نيران العشق

الحلقة 92

ال20:30 فالقرية..
كامل قاعدين فالسطح يشربو فلاتاي و يقسرو غير هي تدور فالكوزينة تحوس على ماكلة تديها باش تكمل سهرتها معا لاسيري تاعها..شعرها لاماتو لفوق بطريقة عشوائية..بيجاما عريضة فالغوز..تمشي حفيانة..اول ما خرجت مالكوزينة رافدة الماكلة فيدها دق بالباب..طلت عليها لالة خديجة ملفوق..
خديجة: شوفي شكوون جا دك
قربت للباب فتحتها..عينيها خرجو و هي تشوف فيه..لي كان فيدها كامل جا عالارض..(اتخيلو غنية شابة😂)..رمشت عينيها تحاول تستوعب لي تشوف فيه..واقف قدامها لابس كوستيم نواغ شايد بوكي تاع ورد فيدو و بواطة حمراء تاع شيكولا..واقف موراه واحد من كبار مجلس القرية و مرتو..
رائد: راح تخلينا واقفين عند الباب ؟
حركت راصها بالزربة تفيق فروحها..
مروى: واش راك دير هنا هبلت !!
تبسم على جنب و همسلها..
رائد: مهبلتش جيتك مالباب برك..
خالد: مررروى واش صااري هناا
تهزت و تنفظت..تلفتت ليهم بالزربة..لحقو يهبطو..
احمد: واش كاين..
مروى: ا..انا ب..بابا
قبل ما تلحق تكمل بعدها من قدامو و دخل و دخلو موراه..حكى الشيخ لي معاه..
_سي احمد حنا هنا باش نطلبو يد بنتكم لهاد الولد
فمها تحل..ملامح الصدمة ترسمت على وجوهم كامل..فالوقت لي رائد تبسم بانتصار فوجه سي خالد لي وجهو تزير..سرعان ما تبدلو ملامحهم وقت ستوعبو لي صار من غير السي خالد لي عينيه منزلوش من رائد و مروى لي مزال تحت الصدمة..
_مراحش تضيفونا !
احمد: لا حاشاا تفضلو تفضلو..
قرب رائد لعند لالة خديجة عطاها الورد..شداتو من عندو..
خديجة: مدام ناجية تفضلي اقعدي متبقايش واقفة
قرب رائد عن سي خالد..وقف في وجهو يحكي بهدوء..
رائد: يمكن اكبر غلطة درتها فحياتي هي وقت ستنيتك خرجت مالدار و حكمتك وحدك باش نسألك ادا نجس نطلب منك يد بنتك من 3 سنين و نتا ببساطة قلت لالا..و كيما راك تشوف انا منعاودش الغلطة مرتين هاد المرة جيت بلا مقدمات..
خالد: علاه وليت مدام قتلك لالا ي..
رائد: نتا قلت لالا لهاداك لي معندو حتى فرنك في جيبو..لي راهو قدامك دك راجل قادر يمحيك بكل بساطة..و شايف لي راهم هنا ! كلهم تقبلو الخطبةو جاتهم نورمال..احسنلك حتى نتا تتقبلها خاطر هاد المرة انا مستحيل نتراجع..
بلع ريقو بالسيف..عض شفتو بقوة..عارف انو دك مراحش يقدر يرفض خاطر الموضوع دخل فيه واحد من كبار القرية..ڨحر لرائد و تقدم جيهة سي احمد و منصف و الشيخ..
عملت لالة خديجة اشارة لمروى براصها..
خديجة: مرررروى القهوة
رمشت عينيها مرة وحدوخرا..مشي مصدقة واش صرا..من 5 دقايق تقريبا كانت كيف المتشردة المعاقة عاطفيا تستنى فحلقة المسلسل تاعها باش تتفرجو و دك تقلت الدار و رجعت خطبتها..و من شكون ؟! من لي عشقاتو و مزال تتنفسو و راح و خلاها من 3 سنين بلا سبب مقنع..تلفتت ليها هو و ابتسامتو الساحرة على وجهو..فخور و راضي عاللي دارو..غمزلها و همسلها بهدوء..
رائد: القهوة عمري..
خذات نفس طويل..و تمشات بسيف للكوزينة و هي تمتملو..
مروى: راح تندم عاللي درتو
تبسم على جنب..عارفها مراحش تقدر تقول لالا بحضور واحد من لكبار و انو هاد الخطبة الليلة راح تم..و حتى عارف انو هي حابة الشئ هادا..
★★★