نيران العشق

الحلقة 8

قاعدة عالسرير..ضامة رجليها لصدرها..راصها مرجعاتو للور عينيها حمورا محوقين..شعرها داخل بعضو و حالتها تسخف..تفتح الباب منزلتش راصها عارفاتو هو..3 ايام كاملين هنا اصلا بدات تتعود يجيبلها الماكلة و يروح قاومت فالاول و محبتش تاكل و بعدها استسلمت خاطر عارفة هاد الشي مراحش ينفعها..مبقاش عندها حل غير تستنى نهايتها و لا الفرصة باش تسلك روحها..حتى من التاقة تاع ابدوش غلقها بالحطب..
حط الماكلة عالارض اول ما تلفت باش يخرج حكات..
عايدة: مفاقش ؟
تلفت لعندها عاقد حواجبو..نزلت راصها ليه..طاحت عينها فعينو..
عايدة: منصف مفاقش ؟
ايهاب: قتلك اتعلمي تصبري كل حاجة فوقتها حلوة
بلعت ريقها بالسيف..عالاقل مقالش انو مات..
عايدة: حبيت ندوش
طلع حاجبو ببرود..
ايهاب: تحبي نديك للحمام و نكريلك كياسة ؟
قلبت عينيها منو..ڨحرلها و رجع هو خرج و خبط الباب موراه..سباتو بين شفافها..رفدت روحها وقفت بالسيف..شافت معا هاداك الطبسي عالارض..
عايدة: ### ##
دخلت لدوش..مكاين لا شومبوان ولا صابون ممخلي والو..تنهدت معندهاش حل وحدوخر..نحات حوايجها حطتهم فلافابو باش تغسلهم و دخلت تحت العين..حطت راصها عالحيط البارد..جسمها قشعر و دموعها نزلو..تعدات صورة باباها بين عينيها شهقاتها طلعو اكثر..لاكثر من نص ساعة و هي فهاديك الحالة..رمات يدها للعين غلقتها عدات يديها على وجها..تمتمت بين شفافها..
عايدة: نوعدك اني راح نخلف الثأر حتى ادا كانت اخر حاجة نديرها فحياتي..
رجعت مسحت دموعها بالزربة و خرجت ملتم لفت المنشفة على بدنها و نشفت شفرها بالتريكو لي كانت لابساتو خاطر لقات غير منشفة وحدة..غسلت حوايجها بالزربة و علقتهم فوق الباي باش ينشفو و تلبسهم قبل ما يرجع ليها..
خرجت مالدوش..تمشي بالسيف باش تروح لسرير..حبست وقت طاحت عينها عالباب بالضبط فالشق لي مابين الباص و الكادر..عقدت حواجبها..بلعت ريقها بالسيف و قربت للباب تزرب فخطواتها تحب تتأكد ملي شافتو..حطت يدها عالباص و نزلاتو بلعقل..قلبها ضرب بالقاوي وسط ضلوعها وقت تفتحت و تبسيمة عريضة ترسمت على وجها..مشي مصدقة انو نساها مفتوحة..
مفكرتش مرتين..كملت فتحتها بلعقل و خرجت راصها طل ادا مكاين حتى واحد..قابلوها الدروج لي يطلعو لطابق الفوقاني..تمتمت بين شفافها و هي مزال مشي مصدقة انها راح تسلك..
عايدة: ضحكتلي الدنيا..متضيعيش الفرصة عايدة جاتك ليدك..
دارت اول خطوة لبرا البيت و قلبها يدق بالقاوي..اول ما حست بالامان عطات الريح لرجليها..تزرب فخطواتها باش تخرج من هاد الجحيم و ناسية اصلا انها خارجة شبه عريانة بمنشفة مغطية اللازم فاللازم برك و حتى ناسية انها حفيانة و مفكرتش كيفاه راح تخرج مالدار..تصرفت من غير تفكير همها الوحيد كان انها تخرج..
★★★