بارت 44

3.6K 208 62
                                    

عند العيال مطلق وسعود وهم ينتظرون بهاج الي راح من عندهم وصار له ساعه وماجاهم خبر عنه
وصل بهاج ونزل من السيارة واتجه لهم وجلس معهم بجلستهم البسيطه مطله على الديره وفوق جبل
مطلق بتوتر من وجهه وحس انه مابيقول شي زين واكيد ان جده رافض يساعده
جلس بهاج وهو يبتسم بأبتسامه خفيف واضح فيها الزعل
سعود : وينك يا رجال صارلك ساعه مالك حس ؟
بهاج : هذاني جيت
سعود : اييييه تكلم وش صار وش قال جدك
بهاج وهو يحاول يخفي الابتسامه سكت
سعود بعصبيه : بهاج رد لا ترفع ضغطي وش فيك صاير بارد !!!
تكى بهاج ظهره على المركا وهو يراقب رفعة ظغط سعود وصموت وتوتر مطلق وقال وهو يمثل الزعل : قال مالي دخل بذا الضفدع
واشر على مطلق
ارتمى مطلق على المركى الي ورا ظهره ومد نظره لڤيو الديره من فوق ورجع يده ورا راسه وقال : كنت داري اصلاً من شفت وجهك نازل من السياره
سعود ارتخت اعظامه بزعل على مطلق وماقدر يقول شي
بانت أبتسامة بهاج الخبيثه الي شقت وجهه ومد يده يضرب راس سعود من ورا وارتفع صوته وقال من بين ضحك : صدقتو يا هطووووف ؟؟؟ ههههههههههههههههه
لف مطلق بفزه : كيييف يعني وش قال ؟
سعود هالمره ماقدر يمسك نفسه وقام كتف بهاج وقال : تكلم بالصدق تراني متحملك من اليوم
بهاج بضحك وقال وهو منكتم من سعود : وافق وافق
فكه سعود وفز : في ذمتك ؟
بهاج بعد ما كح : اي والله
لف لمطلق : بس عنده شروط !
مطلق الي حس لوهله رجعت له الحياه وتفتحت ابواب السعاده له وقال بعد مده : وش ؟
بهاج رجع يقول لهم كل الي قاله جده بالظبط
سعود : بسسس ؟ بسسيييطه هاذي كلها تنحل
مطلق : الوظيفه سهله تنحل بس اهل الديره من يسكتهم عني ؟
بهاج : انت
مطلق : انا ؟
بهاج : ايه انت اذا تبي تبدا حياتك من جديد وتخطب بنت الشيخ عبد اللطيف لازم تسوي كللل شي تقدر عليه عشان اهل الديره يحبونك
مطلق : زين بس وش اسوي ؟
سعود بطقطقه : يعني تروح لابو عايض تساعده ببضاعته بالسوق
رفع راسه بهاج له بأبتسامه صامت
مطلق لف له وبقبق عيونه : لا يرحم لي امك الا ذا الشيبه مايواطني ولا اواطنه بعيشة الله
ولف لبهاج : بهاج تكلم قل شي
رفع يده بهاج : والله هذا الي عندنا وهاذي شروط العود
مطلق : الله يسامحه هو و شروطه
سعود : بس ترا كلمته وحده واذا قال بيخطب لك بنت الشيخ يعني اعتبرها لك
ابتسم مطلق وحس ان في احد وراه بفضل الشيخ حمد
بهاج : وايه قبل انسى وتراه يبيك تجيه بكره
مطلق : ابن ابوي
بهاج وهو يقلده : ابن ابوي ايه لازم تروح له ماهو ماكلك ؟
مطلق : خلاص خلاص بس انت بتجي معي !
