نيران العشق

الحلقة 19

طلعت راصها خبطاتو للور بقوة..تشوف فيه واقف فنص الساحة هاديك..طونوبيل تاع عايلة غامد راحت..بقات غير طونوبيل تاع عمها..سيات تشوف يماها..سيات تلمحها للمرة لخرة و مقدرتش..الحاجة الوحيدة لي مصبرتها انها متأكدة بلي ايهاب راح يقتلها دك..قلبها تحس فيه قاعد يتفتت داخلها..حتى النفس لي تتنفس فيه و تحسو يحرق فيها..رغم هذا مرتاحة خاطر قدرت تسلك يماها..يماها لي كلامها للدك يتعاود فراصها..يماها لي تبرات منها قدام الكل..مجرحهاش كلامهم عليها ولا تهديد سعد ليها ولا الباطل لي طاح عليها كيما جرحها كلام يماها..
فاقت من سرحتها وقت سمعت صوت محرك الطونوبيل لي راحت..راحت و خلاتها وحدها بعد ما ولات مقطوعة من شجرة..
عايدة: م ماما..
فتحت الباب بالزربة..نزلت بالسيف تشوف فالطونوبيل تبعد..تمشات زوج خطوات موراها..
عايدة: مامااااااااا
طاحت اجونو عالارض..تضرب فالارض بيديها..
عايدة: مامااا ارجعي..متخلينيش مااامااا
نفخ بالقاوي و هو يشوف فحالتها..قرب لعندها وقف موراها..
ايهاب: نوضي
مردتلوش..اصلا مسمعاتوش..مزالها معلقة فكلام يماها..مزالت تسمع فصوتها و كلامها لي قتلها..كلامها وجعها اكثر من كامل الشي لي صرا فيها..نزل عليها اكثر..لف يدوعلى كرشها و هو ملور..وقفها بالسيف..جا ظهرها فصدرو..حط شفافو على شعرها يحكي بهدوء و برود فنفس الوقت..
ايهاب: سايي اهدي
حطت يديها على يديه نزلتهملو..و بعدت عليه شعرة لا طاحت..جا حيحكمها باش مطيحش بعدت عليه اكثر..تلفتت ليه خبطاتو على صدرو بزوج يديها..متزعزعش مبلاصتو..دار يديه فجيوبو بكل هدوء..رجعت تخبط فيه بزوج يدين و تعيط..
عايدة: نكرهك..نعيفك..كلوو بسببك..وااش درتلك اناا واش درتلك باش دير فياا هاكا واش درتللك..خووك و راهو فااق علاه..حراام عليك علاااه هاكاا
مردلهاش..جيست يشوف فيها بملامح باااردة و يحس لضرباتها على صدرو..شداتو من كول الشوميز تاعو بزوج يدين..تحكي فوجهو و عينيها فعينيه..تحكي بعينين مكسوورة و تقطع وجع و كره..
عايدة: مستحيل تكون انسان..مستحيل يكون عندك قلب حتى الوحوش ميديروش لي درتو..عمري ما كرهت واحد كيما كرهتك عمري ما حقدت على واحد كيفك..علاااه هاكا
سكتت تلهث و ترد فالنفس عوج فمو و هو يشوف فيها..
ايهاب: وجعني راصي مزال معييتيش مالهدرة !؟
فمها تحل من الصدمة..مستحيل يكون طبيعي..كيفاه يقدر يبقى هادس لهاد الدرجة ؟! كأنو مدار والو..هزتلو براصها لالا..
عايدة: اقتلني..اقتلني دددك راك رديت ختك
ايهاب: مشي انا لي لازم نقتلك عمك هو لي لازم يديرها
رجعت خبطاتو بقوة..
عايدة: علاااه ممديتنيش ليييه مااال
خرج يدو من جيبو..حطها على وجها بهدوء..رد خصلة من شعرها مور ودنها..تنفظت و بعدت عليه للور..خلات يدو معلقة هكاك..تبسم على جنب..
ايهاب: لوكان سلمتك ليه شكون كان راح يصدق بلي نحبو بعض لدرجة انا هربنا معا بعض !
عايدة: مستحيل تكون انسان نتا..حجرة نتا !! حتى الحجر و يرف كيفااه تقدر تكون هاكا نتا دمرتني..قتلت بابا و قتلتني انا و ماما فالحيااة كيفااه تقدر تبقى هادي هاكااا
عدا سانو على شفافو و هو مركز معاها واقفة مقابلاتو لابسة غير الشوميز تاعو عاللحم رجليها عريانيين و حفيانين تبكي و تحكي بيديها بالزربة..نيفها و شفافها حمورا مليكاء شعرها يدي فيه الريح و خصلاتو منو لسقو على وجها لي تشمخ بالدموع..منظرها خلى ابتسامتو توساع اكثر..رجع حكى..
ايهاب: شفافك يهبلو..حتى فاسوء حالاتك تهبلي
فمها تحل اكثر..سايي تأكد انو مشي طبيعي..غمضت عينيها بالسيف و عاودت حلتهم تقاوم باش تبقى واقفة..راصها تحس فيه قاعد يطبل لداخل و الدنيا دور بيها..تشوف فيه فلو..عرفها مشي قد بعضها..اول ما قرب ليها حطت يدها على صدرو طبع فيه..
عايدة:متقربش لياا..صدقني موتك راح تكون على يدي
نفخ بالقاوي..بحركة خفيفة نزل عليها لف يد على على خصرها و يد تحت رجليها رفدها جات فحضنو..
ايهاب: مممم اقتليني من بعد كي تفيقي..
عينيها تغمضو..مقدرتش تقاومو اكثر..طاح راصها على كتفو و يدها جات فالهواء..كبس عليها اكثر فحضنو..يتحسس فجسمها الدافي بين يديه..صبعتيه يتحركو تحت فخاذها بحركات كيما تاع لاعب لبيانو..و تمشى بيها لطونوبيل بكل برودة اعصاب..
★★★