نيران العشق

الحلقة 93

فاقت صباح على صوت تيليفون يصوني بصح مشي مستوعبة ادا راهي تنوم ولا صح..اول ما فتحت عينيها طاحو على بلاصتو الفارغة..رفدت روحها ملفراش تقعدت..قلبها تزير عليها..حسسها كأنو جابها من قريتها لهنا باش يخليها وحدها..حطت يدها على كرشها تواسي فروحها بوليدها..رجع صونا التيليفون..تلفتت جيهة الطابل دو نوي تحوس عليه..رفداتو..
عايدة: الو..
مروى: الو..عايدة تسمعي فيا ؟
منصف: الووو
ستغرب وقت سمعت صوتهم فيزوج..
عايدة: وي راني نسمع فيكم ! واش كاين ؟!
منصف: قولي فالاول الطبيب هاداك رحتي ليه ولا مرحتيش !
عايدة: مزال راح نروح ليوم..
مروى: متروووحيش
عايدة: علاه !!
منصف: لحقني خبر ليوم بلي راهو فالحبس
عايدة: طبيب فالحبس !! علاه فهموني بلعقل متهدروش فيزوج..
منصف: وي خاطر يمد لمرضاه ادوية ممنوع تتعطى
مروى: كيما لي مدو لايهاب..
منصف: ايهاب مجرد مريض باليكسثيميا و هادي مشي حاجة خطيرة مقارنة بحالتو عادية..برك لي كان مأثر عليه هو الدواء هاداك و رانا بعدناه عليه
رمشت عينيها شحال من مرة..تحاول تستوعب لي قالو..اليكسثيميا..الحاجة الوحيدة لي تعرفها على هاد المرض انو المريض بيه ميقدرش يفرق بين احساس الحب و الكره يعني حتى وقت يحب ميعرفش يعبر فاقد عدة احاسيس..
عايدة: م منصف متأكد ملي تقول فيه !
منصف: وي الطبيب عترف لواحد من معارفي بنفسو..هادا يفسر كلش..
عايدة: ا ايهاب علابالو !
مروى: اكيد علابالو..بصح قالك منصف مشي حاجة غير طبيعية خصوصا معاك نتوما عايشين حياة طبيعية متخليش هاد الشئ يدير حاجز بيناتكم..تعايشي مهاه كأنو مكاش..
عايدة: نحكو منبعد..
كوبات فوجهم..تشوف فالتيليفون و مشي مصدقة..توقعت كلش غير هادي لالا..لي سمعاتو دك يفسر الف حاجة و حاجة..تصرفاتو المتناقضة لي مقدرت تفهم منها ادا يحبها و لا يكرها..برودو..وجع راصو كي حبستلو الدواء..و حتى كلامو تاع البارح كي قال مشي نادم..تمتمت بين شفافها و الدموع مجمعين فعينيها..
عايدة: مشي ذنبو..باباك مشي ذنبو لي عملو فينا..
رفدت روحها بالزربة..لا عارفة كيفاه لبست و لا عارفة كيفاه خرجت مالدار و ركبت معا الشوفور..كامل لي يهمها انها توصل ليه..تحكي معاه..تلومو خاطر خبى عليها و بعدها تعنقو..حابة تحكي معاه..حاباتو يحكيلها و يشاركها..و بعدها راح تسامحو..راح تخلقلو الف عذر..المهم يصارحها..طريق كامل دموعها منشفوش..تستنى غير وقتاه توصلو..تكات لتالي فطونوبيل..غمضت عينيها و تمتمت بين شفافها..
عايدة: يمكن يكون يحبني و هادي طريقة تعبيرو..
★★★