اسكريبتات

اسكريبت (٧٣) "رحمه طارق"

- الحقيني، الحقيني بسرعة.
- ادخلى عليا بالنصيبة، هاتى تاريخ النصيبة من أولها.
- لا مش قادرة اخد نفسي استنى
- اقعدى طيب واشربى ماية واتنيلى احكى.
شربت ماية وقعدت - شوفتي الي حصلى يا اسماء! الدنيا كلها سبت وحد وانا بختى موردش علي حد.
- يا استاذة تحية كاريوكا أنا من حقى اعرف فين المشكلة؟
- بصى، بس والله ما كنتش اقصد، كان فيه واحدة صاحبتي متكلمناش بقالنا فترة فرنيت عليها اول امبارح مردتش، لقيتها النهاردة باعته مسدج من رقمها التانى بتقولى " السلام عليكم  " قولت تبقي مقموصة وانتى عارفة أنا خلقى ضيق فقولت أنهى العتاب وندخل بدخلة تثبيت من بتاعه أسر ياسين وكتبتلها " بحبك يا بطل " بس كدا وقفلت.
- طب جميل واثبتت؟
- أو اتثبت
- نعم!
- اكيد الحياة مش هيبقي لها لون تاني غير لون السواد معايا، لقيت مسدج بعد شوية مكتوب فيها " مش تعرفى أنا مين الأول يا قلب البطل؟ " مدتش الموضوع أهمية وقولتلها مالك يابت ريهام بلاش هزار بقي عاملة أية؟ لقيت بعدها رسالة بسيطة كافية اوي لاحداث جلطة قلبية مكتوب فيها " أنا مش ريهام! انا زين اخوها "
برقت - رحمة انتى...
- أنا قولت لراجل بحبك، ادركتى الخيبة؟

طبعا رد مهزأ من صاحبة مهزاة فضلت نص ساعه بتضحك وتعيط - لا لا مش قادرة شكلك فانلة مقطعة
- أنا شكلى فانلة منيلة.
- حصل.
- عارفة أية المشكلة؟ أنه قالى مش هتعرفي أنا مين الاول ؟
- يا حبيبي اتصدم داخلة بالحب مرة واحدة، فرفر منك.
- اكيد كان عاوز يقول طب نتعرف، نلطف، نشرب حاجة، اصبري نغير علي بعض، لا انا بحبك خبط لزق كدا !
- يا فضحتك يا دودى، هتكتبوا ورقة عرفي أمتي؟
- طب خدى بقي نصيبة كمان
- أية؟ والله كان ناقصني شوية ضحك في حياتي
- البيه دخل و كتبلي " مدام فيها حب خبيث ومشاعر مستخبية  والله لو شايفة نفسك زوجتى المصونه أنا معنديش مانع، بيتنا له باب وعندى اب يسد عيش الشمس، ها هتجيبي بابا وتخطبينى امتي؟ "
- الراجل اتكشف عليكي، لازم تصلحي غلطتك، كله إلا الشرف.
- كان يوم مطلعلوش شمس يوم ما رنيت عليها و فكرت في الود، خرجت منه بفكر في نص ديني، اقولك بقي نصيبة اكبر من كل النصايب الي فاتت؟
- أية تاني يا قلب البطل
- أن البطل بذات نفسه معانا في الجامعة في سنه رابعه، نرغرط علي مواقفي الزبالة بقي.
- مش معقول كل خازوق اروع من الي قبله، دا لو شافك مش هيعتقك.
- دا لو بقى، ما احنا في حظر وبأذن الله نموت كلنا.
- طب بقولك أية بقي، انتي لبستي لبستي، متوريني الاكونت بتاعه كدا؟
- ثواني.
فتحت الاكونت، بصتلى وبصت الصورة ورجعت بصتلى تاني بنظرات مريبة مش مفهومة - في أية؟ وحش؟
- أنا عاوزة أسألك سؤال واحد بس
- اسالى
- هتاخدى ابوكى وتطبلوا ايد الراجل أمتى؟
- يا اسماء ارحميني، بقولك مش سايبني في حالى، أنا بقيت مسخرته، البيه كل شوية ينزل بوست ويلحق عليا.
- وانتي عرفتى منين؟
- مانا عملتله فولو
حطت أيدها علي وشها بتركيز - ومعملتيش بلوك لية؟
- بصراحه كدا..
- ها
- مقدرتش
- لية؟
- بيضحكنى.