بقات تشوف فيه..تستنى فيه يفتح عينيه..مفهمتش قصدو بهاديك الهدرة..بقات تستنى فيه ينوض يفهمها بصح هو لالا كبس عالمخدة اكثر و رجع رقد..عملت ڨريماز تاع استغراب بوجها..قربت ليه بلعقل تطل عليه..
عايدة: ااي..رقدت ؟
مردلهاش..عرفاتو عاود رقد..نفخت بالقاوي..معنتها ناض جاوبها و رجع يرقد..مسي عارفة حتى كيفاه سمعها..
عايدة: مختل عقلي
تنهدت و قربت للقجر فتحاتو بلعقل..رفدت شوية دراهم كانو فيه..حطتهم فجيبها و خرجت مالبيت..هبطت لتحت طاحت عينها فعين لالة خديجة لي تسيق فالساحة..شافت جيهة الكوزينة لقات مروى تغسل فماعن لفطور..
عايدة: اطوني نعاونكم فكاش حاجة
شافت فيها لالة خديجة بنص عين..تحكي و رافدة نيفها..
خديجة: تحبي تعاونينا شدي بلاصتك بعيد برك
فوجت فمها..قبل ما تردلها خرجت مروى تمسح فيديها مالكوزينة..
مروى: صباح الخير
عايدة: صباح النور
مروى: هايا تفطري
عايدة: لالا منيش حابة..اصلا خواطري دايرة
مروى: هاد الشي طبيعي فاليامات الاولى تاع الحمل ؟؟؟
هزتلها بكتافها بعدم معرفة و عوجت فمها..قلب خديجة عينيها منهم فيزوج..
خديجة: بنات اخر زمن حتى ابسط الحوايج ميعرفوهمش..روحي اعصري حبة قارص و زيديلها شوية ماء و اشربيها تتنحالك (راني نخرط برك والله ما نعرف🐸✋)
شافت عايدة فمروى مصدومة..ضحكت مروى حتى هي بصدمة..
مروى: راكي تحكي معا عايدة ماما ؟؟
رمات البالي من يدها و راحت تمشي بالزربة و تهبط فجبتها..و تحكي بتوتر..
خديجة: الواحد يحكي و يندم معاكم بففف حاجة ما تطلقوها
بقاويتبعو فيها حتى طلعت و خلاتهم..طرطقت مروى بالضحك اما عايدة فتبسمت على جنب حاسة روحها كيما فالافلام لي الحماة تكون تكره الكنة و كي تسمع بيها حامل تولي تتعامل معاها مليح..
مروى: هايا عيدود نديرلك واش قالت ماما
شافت فيها..تبسملتها بهدوء..
عايدة: مروى..نطلب منك حاجة ؟
مروى: واش ؟
عايدة: راح نخرج لاقل من ساعة..تقدري تخلي لالة خديجة هادية باش متنوضش ايهاب مبيدما نرجع ؟
مروى: هبلتي تخرجي بالتخبية عليه ؟ حابة يقتلك و يقتلني ؟؟
عايدة: مراحش نخرج بالتخبية عليه..ادا مناضش مراح يصرا والو..تعيشي مروى.. اول مرة نطلب منك حاجة
بقاتت ذبللها فعينيه..عضت مروى شفتها..حركت راصها بإستسلام..
مروى: عالاقل قوليلي وين رايحة
عايدة: للمقبرة..عند..عند ماما
كبست على قبضة يدها..كانو تسرق من عمرها دهر كامل و هي تجمع فكلمة ماما معا كلمة مقبرة فنفس الجملة..موس تغرس داخلها و فتح جرح متغلقش اصلا..تنهدت مروى..
مروى: مطوليش تعيشي والله يقتلنا
تبسمتلها..
عايدة: ميرسي..
رماتلها بوسة فلهواء و زربت فخطواتها خارجة..بقات تبع فيها بعينيها جتى غلقت الباب..و رجعت شافت معا باب بيت ايهاب..
مروى: ياا ربي سلكها على خير و ميطرطقش فوق ريصانا..
★★★
YOU ARE READING
نيران العشق
Romanceكرونيكات كريستال كرونيك باللهجة الجزائرية كتبتها ف 2019 و مكاش لي مسرقهاليش أيا جيت نحطها هنا _____________🔥#نيران_العشق🔥_____________ ❤حينما وقعت بيدي يا صغيرتي اشعلت بداخلي نيران عشقك و التهمتني بقبلاتك..لم تدركي يومها انني عشقتك و وقعت في ظلما...
