص بقى..ونبطل نروح عند عمتك شوية
"وصلة الرحم بس يا أميرة!"
_نبقى نكلمها في الفون ياروح أميرة.
اقنعتني بكلامها وانشغلت في فستان خطوبتها.. حاولت استعيد شغفي من تاني وارجع لشغلي وحياتي، فات اسبوع وتقريبا عمتي ماصدقت خلصت مني..لا بهزر كانت بتكلمني على طول وتسأل عني بس كنت بقفل على طول عشان مااسمعش صوته، روحنا جيبنا شبكة أميرة والعيلة كلها كانت معانا معادا هو.. اليوم كان حلو وفرحتي بيها كانت كبيرة بس كانت نقصاه فعلا.. فات إسبوعين وكنت بحاول ما افكرش فيه.