نيران العشق

الحلقة 3

نطرت روحها بقوة منو و تلفتت ليه بالزربة و سلاحها فوجهو..تبسم على جنب وقت شاف الكره لي فعينيها..الحقد..النار لي شاعلة فيهم..هزتلو براصها لالا تحكي..
عايدة: جيتني برجليك ايهاب غامد
ضحكت بوجعية و كملت تحكي و هو يشوف معاها بكل هدوء..
عايدة: علاه انا نقدر نموت بلا نشوفك و ندي حق بابا !؟ ميجيش نزعفك مني
قرب منها خطوة كبست عالسلاح اكثر بين يديها..قلبها يضرب بالقاوي وقف مقابلها و سلاحها لاسق صدرو..نزل عينيه ليها طاحو فعينيها لي مليانين كره و دموع..
ايهاب: هاني قدامك..ادي حقك
هزتلو براصها ايه بغزول
عايدة: مفكرني راح نخاف !! مفكر راح نتراجع..غاالط غالط يا وليد لالة خدسجة رااك غالط
طلع حواجبو بتمڨعير يحكي كأنو مشي سلاح محطوط على صدرو و لي رافداتو اكثر انسانة حاباتو يموت..هدوءو و برودو مشي طبيعيين..
ايهاب: بالعكس عارفك تديريها و من غير رحمة تان..لي عارضت قرار مجلس القرية و دخلت لنص داري و ضربت خويا بالرصاص اكيد قادرة تقتلني فرمشة عين
زير على اخر كلامو..يحكي بغش باين من حروفو..
عايدة: اول حاجة مجلس القرية تاعكم انا منعترفش بيهم و متأكدة انكم نتوما لي سكتوهم باش قررو انو ثأر بابا يتلغى..و بالنسية لمنصف نكانش قصدي نضربو
صوتها رعش بالبكاء وقت تفكرت لي صرا لمنصف..ببعت ريقها بالسيف و رجعت كملت..
عايدة: اما بخصوصك نتا فكلامك صحيح راح نقتلك بلا رحمة كيما عملت فبابا
ايهاب: هو لي وصل روحو
قرنت حواجبها بغضب و دفعاتو بالسلاح للور رغم انو متزعزعش مبلاصتو..
عايدة: و حتى نتا..نتا لي وصلت روحك للموت على يدي
ايهاب: لي يهدر بزاف ميدير والو ادا ناوية تقتليني فتفضلي ديريها و بعدها راح يجي فرد وخدوخر من عائلتي يقتلك نتي و بعدها يجي واحد من عندكم يقتل واحد من عندنا و بعدها تعرفي واش يصرا ؟
ركزت معاه اكثر..تبسم ببرود
ايهاب: لازم تكوني ذكية و تحكميها عالطاير..فكرني وين حبست !!..ااه تفكرت بعدها راح يجي واحد من عندنا يقتل خالتي فتيحة مسكينة
قلبها دق بالقاوي وسط صدرها..تعدات صورة يماها بين عينيها..حس برعشتها..
ايهاب: نتمنى منكونش غالط فحساباتي..تعرفي انو الدم يقابلو الدم..بصح للدك مزالني نخمم زعما مور ما تتقتل خالتي فتيحة راح يخلف سعد الثار ؟ يعني والله ما نظن
طلع حواجبو يستهزئ بيها..بلعت ريقها بالسيف و جسمها رعش..عارفة انو عمها مستحيل يعمل حاجة على خاطرهم رجع حكى وقت عرف انو سايي لعب بعقلها و افكارها..
ايهاب: على كل حال هدرت بزاف تقدري تقومي بالواجب..بصح قبل ما تقتليني عندي امنية اخيرة
بلعت ريقها تستنى فيه يكمل..رجع هو حكى بإستهزاء..
ايهاب: نتمنى نتدفن قدام خالتي فتيحة بعد ما تلحقني للمقبرة..و نتمنى تحققيلي هاد الطلب الاخير
دموعها نزلو مرة وحدوخر..و يديها رعشو..غمضت عينيها بقوة و رجعت حلتهم..تعدا صوت يماها و ضحكتها و كلامها على مسامعها..يديها تفتحو بلعقل و طاح السلاح عالارض بالضبط فوق بقعة دم باباها..تبسم بمكر..نزلت راصها لسلاح تشوف فيه و هي ترعش..
عايدة: ب بابا..سامحني بابا
نفخ بالقاوي..رمى يدو شدها من زندها بقوة..عيطت بكامل صوتها و حطت يدها فوق يدو..
عايدة: نحححي يدك لمووسخة علياااا
قلب عينيه..
ايهاب: كرهت مالدراما تاعك خلينا نروحو نرتاحو دك عندي شغل انا و نتي
عينيها خرجو معا كلمة خلينا نروحو..هزت براصها لالا..تعرف ملييح واش راهو يستنى فيها..
عايدة: لالاااااا اطلللق
مردلهاش..تمشى و يجر فيها موراه و هي تتخبط و تعيط لربي لي خلقها..حلوقها خرجو و رجليها يتكركرو عالارض و هو يجر فيها حتى الحيوان ميتعاملش بهاديك الطريقة الوحشية دموعها نازين جمر على وجها..تفاارع فيه خاطرها تعرف و علابالها انو مستحيل يرحمها و الموت ليكانت راحية ليه ارحم ليها منو..
★★★