بهاج : وانا وش ابي بك اجي معك وش بسوي ؟
مطلق : اذا مانتب جاي معي ماني رايح
سعود : يليييل ذا البزر
بهاج اخذ نفس بغضب : خلاص بجي معك ياوليدي بس لا تبكي
____________________
بجهه ثانيه
كانت واقفه ومنهد حيلها من كثر ما تحاول في امها : يمه تكفين والله مااطول كلها ساعتين وراجعه مابي افوت جمعة البنات
ام سعود : الهنوف تراك ازعجتيني خلاص
جلست الهنوف بقل حيل بس ما استسلمت : يعني انا بين اربع جدران ماعندي احد يسليني ولااسليه حتى ريم وعيالها راحو وتركوني بالطفش وسعود ٢٤ ساعه طالع برا انا وش ذنبي ؟
ميلت شفايفها بزعل ولفت عليها ام سعود الي قدرت تكسر خاطرها وقالت : ساعتين بس !
فزت الهنوف : والله ؟
ام سعود : ايه بس ترا مافي احد يوديك الا انك تنتظرين ابوك ولا سعود يجون
قامت الهنوف ركض للغرفه تتجهز : شي احسن من لاشي
جلست امها تهز راسها بأبتسامه
دخل ابو سعود : السلام عليكم
ام سعود : وعليكم السلام تبي قهوه ؟
ابو سعود : لالا توني جاي من ابو رشاد متقهوي عنده
طلعت الهنوف بعد مالبست وتجهزت وفزت من شافت ابوها : بابا جيييت ؟
ضحك ابو سعود : ايه جيت بس وش سر ذا السعاده بشوفتي
تقدمت تسلم على راسه بحب : انا كذا ولا كذا استانس انك جيت بس هالمره استانست اكثر لانك بتوديني لبنات ابو رعد
ابو سعود ضحك : ايه انا اقوله مو من الله
ضحكت الهنوف : يييبه !
قام ابو سعود : يلا قومي اوصلك حتى لو بغيتي على ظهري
ابتسمت وطلعو
وقف سيارته قدام باب ابو رعد ونزلت الهنوف تدق الباب ومشى ابو سعود متجهه راجع للبيت
طلع سلطان وهو توه متسبح وشعره مبلل ولابس ثوبه فتح الباب وصنم بصدمه بعد شوفته للهنوف ماقدرت تقول شي من الصدمه وقعدو يطالعون في بعض
بس ارتخت انفاسها بعد ما سمعت صوت افنان جايه من بعيد : الهنوف جيتي ؟
لف سلطان وبعد عن الباب ومسكتها افنان مع يدها ودخلو سوا
اخذ سلطان نفس عمييييق وهو من اول ما شافها انفاسه توقفت ودقات قلبه زادت طلع على وقفة عبد الرحمن وركب معه
لف عبد الرحمن عليه : فيك شي ؟
التفت سلطان بذهول : هاه
عبد الرحمن : اقول فيك شي
سلطان : لالا ياعبود حرك
اما داخل عند البنات بعد مانزلت الهنوف عبايتها وجلست معهم وشافتهم كلللهم متجمعين وهي تحب هالجمعه بدو يسولفون ويضحكون ويتقهوون
___________________
من بكره بعد العصر وقف مطلق بتوتر ومعه بهاج قدام باب مجالس الجد حمد
بهاج بزهق : يرحملي والديك ادخل اخلص عليه لا اسحبك مع ثوبك
مطلق : ولد شتبي مني انت
بهاج : ابيك تدخل ادخل !
مطلق اخذ نفس ودخل وبهاج ضحك من توتره التفت عليه مطلق وبهمس : بدينا !
بهاج : لا خلاص خلاص ادخل
دخلو عند الجد حمد الي كان جالس بوسط المجلس وبجمبه ابو رعد : السلام عليكم
الجد حمد وابو رعد وهم يراقبونه من بعيد جاي عندهم : وعليكم السلام
انخرش مطلق من نظراتهم له والتفت لبهاج وقال بهاج بهمس يخوفه : تووووك باقي ماشفت شي !
