نيران العشق

الحلقة 76

شدها من خصرها..جبهتو على جبهتها..لافة يديها على رقبتو..كلهم يشوفو معاهم الاضواء خافتين و الموسيقى هادية..عدا يدو على انحناء جسمها..همسلها بلعقل..
ايهاب: وقتاه يروحو هادو منا
عقدت حواجبها مشي فاهمة..قبل ما تسألو جبدها عليه و دورها زوج دورات على روحها و عاود جبدها ليه..حطت يدها على صدرو..
عايدة: علاه حاب يروحو
تبسم و حط يدو على ظهرها نزلها للتحت و هو فوقها..متناغم معا الغنية..طاحت عينها فعينو فوقها..قلبها دق بالقااوي..رجع طلعها..و دورها حتى ولا ظهرها لاسق صدرو و شاد يديها..وشوشلها فودنها..
ايهاب: حاب نستفرد بيه
جسمها كامل رعش..غمضت عينيها بقوة و رجعت حلتهم..مشي عارفة واش لازم تحس بالضبط و هو قاعد يمشي فيها معا الغنية ناسي الناس و البلاصة و كل حاجة..بين يديه يتراقص ها كأنهم وحدهم..و هي تبع فيه كيف البوبية لي بين يديه..
~•~•~•~•~•~•~•~•~•~•
تكات بيدها عالطابلة..عينيها قلوب و هي تشوف فيهم كيفاه يشطحو..
مروى: يهبلووو
منصف: ### و انا منتزوجش ؟
خديجة: اداا تزوجت نتا اناا لي نخيرهااا
منصف: علاه قالولك سايب باش نتي تخيريلي
خديجة: خليت خوووك يخير و راني خلصتها غالية..الغلطة منعاودهاش مرتين..
قلب عينيه منها..رفد روحو وقف و غمز لمروى..
منصف: تبعي تشوفي
ضحكت..تبعاتو بعينيها كي راح..وقف قدام لمياء..مد يدو ليها..
منصف: تشرفيني بهاد الرقصة
ضحكت فوق القلب و هزتلو براصها ايه..مدت يدها ليه و راحت معاه لابيست..خبطت لالة خديجة رجلها بيدها..
خديجة: الككككلب..هادااا ما خاصني غير يلسق فيه هاديك المومسيسي
مروى: هاديك بذات غير بعديها عليه مصفارة
شهقت و ناضت تجري باش تلحقو..ضحكت مروى و رجعت شافت جيهة عايدة و ايهاب لي كزال يشطخو و عينيهم فعينين بعض تقول راهم فدنيا اخرى و قبل ما ترفد العصير باش تشرب ماحست غير بيدو لي شدت يدها..وقفها و جبدها للور حتى خبطت فصدرو لف يديه على ظهرها..عينيها وساعو..
مروى: وااش رااك دير هناا
رائد: عرضني ايهاب
قبل ما ترجع تسألو جبدها معاه لابيست..و زغدها بتناغم معا الغنية..
مروى: وااش راك دير اطللقني
كبس عليها اكثر و لسقها فيه..يحكي بلهمس فوجها كأنو يترجى فيها..
رائد: مرة وحدة برك خلينا نعيشو اللحظة و متخسريهاش
بلعت ريقها..تنهدت بالقاوي و لفت يديها على رقبتو..ابتسامة عريضة ترسمت على وجهو..قرب ليها اكثر..همسلها..
رائد: راح يجي نهار يكون هادا عرسنا
قلبها دق بالقاوي..غمضت عينيها و حطت راصها على كتفو..عارفة انو احتمال يكون كلامو صحيح ضعيف بزاف..بصح عالاقل حابة تعيش الدقيقة هاديك..تمتمت بين شفافها..
مروى: ياريت
سمعها..طلع راصو لسماء..خذا نفس طويييل..
رائد: وعد مني انك راح تكوني حلالي..
★★★