تلفتت ليه تغلق فقفالي السروال و هي تشوف معاه..مزال راقد..قربتت للمرايا ترفد فشعرها..اول ما طلعت يديها بانت شوية من كرشها..تبسمت و حطت يدها عليها تعدي فيها بلعقل..همست بين شفافها..
عايدة: صباح الخير يا روح الماما
تنهدت براحة..بالنسبة ليها يمكن احسن حاجة دارتها انها مطيحاتوش..طلعت بعينيها لايهاب..راقد على كرشو و شعرو على وجهو..لثواني و هي تشوف معاه رجعت بيها الذاكرة لاول يوم شافتو فيه..
٭٭٭
تتمشى هي و فتيحة اليد فاليد..راجعين لدار..
فتيحة: تعرفي حرت واش ندير لباباك لعشية..طجين زيتون ولا رشتة ؟
عايدة: منعرف كيما تحبي..بصح مشكيتش ياكل مور البقلاوة لي راح ياكلها من تحت يديا..ااه استناي استناي
حبست فبلاصتها و دارت لعندها..
فتيحة: واش بيك ؟
نزلت راصها لصاشيات تحوس فيهم..
عايدة: اووووف نسيت دوزان الحلوى فالحاانوووت
فتيحة: منعرف عقلك وين راه..
عايدة: روحي لدار نجيبهم و نجي
فتيحة: متبطايش و تبقاي تلعبي فالطريق كي عوايدك
عايدة: نوو دقيقتين و نلحقك
هزتلها براصها ايه..عطاتلها لي فيدها و رجعت تجري لسوق و هي تسب فزهرها..اول ما لحقت للحانوت شدت جنبها و غمضت عينيها ترد فالنفس..ما حست غير بخبطة قوية على كتفها خبطتها معا الحيط شعرة لا طاحت..فتحت عينيها بالزربة و تلفتت موراها تشوف شكون
عايدة: شكووون لبغل لي ق...
لسانها تبلع (اتخيلو غنية شابة و تصوير بطئ فهاد اللحظة😂) طاحت عينها فعينو..يشوف فيها من فوق كتافو..عينيه كحولا كيف الليل..لكلام هربلها و نسات لي جات راح تقول..ثواني و هي تشوف معاه كأنها سارحة فيها..و حتى هو منزلش عينو..بصح كانو ثواني قلال حبست فيهم الساعة..و بعدها عاود دار و تمشى رايح و مخليها فبلاصتها..هزت راصها يمين و يسار تفيق فروحها..قبل ما تعاود تحكي قاطعها صوت مول الحانوت يوشوش معا واحد من الزبائن..
_هاداك هو ؟
_ايه هو وليد عائلة غامد لكبير ايهاب غامد..قالو جا من المدينة
_انا سمعتهم يقولو كان فروما
_منعرف كل واحد واش يقول..نظن جا بسبة صفقة الفخار لي داتها عائلة غامد
_والله راح يكون منافس قوي لعايلة الطاهري فعز خدمتهم
_متتمسخرش مكاش لي ينافس غامد فصنعة الاثار حتى الطاهري
قلبت عينيها..تمتمت بين شفافها..
عايدة: رجال بصح كيف نساء تاع الحمامات فمهم يتشرك غير فلبلا بلا
٭٭٭
نزلت دمعة من عينها..رفدت يدها بالزربة مسحتها..مشي عارفة بالضبط علاه بكات..ادا خاطرها تفكرت يماها ولا خاطر رجعت بالذاكرة لنهار لي قلبلها حياتها ولا خاطر تفكرت اول مرة طاحت عينها فعينو..تنهدت بحسرة و حكات من غير وعي و هي تشوف فيه..
عايدة: يا ريت كانت هاديك اخر مرة طيح عيني فعينك..يا ريتها كانت اول و اخر مرة نشوفك فيها..يا ريتني معرفتش اسمك..
ايهاب: يا ريتني خطفتك هاداك نهار..
حكى ببرود وهو مغمض عينيه..عينيها وساعو و قلبها دق بالقاوي و وجيعة خفيفة تعدات فاسفل كرشها..
★★★
YOU ARE READING
نيران العشق
Romanceكرونيكات كريستال كرونيك باللهجة الجزائرية كتبتها ف 2019 و مكاش لي مسرقهاليش أيا جيت نحطها هنا _____________🔥#نيران_العشق🔥_____________ ❤حينما وقعت بيدي يا صغيرتي اشعلت بداخلي نيران عشقك و التهمتني بقبلاتك..لم تدركي يومها انني عشقتك و وقعت في ظلما...
