اسكريبتات

اسكريبت (٣٦) "هدير هاشم"

_ هتدخليني سينما؟
_ حاضر يا تاج.
_ مش فيلم رومانسي مبحبش المحن.
_ حاضر يا تاج.
_هنقعد في اول صف.
_ حاضر يا تاج.
_ هنجيب فشار.
_ حاضر يا تاج .
_ هتدوريلي على كراش حلو و ملتزم وباد بوي ومقرمش من الجناب وبسمسم.
_ خلاص يا تاج في ايه، هو علشان سكتالك.
_ عايزة ادخل سينما.
_قولتلك حاضر خلاص بقا.
_ وعايزة كراش.
_ الله وده شغلي!
_ احيييه عليكي، أنتي مهزأه ليه؟
_ بعد كل ده، تصدقي فعلا أنا اللي مهزأه علشان مصاحبة واحدة زيك، وبطلي احيه عليك اللي بتخرج لما بتتصدمي دي. 

هي بتتعصب عليا ليه؟ مش هي المفروض صاحبي، يعني مسئولة عني وعن جناني، يبقى تشوفلي كراش، اصل عيب اكون بكتب كل قصص الحب دي وأنا لسه مش لاقية حد يكون بطل قصتي!

_ جيبتك السينما، وقعدتك في أول صف، وجبتلك فشار أهو، أي خدمة.
_ لا سوري ناقص حاجه .
_نعم يختي!
_الكراش يا مهزأة.
لفت يمين وشمال _ تالت واحد بعد اللي لابس كاب أبو شوز أبيض ده شايفاه!
_ اه، ماله؟
ابتسمت _الكراش اللي جيباهولك.
_ يع زوقك وحش.
_ الحمد لله انتي اللي رفضتي.
_ لا لا استني، بصي انتي بقا الصف اللي قدامه بالظبط، جنبة باب لسه داخله حتة بدلة كلاسيك مجننة أمي.
_ وراحت فين؟
_ معرفش بس هموت واعرف يعني.
_ تاج النحس ولا هتعرفي ف عمرك.

شوية والفيلم بدأ كان فيلم أكشن وانا كنت مستمتعة جدًا، مش من البنات اللي بتحب الرومانسي ولا بتحبذه في سينما بالأخص، في مواقف وكلام بين الأبطال بتحرج الشخص، هتحرج قدام الشعب! بالله يغم عليا.

متفهمش إزاي مع اني بتمنى أعيش قصه لطيفة زي للي بشوفهم أو بقرأهم، أو حتى بكتبهم، بس أكيد بطريقة تليق بيا، هحاول على قد مقدر مغلطش في حق نفسي.

جت الإستراحة بتاعة الفيلم، وعد خرجت برا وأنا رجعت
دماغي لورا وبصيت في السقف وبفكر مين اللي قتل!

_ اول مرة اشوف بنت مركزة في فيلم أكشن بالطريقة دي، تفتكري مين اللي قتل؟
لفيت ع الصوت ولقيته ابو بدلة _  نعم!
_ أظن إنه الظابط اللي قتل؟
_ لا مظنش، مستحيل مفيش أي دليل عليه.
قرب شوية _ وهنا حبكة الفيلم، مفيش دليل واضح بس في اكتر من سبب خلاه يقرب لحد ما اتقتل.
رديت برهبه وتوهان _ هو مين؟
_ اللي اتقتل!
_ مش كنت بتسال مين اللي قتل!
رد بصوت هادي اوي _أ ... مش عارف.

لفيت وشي بسرعة لما وعد جت وانا ببتسم، لاحظت أن خدودي احمرت وضحكتي ظهرت، وده مبيحصلش الا لما اتكسف، معرفش ليه بضحك بالطريقة دي لما بتحرج وتلقائي ايدي بتوصل لوشي بس معنديش تفسير غير اني مبقدرش اتحكم في نفسي وقت ما بتكسف.

_ هل ده تأثير وجود البدلة ولا في تطورات.
_ تطورات كتيييييير.
_ نهرب من الفيلم؟
_ لا استني لما اعرف مين اللي قتل.
_ وده وقته يا تاج.
_اهدي بس.

كنت قاعدة متوترة من كلامه ومن الفيلم، أصل أنا شخصية بتهتم بالتفاصيل شوية، اي كلمة بتخطفها، بفضل افكر واحلل الموقف بطريقة مرعبة، ممكن تبقى كلمة عابرة أو عفوية منك بس بتبني أو بتهدم حواجز عندي.