قامو يسلمون عليه وهو متوترررررر
ابو رعد : اجلس اجلس حياك الله
مطلق : الله يحييك
الجد حمد بدا يتكلم وقال : كيفك يامطلق وشلون جدتك ؟
مطلق : بخير عساك بخير
الجد حمد : والله وطلع لك لسان محترم
ابتسم مطلق بتوتر وهو مايدري يمدحه ولا يسبه
تقدم بهاج بصمت : يمدحك يمدحك لا تخاف
ارتخت عظام مطلق براحه وهو وده يلف على بهاج يعطيه مخمس
الجد حمد : اسمع
تفتحت اذان مطلق وبهاج بتوتر وكمل الجد : انا مارح الف يمين ويسار الي عندي بقوله
التفت لبهاج وكمل : بهاج علمني السالفه كلهاا وسوات عبد اللطيف ابداً ماهي سواه ترضي الله ورسوله ! قالي بهاج انك تبي بنته صح ؟
زادت دقات قلب مطلق : صحيح
الجد حمد : وانت تشوف نفسك رجال بتتزوج وبتشيل بنت الحلال ؟
شد مطلق على حواجبه بغضب
وتلون وجه بهاج بقلق وقال : وش ذا الكلام ياجدي
الجد حمد : انت اسكت ومالك شغل انا كلامي موجه لمطلق صح ولا لا يا مطلق ؟
شد مطلق على اسنانه بغضب وقال : صحيح
الجد حمد : انا موافق اخطبلك اياها
رفع انظاره مطلق للجد حمد بأمل : بس عندي ثلاث شروط
اشر على يده يشرح له وكمل وقال : واكيد بهاج علمك وتعرفها
اولاً من اليوم ورايح ابي اشوفك قبلي في المسجد ولا تغيب عنه ثانياً تدور لك وظيفه تستر بنت الناس فيها ولا كيف تبي ابوها يوافق عليك وانت لا وظيفه ولا شغله ولا عمله ؟ ورجع قال : وثالثً واخر ماعندي اهل الديره اهل الديره اهل الديره زين علاقتك معهم مابي احد يتكلم وراك الا بالحسنه
وهاذي شروطي وانت تدري ماحطيت هالشروط الا اني ابيلك الخير
ابتسم مطلق وهو اصلاً يشوف هالشروط نصايح بالنسبه له
ابو رعد : هاه وافقت ولا ؟
بهاج ضرب مطلق بفخذه مرتين : وافق وافق من زمان
الجد حمد ارتكى : اجل يلا توكلو على الله وابدا بتنفيذ الشروط واذا شفت بعيني انك حققتها ابشر بالي تبي
التفت مطلق على بهاج بقلق ورجع يناظر الجد حمد : بس يا ابو عبدالله البنت يقولون ملكتها قريبه وبعد كم يوم وانا شروطك بنفذها بس بتطول والبنت بتروح من يدي ؟
ابتسم بهاج وهو يدري مطلق اذا حب حب
الجد حمد ضحك واستغرب بهاج منه اول مره يشوفه مسفهل كذا لهدرجه وده يساعد مطلق صدق ومن كل قلبه ؟
الجد حمد : ابد لك مني الحين احرك لبيت ابوها وانهي سالفة زواجها كله وانت اذا سويت شروطي نروح انا وانت نخطبها لك
ابتسم مطلق براحه وقام وتقدم يسلم على راس الجد حمد : ماقصرت يابو رعد الله يخليك ذخر
قام بهاج معه عشان يطلعون
والتفتو بيطلعون : فمان الله
وقفهم صوت الجد حمد وهو يقول : واذا سويت شروطي نادني جدي لاعاد اسمع ابو رعد
التفت بهاج لمطلق الي بانت ابتسامته عليه وفرحه وحماسه اول اول مره يحس احد وراه اول مره يحس في جبل وراه
وطلعو من المجلس ومطلق يتصدد عن بهاج
بالمجلس التفت ابو رعد للجد حمد وقال : يبه متأكد من الي قاعد تسويه ؟
الجد حمد رفع راسه وقال بكل ثقه : هالولد بيكون قدوه لاهل الديره وقل حمد ماقاله
ابو رعد رجع بشك من الموضوع : الله يجعله
___________________
بهاج : ولد اكلمك انا
لف مطلق بعد مالفه بهاج بغصب وشاف دموعه متجمعه بعيون مطلق الي يحاول من اليوم يتصدد عنه عشان مايشوفها ولا تنزل
بهاج : ابو عبدالله ! وش فيك
مطلق اخفى دموعه بسرعه : مدري مدري من زمان مابكيت كيف الحين بعد سنين تهل دمعتي مدري
بهاج عرف انه حس بالانتماء حس احد وراه وتقدم بطقطقه عشان يهديه : كل ذا عشانك بتتزوجها ارحمنا تكفى
ضحك مطلق : انت اسكت انت اصلاً من دخلنا المجلس وانا مو بالعك نعنبو بليسك خليت دمي يوقف ليه تجي معي لييييه
بهاج : احب اذكرك انت الي قلت لي تعال ولا !
