نيران العشق

الحلقة 45

اول ما دخلت قابتلها رايحة جاية فهاديك لاكوغ..
مروى: ااااه جااو جاااو
عقدتحوابجها مشي فاهمة..قربت ليها مروى تجري..شدتها من كتافها تتفحص فيها..تحكي بالزربة و بتوتر..
مروى: راكي مليحة ؟؟ واش صرا ؟ وين كنتو !! تخلعت عليكم بزااف كي ملقيتكمش فالبيت حسابتلي كشما صرالك
شدتها من يديها..نزلتهملها بلعقل..تهدي فيها..
عايدة: انا مليحة..مصرالي والو..
تنهدت براحة..شوية و تلمو كامل لتم..تفتح الباب..طلعت راصها ليه
مروى: ايهااب كيفاه تخرج هاكا من غير ما تعلمنا..متنا من خوفنا
قلب عينيه و غلق الباب موراه..رجعت حكات..
مروى: راني نهدر معاك..وين كنتو
قبل ما يحكي..جاوبتها عايدة..
عايدة: حبيت نتأكد اني صح حامل..رحنا لسبيطار عملنا ايكو..
مروى: احللللفي درتي ايكوو وريهوولي
سكتت شوية..شاف فيها عاقد حواجبو..فكرخا تكدب..رجع حكى و هو يقرب ليها..
ايهاب: مشي دك مروى..اومبعد و تشوفيه
شدها من يدها..شافت فيه..حركت صبعتيها شوية وسط يدو باش يطلقها..ڨحرلها و كبس عليها اكثر..
مروى: اوكي معليش..نضتو بكري روح كمل رقادك ادا حبيت
هزلها براصو ايه..تبسمت معا عايدة لي ردتلها التبسيمة بالسيف و جبدها موراه طالع..
تعدا على منصف و لالة خديجة لي واقفين يشوفو فيهم فسكات..غمز منصف لايهاب لي تبسملو على جنب و طمنو بعينيه..تنهد منصف عرف انو كلش بخير من تبسيمتو..سفق بمرح..
منصف: هايا دك راهم رجعو بخيير و راني جعت حطولنا لفطوور اخرجو من تحت الصدمة هاياا..
ضرباتو لالة خديجة على كتفو..
خديجة: روح اقعد روح دك يوجد
ضحك معاها و قرصها من خدها و راح..قلبت عايدة عينها منهم و هي تشوف فيهم فالوقت لي ايهاب يجبد فيها للبيت..فتح الباب..نطرت يدها منو و دخلت..رمات صاكها عالسرير تفتح..و وقفت تنحي فالفاست تاعها و تفتح فشعرها..قرب لسرير قعد على طرفو..يفتح فسباطو..بالصدفة طاحت عينو على صاكها المفتوح و الورقة لي خارجة منو..عقد حواجبو..رمى يدو ليها..صبعتيه رعشو وقت شافها..قربها لعندو..شدها بزوج يدين..ابتسامة عريضة ترسمت على وجهو و هو يشوف فالايكو تاع البيبي..عدا ابهامو بلعقل عليه..مع انو مفهم فيه والو..بصح حاجة داخلو تحركت..تمتم بين شفافو..
ايهاب: عمرو 3 اسابيع
تلفتت ليه بالزربة..قرنت حواجبها بغضب..و قربت ليه خطفاتو من يدو بقوة..طلع راصو ليها..
عايدة: بواش من حق تمس دوزاني
طلع حاجبو بتمڨعير يحكي ببرود..
ايهاب: دوزانك ؟؟
عايدة: ايييه
ايهاب: شكون خدمو..انا ولا نتي ؟
وجها طلع حمممر..كبست عليه بيديها..ڨحرتلو تحكي بغزول..
عايدة: هادااا وليدي انا ! تفهم واش معنتها وليدي انا ؟ معنتها تااعي هو فداخل تااعي انا
تبسم على جنب..يلعب باعصابها..
ايهاب: هو فالداخل تاعك و نتي تاعي معنتها نتوما فيزوج تاوعي
غمزلها..عضت لسانها بقوة..حابة تضربو تفجخو..
ايهاب: عجباتك المعادلة ؟
شافت فيه ملفوق للتحت..رمات الايكو على وجهو بغزول..
عايدة: مهبول
و راحت و خلاتو و خبطت باب الدوش فوجهو..شد هاداك الايكو فيدو..تبسم بمكر..و رجع تمتم بين شفافو..
ايهاب: تاوعي فيزوج
★★★