اسكريبتات

اسكريبت (٦٦) "رحمه طارق"

- ممكن الكتاب دا ؟
- نعم؟
- أنا اسف، بس محتاج اشتري الرواية الي في ايدك دي ؟
بصيتله باستغراب وكأنه مجنون مثلا.
- طب ما تشتريها، ما النسخ عندك كتير.
- مفيش غير نسخة واحدة في المكتبة دي، وهي الي في ايدك حضرتك.
ابتسمت بهدوء وقلت : 
- ايديك قُلت في ايد حضرتي، يعني كأنها مش موجودة.

بصيت للكتاب تاني، بس معرفتش أقرأ كلمة لانه لسه واقف متحركش. رفعت وشي بهدوء
- واخرتها يا زين؟
شد كرسي وقعد.
- وإخرتها معاكي أنتِ، ينفع الي احنا فيه دا ؟ بجري وراكي في كل مكان.

- مش قولتلك ملكش دعوة بيا تاني؟ متجيش ورايا في اى مكان، انساني علشان خاطري.
- انسى مين ؟ انسى مراتي !
- يا زين..
- غلطت، عارف، بس والله آخر مرة، أنا مش عارف أعيش من غيرك، بصي مش عارف ألبس ازاي، مش قادر أختار اى حاجة من غيرك، و خسيت لاني مش قادر اقعد علي سفرتنا من غير ما ابص لابتسامتك، ولا عارف انام لأن حكاياتك غابت عني .. أنا محتاج أنام يا رحمه.
- أنت طفل يا زين، طفل.

جيت أقف فوقف قدامي ومسك ايدي.
- وآية يعني، ما أنتِ دايمًا بتقولي اني ابنك البكري، فيه أم تهجر ابنها؟ هتسبيني لوحدي تاني؟ 
- أنت عاوزني علشان...
- علشان بحبك.
سكت واتهزيت لثانية.
- بحبك وبحب وجودك، بحب أقوم من النوم علي ملامحك، بحب اشوف ابتسامتك قبل ما انزل، بحب مسيدجات الواتساب الى بتطمني بيها عليا، بحب صوتك العالي وغيرتك لما بتطلع لما تسمعي صوت زميلاتي في الشغل، بحب ارجع البيت مهدود فتبطبي علي كتفي وتقوليلي بكرة تترقى متزعلش، بحبك كرحمه بكل حركة وأقل همسة تخرج منك.

بصيتله شوية، عيوني دمعت ومسكت شنطتي، بصلي بحزن، فوقفت ومسكت الكتاب من علي التربيزة وقولتله.
- روح اشتريه، خده.
- ...
- يلا اتحرك، عاوزة ألحق أخلصه قبل ما انام.
قرب خطوة وابتسم ببطء :
- يعني قصدك...
كتمت دموعي وقلت بسرعة :
- علفكرة الوقت اتأخر، يلا علشان نلحق نجيب جبنه رومي ولبن علشان انت مستهتر وأكيد مفيش أكل في البيت، وتلحق تنام علشان تصحي الساعة تمانية لشغلك و وأنت راجع...
- رحمة.
هزيت راسي بيأس وحب.
- أنا كمان مش هعرف أعيش من غيرك.
باس ايدي فابتسمت، وفجأة افتكرت قولت بغضب وغيرة :
- بس والله لو شفتك تاني مرة واقف مع واحدة كدة ولا كدة وتقولي شغل أو تعلي صوتك عليا لـ ..
- استهدي بالله.
- اخلص متجننيش، انت لسه واقف عندك مجبتش الجبنه الرومي !
- مجنونة.
شدني وخرج من المكان يضحك، وانا ابتسمت وانا ببص لجنب وشه وقلبي بيقول ..

صافيني مره وجافيني مره
ولا تنسينيش كدا بالمره
صافيني مره
وجافيني مره ⁦♥️⁩

#رحمة_طارق