مطلق : يلعن الساعه الي قلت لك فيها تعال
ركبو السياره وبهاج يسوق التفت لمطلق : بس اقولك شي ؟ جدي واضح حبك وبقوه
ابتسمت مطلق وكمل بهاج : انا منصدم صراحه كيف كيف جدي هذا الي يسبسبك رايح جاي
التفت مطلق له بعصبيه وبهاج مكمل : ويعصب علينا ويلعن خيرنا اذا حنا معك كيف اليوم تغير مدري سبحان مغير الاحوال
والتفت لمطلق : اعترف شمسوي له لان الرجال الي قبل شوي مو جدي !
مطلق وهو ينتظر بهاج يخلص كلامه وقال : خلصت ؟
ضحك بهاج وهو يقول : ايه
مطلق : اجل انكتم ومالك دخل على الاقل شاف له انسان اهون من حفيده اكيد بيحبني مالومه فيك والله يوم يوريك نجوم الظهر
وقفو عند بيت سعود ودق مطلق عليه
سعود وهو ياكل : هلا ؟
مطلق : وينك جاين عند بيتك انا وبهاج
سعود : ماني بالبيت بالمطعم
مطلق : اي مطعم
قد سعود يعلمه اسم المطعم وانهو : اجل يلا جايينك
قفل مطلق ولف لبهاج : مو بالبيت
بهاج : هذا ماينثبر بالبيت
حرك بهاج متجهه للمطعم الي سعود فيه
___________________
عند الجد حمد وبيمينه ابو رعد دخلو عند مجالس الشيخ عبد اللطيف وهو يرحب ويهلي فيهم : ياهلا ياهلا بالضيوف الغالين
تقدمو يسلمون على بعض
الجد حمد : كيفك يابو شهد عساك بخير
الشيخ عبد اللطيف : بخييير دامك بخير
جلسو والتفت الشيخ عبد اللطيف للصبي : القهوه ياولد
التفت الشيخ عبد اللطيف بعد ما ابتدا الجد حمد بالكلام : انا جايك ومتعني بطلبك بطلبه وماظني انك تردني !
