نيران العشق

الحلقة 34

بعدت للور بالزربة..ترعش من الخوف..الرصاص قالب الدنيا و هي كيف الضائع مفاهمة والو..تشوف يمين و يسار..مصدومة..عينيها يحوسو عليه..تستنى فيه يخرج من كاش بلاصة يقوللها انو هو معاها..تهزت و تنفظت وقت تفتح الباب بقوة..عينيها وساعو..تلفتت بالزربة..قابلها واقف عند الباب يلهث..لسقت فالحيط موراها..
عايدة: ش شكون نتاا
_مدام عايدة مشي وقت الاسئلة خلينا نخرجو من هناا
بلعت ريقها بالسيف و هي مركزة معاه..شوية دم نازل من راصو..شايد جنبو و سلاحو فيدو و باين عليه التوتر..عرفها مشي واثقة فيه..تنهد يحك بهدوء يحاول يطمن فيها..
_انا من رجال الحراسة تاع مسيو ايهاب عملولو فخ و بعدوه عالدار مدام عايدة لازم نخرجك منا بخير ثيقي فيا م..
قبل ما يكمل يحكي رجعت ضربت رصاصة وحدوخرا الزجاج..
عايدة: ااااه
من غير ما تفكر رمات يدها ليه..كبس عليها و تنهد براحة و جرا و هو شادها من يدها..تجري معاه و مشي عارفة ادا لي دارتو صحيح و لا غالط..لي يهمها دك انها تخرج من الدار هادي لي ردوها كي الكسكاس بالرصاص..ضرب باب الكوزينة الخلفي برجلو و خرج و هو يجري و هي تجري موراه و تلهث..فتح باب الطونوبيل لي كانت تستنى فيهم..
_اطلعي اججري
طلعت بالزربة..خبط الباب و لحقها..اكسيليرا دارو الروادي فالهواء و تكرطت الطونوبيل و طار بيها..تهزت و تنفظت فبلاصتها..شافت موراها..الدار وسط الظلمة و غير اضواء الطونوبيلات مضويينها..رجعت تبان كيما الديور لي فافلام الرعب..صوت الرصاص مزال يتسمع فهمت انو مفاقوش بلي الدار فارغة..تنهدت..جسمها كامل يرعش..مشي مصدقة انها خرجت حية ملتم..فمها محلول من الصدمة و وجها لونو مخطوف..رجليها مشي قاعدة تحس بيهم..رجعت تلفتت ليه..بلع ريقو و هو يشوف فيها هكاك..الخوف باين فعينيها..
_راكي مليحة ؟
هزتلو براصها ايه..تحكي بالسيف..
عايدة: وين..وين راه ايهاب ؟
_عملولو فخ باش يخرجوه مالدار عيطولو من رقم تاع المحامي تاعو قالولو انو مطلوب فالمخفر بسبة خدمتو كي راح لتم ملقا والو عرف انو فخ كي فاق كان فات الاوان..عيطلي و قالي خرجها ملتم بأي ثمن
بلعت ريقها بالسيف..مشي عارفة فواش لازم تركز بالضبط فكامل واش قال..فكلمة فخ ولا فقضية انهم خرجوه مالدار باش تبقى وحدها ولا فخدمتو لي مشي عارفة اصلا واش يخدم و عمرها ما فكرت فهاد الشي و لا فقضية انو خمم فيها و طلب منو يسلكها باي ثمن ؟؟..الامور كامل دخلو بعضاهم فعقلها..معاد فهمت والو..الحاجة الوحيدة لي قدرت تفهمها انها هي لي كانت مستهدفة مشي ايهاب..قلبها تحس فيه راح يخرج مبلاصتو..صبعتيها يرعشو وحدهم من الخلعة لي كلاتها..فاقت من سرحتها وقت شد فران بالقاوي..راحت للقدام و رجعت..
_مسيو ايهاب
على كلمتو طلعت راصها بالزربة..طاحت عينها فعينو و هو فالطونوبيل..قاطعلهم الطريق..عينيها تعمرو بالدموع وقت شافتو..
عايدة: اي..ايهااب
فتح الباب بالزربة..نزل رجليه اعلى من راصو..ما لقاتو غير عند باب الطونوبيل جيهتها..تلفتت ليه بالزربة..فتح الباب بقوة..يتنفس بالقاوي..
ايهاب: عايدة
دموعها نزلو يحرقو..من غير ما يفكر جبدها ليه بالقاوي جات وسط صدرو لعريض كيف القطة..
ايهاب: راكي مليحة !! قاسوك ؟ عملولك حاجة !!
مردتلوش..قوات فالبكاء اكثر كانها كانت تستنى فيه معا انو عقلها قاعد يقوللها تتلاح عليه تضربو..حكات وسط شهقاتها
عايدة: خ..خفت بزااف
كبس عليها اكثر وسط يديه..عض شفتو بغزول يسب بين شفافو و يتوعد فلي عملها الا ما يلقاه..
★★★