اسكريبتات

اسكريبت (١١) "آية الإبشيهي"

"22 ديسمبر 2020""

=دا بيتها يا جدي؟!
_ايوا يا زين.. الشباك اللي فيه الورد ده شباك أوضتها
=اللي هناك ده!
_ما تشاورش يا زين لحد يشوفنا
=هيا لسه عايشة!
_ماتت من سنتين
=فضلت في البيت هنا!
_ايوا كانت متعلقة بالنيل والورد اللي في شباكها
فضلنا قعدين علي كورنيش النيل وباصين علي بيتها لحد ما قطعت الصمت
=هو فات قد ايه!
_علي ايه يا بني؟
=علي بعدكم!
_35 سنة..أول مرة شوفتها كنت قاعد هنا والفرحة مش سيعاني لما اتقبلت في الوظيفة..كانت ماشية آخرالشارع ده و لسه راجعه م الكليه وقتها السما مطرت جامد وروحت وقفت تحت بلكونة..شوفتها وهيا وقفة تحت المطر وبتضحك

تابعت عنيه للمكان اللي بيبص عليه كنت حاسس انه عايش اللحظة وهو بيحكي
_وقتها مااقدرتش انزل عيني من عليها.. فرحتي زادت مش عارف ليه واتمنيت للحظة إني اقدر اقف جانبها تحت المطر ونضحك سوا، شوية ولقيت شاب قرب منها وبيبتسم لها ولبسها الجاكت بتاعه
=خطيبها؟
_اخوها.. وقتها شدها وهيا بتضحك ودخلوا البيت ده، فضلت واقف لحد ما المطرة بدأت تخف ومشيت بس التفت تلقائي للشباك ده ولقيتها واقفة وفاتحة دراعاتها
=شافتك!
_مش عارف..بس كانت جميلة جدًا،كانت تدخل القلب علي طول
=واتقبلتوا بعد كده!
_كنت دايما امشي من الشارع ده لأجل مااشوفها..وكل مرة بشوفها فيها بحسها اتمكنت من قلبي،مع أننا مش بنتكلم..لحد ما اتجرأت وروحت اتقدمت لها
=وايه اللي حصل بعدها!
_النصيب يا بني..اتقدمتلها أربع مرات وكنت بترفض، كان بيبقي عندي أمل لأن الرفض مش منها
=وأهلها كانوا بيرفضوا ليه؟
_ابن خالها كان متقدم لها وبيحبها وكانوا مستنيين ينزل من السفر
رجعنا لسكوتنا وفجأة لقينا الشباك بيتفتح وخرج راجل في سن جدي تقريبًا كان بيسقي الورد الموجود
=دا..
_دا اللي خطفها مني زمان وبيراعي الورد اللي كان نفسي ارعاه انا
=شكله كان بيحبها اوي عشان يفضل كل يوم يسقي الورد وما يملش حتي بعد موتها
_ومين مايحبهاش
=وجدتي!
_كانت دوا أيامي ولياليّ.. صرحتها بكل حاجه وعوضتني عن كل حاجه والقلب اللي كنت فاكر انه مش هيحب تاني مابقاش يقدر يعيش من غيرها..والورد اللي كنت فاكر انه اتسرق مني جابتهولي وخلتني ارعاه وزرعتلي البيت كله ورد
_بس أوقات الواحد يا بني بيحن للذكريات اللي فاتت بيحن للحظة كان فيها مش شايل هَم حاجه..بس دا مايمنعش اني عيشت مع جدتك كل أيام الحُب والسعادة
رجعنا بصينا للشخص اللي واقف بيسقي الورد وصوت جدي بيدندن وبيضحك
"آية الإبشيهي"