فز الشيخ عبد اللطيف : افا وانا ابو شهد ابشر بالي تامر عليه وانت عزيز وغالي
الجد حمد : يقولون ملكة بنتك الاسبوع الجاي ؟
الشيخ عبد اللطيف : اي نعم وانت اول الحظور بأذن الله
التفت الجد حمد لعبدالله ورجع التفت للشيخ عبد الطيف : وانا مابيك تزوجها ظاري
عقد حاجبينه الشيخ عبد اللطيف : عسى ماشر ؟
الجد حمد : انت تعرفني اعزك واغليك وما ارضى عليك بذرة قطره
وبنتك هي بنتي وضناك ضناي ظاري مايصلح لا لك ولا لبنتك امنع ذا الزواج وفك نفس من وجع الراس اذا تبي تأخذ رأيي الولد رايح فيها وابوه يخبي عليك ذا الشي ويمكن يكون عطاك اشياء عشان تغض بصرك وماتشوف الحقايق
عقد حاجبينه ابو رعد وهو يلتفت لابوه ومنصدم من الي قاعد يقوله
الشيخ عبد الطيف تذكر انه عرض عليه اراضي وفلوس عشان كذا ؟؟؟
وقال : والولد وش فيه بالظبط ؟
الشيخ عبد الطيف : الولد مدمن والعياذ بالله حاول ابوه يعالجه بس ماقدر واخر حل وصل له انه يزوجه يمكن يعقل
لف راسه الشيخ عبد اللطيف بعدم تصديق وقال : خل الموضوع علي يابو عبدالله وانت ماقصرت سويت الي عليك وخبرتني
قام الجد حمد وقام معه ابو رعد : اجل السلام عليكم
طلعو من المجلس وتركو الشيخ عبد اللطيف حاير بمكانه ويفكر صدق ولا ؟
التفت ابو رعد للجد حمد بعد ماطلعو : يبه انت صادق بالي تقوله صدق ظاري مدمن ؟
التفت عليه الجد حمد : من ستر على مسلم ستر الله عليه يوم القيامه انا كنت ادري به واشوف واستر لله عز وجل بس يوم وصل الموضوع لحياة بنت بريئه مالها ذنب ماقدرت اسكت واشوفهم يغشونها هي وابوها بفلوس ووسخ دنيا
هز راسه ابو رعد بعد ماركب يسوق السياره وابوه ركب جمبه : وهقوتك الشيخ عبد اللطيف يكنسل كل شي ؟
الجد حمد وهو متأكد و وااااااثق انه انتهى كل شي وان الشيخ عبد اللطيف مارح يرمي بنته خصوصاً بعد ما علمه بالحقايق التفت له : ابد الموضوع تسكر
__________________
دخلو بهاج ومطلق لسعود الي كان جالس بالمطعم ياكل بالجلسات الارضيه
ضرب مطلق سعود من ظهره وهو مايدري وجلس جمبه
ضحك بهاج من غصة سعود وهو يجلس
سعود شرب مويه ورفع راسه لمطلق : صاحي انت ؟ مريض ؟
التفت لبهاج : واضح ان جدك ماطلع على حقيقته قدامه ولا !
بهاج وهو يضحك ويأشر عليه : اسأله
مطلق : اقول خل الكلام الفاضي واخلص ترا بنروح انا وبهاج للرياض بتجي معنا ؟
قطب سعود وهو ياكل : ليه ؟
ابتسم مطلق لبهاج ورجع يقول : بندور لي شغل
سعود : يعني جدك وافق ؟
هز راسه بهاج
سعود : معكم معكم اصلاً ماعندي شي هنا بس متى بنروح
مطلق : الليله
التفتو له بهاج وسعود بصدمه
بهاج : وشو الليله ؟
مطلق : الليله بنمشي للرياض
سعود : لا هذا والله مو صاحي
مطلق : بتروحون معي ولا اروح لحالي ؟
سعود : ليه تبينا نفكك عشان تبلي الاودام معك
بهاج : بنروح بنروح بس اهجد
مطلق قام : اجل يلا كل واحد على بينه يرتب شنطته والوعد قدام بيت بهاج
سعود رجع يكمل اكله : عز الله مو صاحي
اخذ جواله بهاج الي دق : هلا يبه ؟
ابو رعد : وينك ؟
بهاج : مع مطلق وسعود امر تبي شي
ابو رعد : لا بس بلغ مطلق ان ابوي راح كلم الشيخ والخطبه والزواج كله تكنسل
ابتسم بهاج وبصوت عالي : اسألك بالله ؟
وقف مطلق وهو ماشي بس جذبه صوت بهاج الي واضح سمع خبر زين والتفت له بفضول
نزل الجوال بهاج والتفت لمطلق وقال : ابشرك زواج البنت تكتسل جدي تو طالع من بيت الشيخ
ابتسم مطلق بفرحه وحس بحماس بصدره وده اليوم قبل بكره يلقى له وضيفه ويزين حياته كله لأجل عيونها الي مات عندها
والتفت لسعود الي مبتسم ويكمل اكله وراح له وشده مع ثوبه من ورا ويقومه على حيله : انت للحين تاكل ؟
سعود الي بفمه اللقمه : طيب طيب يالخفه قمنا
اخذ سعود مشروبه وطلعو وكل واحد راح لبيته عشان يتجهزون لروحة الرياض
_____________________
في الرياض وتحديداً في بيت ابو سياف
دخلت سلمى عند اديم بغرفتها بعد مادخلتها ام سياف للبيت
اديم قامت من السرير بملل : سلمى ؟
سلمى قفلت الباب : ايه سلمى جت تسعفك من الحاله الي انتي فيها
ارتمت اديم على المخده وجلست جنبها سلمى وقالت : اديم ماتعودت عليك كذا !
