اسكريبتات

اسكريبت (٤٦) "هدير هاشم"

غمضت عيني مع صوت المطر الممزوج بصوت صواريخ في السما، بداية سنة جديدة، وخطوة جديدة لتحقيق حلم.

اتنهدت بابتسامة_ بنوتة جميلة وقوية شبهي، لسه عارفه انها عندها جناحات وتقدر تطير.
رجعت بصيت في الفون لـ "عُدي"_ مش فاهمة ايه الفكرة إنك تكلمني دلوقت فيديو؟
_ يبنتي لقيت محدش عبرك وسينجل بائسة زي حالاتي قولت ادخل السنة الجديدة بيكي.
عدلت الاسدال وقعدت في البلكونة في البرد_ مبحبش بداية السنة، مبحبش احس ان عمري بيجري، ومبحبش البرد، بس هو طبيعي كل حاجه مبحبهاش تتجمع كده النهاردة!
بصلي بانتباه_ قصدك ايه يتاج ها؟

ضحكت من قلبي لأنه فهم غلط، بالعكس أنا بحبه، وبحبه جدًا، ومش متخيلة إزاي حياتي هتكون من غيره في يوم!
عرفاه من عُمر، يمكن أكبر إنجاز في حياتي هو وجوده، رغم أنه قريبي، وانا ليا قرايب كتير، بس هو الوحيد اللي سمحتله يقتحم حياتي...

_ ذاكرتي؟
_ طب والله والله انا ما عارفة اركز بربع جنيه.
_ خايفة؟
_ عيب السؤال ده خد بالك، انا مرعوبة
ضحك_ ننزل الكورنيش؟
_ عُدي يا حبيبي انا متفهمة طبعا انك بتحاول تساعدني بس مين العبيط اللي ينزل في الجو ده!
ضحك_ طب ربع ساعة وتكوني هناك، هجيبلك ايس كريم.

اتنهدت، غمضت، ابتسمت وفرحت لبست بسرعة ونزلت، فكرت كتير  وانا ماشية، هو الإنسان ليه بيحب؟ يعني ليه انا ممكن أحب حد وأدخل حد في حياتي وهي فيها عدي وبابا؟
الحالة اللي بكون فيها مع عدي سعيدة لأنه فاهمني طول الوقت من غير ما اتكلم، واللي بكون فيها ملكة لما بكون قاعدة مع بابا، عارفه أنه شيء مهم، ولكن ممكن يتأجل، نأجله لحد ما عدي يلاقي اللي يرتبط بيها. ايه ده هو ممكن يحب حد ويرتبط بحد وكده!؟

_ قالبة وشك ليه يا نكد؟
_ هو سؤال وترد بصراحة، أنت بتحب؟
_ انتي سخنه يا تاج؟ جالك برد ولا ايه!
_ ولا رد يالا.
_ ولا؟ ولا! ماشي لا يستي مبحبش ومش هحب، وبعدين انتي مكرهاني في الصنف كله ربنا يحميكي.
_ أيوة كده، طب والله انا عملت شيء مفيد وخلصت البشرية منك.
صوت الرعد ظهر فصرخت ووقفت وراه، ضحك_ اللي يشوفك كده ميشوفكيش وانتي بتقوليلي انا قوية يا عدي.
رفعت راسي بالراحة _ طب على فكرة بقا انا قوية، بس بخاف، اصلا مفيش إنسان في العالم معندوش نقطة ضعف أو شيء يخاف منه، حتى أنت؟
_ بس أنا معنديش شيء أخاف منه، انا عندي شيء أخاف عليه.
بصيتله شوية، بحب لمعة عيونه، بحب وجوده عمومًا_ فين الايس كريم؟
_ مفيش انتي هتتعبي منه.
_ بتكدب عليا؟ بتخدعني!
_ هو انا وعدتك بالجواز وخلفت وعدي!

مهي واحد، يكدب في الايس كريم يكدب في اي حاجه، بس هو لذيذ، باد بوي كده على جود بوي، هو تركيبة شرقية اصيله وقمر، بحب وجوده علشان بكون على راحتي، مش مضطرة اشرح انا عملت اي حاجه ليه لانه فاهم، وبيبقى اصعب موقف لما نتخانق، انا مش عايزة ابعد عنه، مبحبش ابعد عنه..