نيران العشق

الحلقة 82

حط يدو على خصرها بهدوء..قلبها دق بالقاوي وسط ضلوعها..
ايهاب: دوري ليا
غمضت عينيها بقوة و رجعت حلتهم..تلفتت ليه بلعقل و راصها فالارض..حط يدو تحت ذقنها طلعلها راصها ليه..طاحت العين فالعين..رفد يدو الثانية ردلها خصلة شعرها مور ودنها..بلعت ريقها بالسيف..حكى بهدوء و صوت ناقص..
ايهاب: واش راكم ديرو هنا ؟
الكلام وحل فحلقها..ولات طرطق فصبعتيها من غير ما تحس..ضيق عينيه..
ايهاب: اهدري
شاف منصف مروى لي تترجى فيه بعينيها باش يسلكهم..رجع شاف فايهاب لي مركز معا عايدة..قرب بالزربة لطابلة رفد الورقة كرفصها فيدو..
منصف: كنا نحكو على عمل خيري حبينا نتبرعو للجمعية تاع القرية
طلع عينيه ليه..تلفتت ليه عايدة و مروى..رجع حكى ايهاب..
ايهاب: سقسيت مرتي مسقسيتكش نتا
شاف منصف فعايدة يحاول يعطيها شوية قوة..هزتلو براصها ايه و رجعت حكات..
عايدة: كيما قالك..
نزل بعينيه ليها مرة ثانية..قرب ليها حتى مولاتش كاينة مسافة بيناتهم..جسمها رعش..حكى بصوت هاادي يحاول يضغط عليها باش تحكي..
ايهاب: متأكدة ؟
نزلت راصها مشي قادرة تشوف فيه..خدودها حمارو..
عايدة: مممم
طلع حاجبو بتڨوعير و عوج فمو..
ايهاب: نعتبر روحي صدقتكم..
تنهدت بالقاوي..الروح رجعتلها..قاطعهم صوت لالة خديجة جاية..
خديجة: ايهاب وقتاه جيت
تلفت ليها..رافدة سنيوة كسكس فيدها و لميتء موراها حتى هي رافدة معاها..عينيها لمعو وقت شافتو فالوقت لي هو مشافش فيها اصلا..حكى بكل برود و بساطة..
ايهاب: راجع للعاصمة
عينيهم وساعو كامل..من غير لمياء لي عينيها لمعو من الفرحة..عايدة سطل ماء و تكب عليها..غمضت عينيها بقوة و رجعت حلتهم..الحاجة الوحيدة لي جات فبالها ساعتها انو راح يروح و يخليها هنا..الدنيا دارت بيها..
منصف و مروى: كيفاااه !!
خديجة: كيفاه راك راجع !!
لمياء: بسيطة قال راجع يعني راح يخرج من القرية و يعاود يولي يعيش فالعاصمة فبلاصتو الاصلية
عينيها تعمرو بالدموع و شفافها رعشو..تلفت ليها هو بهدوء..عينيها تعلقو فعينيه و قلبو تعلق فلمعة الدموع لي فعينيها..نفخ بالقاوي..رمى يدو ليها شدها من يدها و جبدها ليه حتى خبطت فصدرو و تغرس وجها عندو..
ايهاب: راجع معا مرتي و وليدي..
قلبها دق بالقاوي..طلعت راصها ليه بالزربة..جا وجهو معا وجها و هو يشوف فيها..
ايهاب: اومبعد نتفاهمو على ## هاد الدموع
لمياء: ك كيفاه !
تلفت ليها بملل..
ايهاب: علم كبير هادا باش متفهميهش ؟ راجع معا مرتي للعاصمة نجوزو شوية وقت و نولو لهنا
عضت لسانها منالداخل بغزول..قلب الفرحة عليها..
مروى: اااا قصدك راح تولو..خلعتني
منصف: بصح علاه ؟
خديجة: كيفاه حتى جاتك فبالك ؟
ايهاب: بفف #### عليا تهدرو بزاف
شدها من يدها و خرجها معاه و خلاهم هكاك موراه مفاهمين والو..حاطة يدها على كرسها و اليد ثانية شايدها منها..تشوف فيه مستغربة حتى هي..اما فنفس الوقت فرحانة و مشي عارفة علاه..يمكن خاطر مفكرش يروح و يخليها..تبسمت..كبس على يدها اكثر حكى من غير ما يشوف فيها..
ايهاب: متضحكيش كي نكون عاطيك بالظهر و منكونش نشوف فضحكتك
عينيها وساعو..عضت شفتها بقوة..كل مرة يصدمها بحاجة جديدة..ابتسامتها وساعت اكثر من غير ما تحسو غرست دفرتيها فيدو..حس بيها و ترسمت ابتسامة هااادية على ملامحو الباردة
★★★