كسرتي قلبي عليك حتى امك المسكينه منهد حيلها وكلمتني اجي اشوفك قومي خذي شاور وتعالي نطلع نتعشا برا يلا ادوم
اديم ميلت راسها برفض : تعبانه سلمى بعدين
سلمى : لا ياحبيبتي مافي شي اسمه بعدين الى متى بتقعدين بالحاله على الاقل داخل البيت فرفري لا تحبسين نفسك بالغرفه انتي شايفه شكلك ؟
رفعت راسها اديم تسمع عتاب سلمى لها وكملت وقالت : نحفاااانه ومنهد حيلك وعيونك مافيها امل مو هاذي اديم الي اعرفها صاحبتي كانت حيويه وتحب الحياه وكل يوم تطلع معي من مولات ومطاعم ومجمعات فجأة صرتي كذا ماعاد عرفتك حتى البنات فاقدينك ارجعي لنا اديم القديمه
امتلت عيون اديم بالدموع وهي بداخلها نااااااااار تحرقها ومحد حاس فيها ولو يقربون منها شوي يشمون ريحة الرماد
تقدمت سلمى تحضنها بعد ماشافت محاجر عيونها امتلت دموع واول ماحضنتها انهدت اديم بكاء
وغمضت عيونها سلمى بألم من منظرها
ورجعت مسحت دموعها
سلمى : نطلع ؟
هزت راسها اديم ب لا
سلمى اخذت نفس وقالت : طيب نطلع بكرا ماعندك عذر ؟ والله والله يا اديم اذا ماطلعتي معي بكره لا انا صاحبتك ولا اعرفك
ابتسمت اديم بحزن وقالت بصوت مبحوح : ابشري
دق جوال سلمى وردت : هلا ، يلا يلا جايه
قفلت ورجعت لا اديم : الحين انا بروح بس وعدنا بكره !
