نيران العشق

الحلقة 66

مروى: واش من دواء ؟
مردتلهاش..قربت تجري لقجر لاكوافوز تحوس عليه و مروى تسوف فيها مفاهمة والو..جبدت حبة منو بالزربة..تشوف فيها و تتفكر فلي صرا فيها كي شربتها..رجعت تلفتت عند مروى..
عايدة: مروى ادا طلبت منك حاجة تديريهالي ؟
هزتلها براصها ايه و هي مشي فاهمة..قربت ليها شدت يدها و حطتهالها فيدها..
مروى: واش هادا ؟
عايدة: تعرفي اني منقدرش نخرج..نحبك تروحي للفارماسيان تسقسي على هاد الدواء
مروى: كيفاه نسقسي عليه ؟
عايدة: واش يدير و من وتش مخدوم و شكون يشربو و ليمن يتباع..كلللش
مروى: علاه !!!
عايدة: ديري لي قتلك عليه و نحلفلك كي تجي نفهمك..
شافت فيه شوية..كبست عالحبة فيدها..
مروى: راح نعمل لي تقولي عليه..بصح وعديني تحكيلي
عايدة: وعد..يصح وقت ترجعي ردي بالك يشوفو ايهاب عندك ولا يعرف وين كنتي
مروى:مراحش نسقسيك علاه..كي نرجع نسمع منك كلش.. راح نشوفو اخرتها معاك
عايدة: هايا بالزربة قبل ما يولي
طلقت يدها و خرجت من عندها تجري..بلعت عايدة ريقها..الفكرة برك دخلتها بعضها..عضت شفتها بتوتر..
عايدة: زعما يكون لي فبالي..
هزت براصها لالا بالزربة..
عايدة: ادا صح كيما متوقعة معنتها ادا نحيتهولو يرجع انسان طبيعي !!!
رجعت هزت براصها تبعد فالافكار..نفخت بالقاوي و رجعت لهاديك الماكلة تفرغ فيها توترها..
~•~•~•~•~•~•~•~•~•
رايحة جاية فالبيت..كل مرة تشوف فالساعة..تعدات اكثر من ساعة و نص ملي راحت مروى..نفخت بالقاوي..مبقاتش قادرة تصبر كتر..قربت للباب باش تخرج..اول ما رمات يدها باش تفتحها تفتحت..
عايدة: ااه جيتي..كنت خارجة نحوس عليك
مردتلهاش..وجها صفر و كابسة عالدواء فيدها..
عايدة: و واش بيك ؟؟
تنهدت و دخلت و غلقت الباب..رجعت عايدة للور..
عايدة: مروى متخوفينيش اهدري
قربت لسرير قعدت..عمرت من قرعة الماء لي قدامها شرباتو فرد مرة..
مروى: ارواحي اقعدي
قرت قعدتها قدامها..شدت الحبة من يدها..
عايدة: مروى والله بديت نخاف اهدري
مروى: مهدئات
عايدة: عارفة
مروى: مشي أي مهدئات
عقدت حواجبها تستنى فيها تكمل..خذات نفس طويل و رجعت حكات..تحكي و ترعش
مروى: فيهم كمية من الكوكيايين..يقتلو الاحساس و الجزء المسؤول فالعقل على ردات الفعل..علاهاديك ردات فعلو لا مبالية و متباعوش وين جات اكيد عطاهملو طبيب..
تنهدت عايدة بالقاوي..
عايدة: عرفتها
مروى: كيفاش زعنا كان علابالك ؟
هزتلها براصها لالا..
عايدة: لالا بصح توقعتها
مروى: واش نديرو دك ! عايدة انا منقدرش نسكت على حاجة كيمت هادي
رفدت روحها وقفت و تلفتت للكوافوز بالزربة تحكي و هي تتمشى ليها..
عايدة: شكون قالك راح نسكتو
مروى: واش راح ديري ؟؟؟
مردتلهاش..فتحت بواطة الدواء و فتحت بواطة تاع دواء تاع الراص..قلبت الكاشيات خاطر متشابهين و رجعت غلقتها و حطتها..و رجعت لعند مروى..حطت هادوك لي داتهم فبابيي و غلقاتو..
عايدة: شدي هادا ارميه فتوالات كي تخرجي منا نخاف نرميه هنا يفيقلي
بلعت ريقها و شداتو من عندها..
مروى: تعرفي انو احتمال يكون عندو كاش مرض ! مكاش كيفاه يمدلو طبيب دواء بلا سبة
تنهدت..مشي حابة تبين توتر تاعها قدامها..تحاول تهدي روحها حتى هي..
عايدة: راح نحاول نعرف كتر..مادام بعدنا هاد السم فلي بقى ساهل
مروى: مشي عام و مشي عامين و مشي ثلاثة و هو يشرب فيه..اتخيلي يصراولو مضاعفات بسبتنا كي نحيناهولو !
عضت شفتها..مشي حابة تخمم فهاد الاحتمال..كيما مشي عارفة كيفاه خرجت الهدرة من فمها..
عايدة: مراح يصرالو والو انا معاه
ايهاب: شكون لي ميصرالو والو و راكي معاه؟
عينيهم وساعو فيزوج..تلفتو بالزربة جيهة الباب..محسوش بيه وقت دخل..وجوهم صفارو فثواني و هو قارن حواجبو يستنى فيهم يحكو..
★★★