هزت راسها اديم برضا وتقدمت سلمى تبوسها من خدها وطلعت وقلبها مكسوووور على اديم
وطلعت لام سياف بالصاله
ام سياف : ها بشري يمي وش قالت لك
ابتسم سلمى وهي تقول : بكره ان شاءالله بنطلع انا وياها اغير جوها
ابتسمت ام سياف : ياربي لك الحمد شي احسن من لا شي
سلمى : الحين ياخالتي انا بطلع واذا بغيتي شي يكفي اتصال
ام سياف : ماتقصرين ياقلبي انتي
___________________
وعند سعود دخل للبيت وهو ينادي : الهنوف
طلعت الهنوف : وش فيك بسم الله
تقدم وحاوط كتوفها ومشا معها : ابيك تجهزين لي شنطة حطي فيها ملابس لي لمده خمس ايام اسبوع كذا
الهنوف : ليه وين بتروح ؟
طلعت ام سعود : وش السالفه وش تقول الهنوف وين رايح ؟
سعود : بروح مع بهاج للرياض
ام سعود : وليه عسى ماشر
سعود : مافي شر يمي بس تعرفين مأجز من الشغل ماعندي شي قلت اخاويه ( اروح معه ) اسبوع وارجع
ام سعود : يعني تمشيه
هز راسه سعود ب ( ايه ) والتفت للهنوف الي وافقه وفزت من صوته : يلااا
الهنوف : طيب طيب لا تصارخ فجرت اذني
____________________
دخل مطلق لجدته الي تقرا قرأن بهدوء شافها وقلبه ماطاوته يتركها لحالها وهي ماعندها الا مطلق رفعت راسها وقفلت القران واشرت له يجي عندها ابتسم بهدوء وجلس جنبها
الجده : وش فيك ؟
مطلق : مافيني شي جيت اشوفك
الجده : تبي اكل ؟
هز راسه مطلق ب لا وهو ماوده يتعب جدته وهي كل اشغال البيت عليها ولا عنده القدره يجيب خدامه
وفي جهه ثانيه عند بهاج الي كان جالس وسط خواته وسلطان ورعد موجودين
التفت لا افنان وقال : افنان لك ولا للذيب ؟
افنان وهي تتقهوا : لا للذيب
ضربتها جدتها بخفه : ااااه
ضحك بهاج : احسن يا العوبا
تغريد : خلك منها بهاج وش تبي انا اجيب لك
ابتسم بهاج وقال : فديت قلبك ياام بهاج ابيك تجهزين لي شنطه صغيره حقت اسبوع بروح للرياض
التفتت ام رعد عليه بخوف انه رايح عشان اديم : ليه ؟
كان الكل ينتظر جوابه بخوف : بروح انا وسعود ومطلق عشان وظيفة مطلق
ارتخت ام رعد براحه
رعد : ايه انت تعال ماعلمتني وش السالفه وليش فجأة جدي حبه ؟
ابتسم بهاج : والله علمي علمك الي اعرفه انه دق الصدر له وصار يعزه
تغريد وهي تقوم وتنزل بهاج الصغير بحضن بهاج وتقول : اجل امسك ولدي لين اجهز لك شنطتك
اخذه بهاج بأبتسامه ويرحب ويلعب فيه
ام رعد : طيب بهاج وانا امك ليه ماتوظفه بشغلك الي هنا ؟
بهاج : الي هنا مكتفيين بس بنروح للرياض بشوف عند تركي فيه مجال ندخل مطلق للمعرض ولا عاد مطلق له شغف بالسيارات
الجده : مدام خويك اختار الطريق الصح لا تتركه وانا جدتك
دخل الجد حمد والكل قام يسلم عليه وجلس بوسطهم وبين سوالفهم
قام بهاج من دق جواله مطلق ونزل بهاج الصغير بحضن افنان وطلع برا الغرفه : الو ؟
مطلق بهدوء : هلا بهاج كلمتك عشان اقولك كنسلت ماعاد بروح للرياض ولا ابي شغل
بهاج بصدمه : ولد صادق انت ؟
مطلق : ايه سلم علي على جدك واعتذر لي منه
بهاج : مطلق قل الصدق وش فيك
مطلق اخذ نفس ورجع قال : جدتي يابهاج ماقوا ( مقدر ) اخليها لحالها في ذا البيت اسبوع !
بهاج هز راسه وهو يدري مطلق مستحيل يخلي جدتي وقال : متأكد ؟
مطلق الي كان متحمس : ايه
قفل ورجع للمجلس الي هم كانو موجودين فيه
الجد حمد : وش فيك
بهاج : مطلق
رعد : وش فيه
بهاج يتردد وهو يشوف الجد حمد قدامه : كنسل مايبي يروح
الجد حمد الي بانت عليه ملامح الغضب : وليه ؟
بهاج : مايبي يترك جدته لحالها بالبيت
ام رعد : يالله
الجد حمد : ماهوب عذر
بهاج : كيف ياجدي ماهوب عذر جدته ذي ماله الا هي ومالها الا هو
الجد حمد : كلمه يجيبها هنا !
بهاج سكت
الجد حمد : بيستقبلونها جدتك وامك احسن استقبال ولا يا ام رعد
ام رعد : ايه والله من عيوني ذي قبل ذي وانا شفتها بالزواج حرمه كبيره سمحه
خلها تجي عندنا لين ترجعون
بهاج : وقولك مطلق بيرضا ؟
الجد حمد : عطني اياه اكلمه
تردد بهاج وفز من صوت الجد حمد : عطنييي
اخذ الجوال الجد حمد ودق على مطلق الي رد : هلا يابهاج خلاص قلت لك ماني برايح
الجد حمد : مو على كيفك الرجال يوقف عند كلمته
رفع حاجبه مطلق بصدمه وهو يلعن بهاج بداخله
الجد حمد : اذا عذرك جدتك  جبها عند اهل بهاج ماهم مقصرين معها
قبل يرد مطلق قال الجد حمد : سلام عليكم
وقفل الجوال وقعد يفكر التفت لباب البيت ودخل عند جدته وجلس عنده
الجده : مو كنت بتروح ؟
مطلق اعتدل : يمي اسمعي انا بروح للرياض اسبوع وراجع بدور لي وظيفه اظبط فيها اموري بروح انا وبهاج وسعود
الجده : ماشاءالله ماشاءالله عساك على القوه ايه هذا الكلام الزين رح رح وانا جدتك ترزق الله كم لك ماتوظفت
مطلق : وباخذك عند اهل الشيخ حمد تجلسين عندهم لين ارجع
الجده : على والله ماترك بيتي تبيني اروح عند الناس وش يقولون عني
مطلق : وانا اذا مارحتي ماني رايح وخليك هنا لحالك
الجده : وش بيجيني وانا امك في بيتي الحمدالله
مطلق : انتي تعرفيهم وتحبينهم والشيخ حمد بنفسه دق علي قال جيب جدتك عندنا
الجده : الشيخ حمد ؟
مطلق : ايه
هزت راسها وهي تدري اذا مارحات مطلق مابيروح وبيقعد على حاله لا وظيفه ولا شي وقالت : ومتى بترجع ؟
مطلق ابتسم : ماني مطول بالكثير اسبوع
قامت الجده : اجل باخذ اغراضي انتظر
قام معها يساعدها بملابسها ويحطها لها في شنطه صغيره
وطلعو وقف عند باب بيت ابو رعد وطلع بهاج مبتسم : هلااااا والله بجدة مطلق وجدتنا كلنا
ابتسمت الجده : بسم الله عليك انت بهاج ؟
تقدم بهاج يسلم على راسها : ايه ايه
الجده : وشلونك يابوي انت
بهاج بضحك وهو يحب سوالف كبار السن : بخييييير جعلك بخيييير تعالي تعالي معي اوديك لامي
اخذ بهاج الشنطه من يد مطلق وبدا يمشي معها يدخلها لهم
بهاج عند الباب : يايمه ياولد
طلعت ام رعد واول ماشافت جدة مطلق : هلا وغلا يامرحبا حي الله من جانا
تقدمت جدة مطلق وهي تعكز بعصاها ودخلت بعد ماضيفوها ورحبو فيها
طلع بهاج وهو حاط شماغه على كتفه وبيده شنطته الصغيره
مطلق : ها دخلت
بهاج : ايه ايه سعود وينه ؟
مطلق : ماجا الكريهه
وقف سعود سيارته ونزل لهم
بهاج : وينك
سعود : هذاني جيت
مطلق : بنروح بسيارة مين ؟
سعود : بسيارتي تعالو
طلع حمد ورعد على اصواتهم وسلمو على بعض وعلى مطلق الي اول مره يسلمون عليه كذا بحفاوه
وفز قلب سعود اول ماشاف حمد طالع من البيت عرف انهم جايين من جده وابتسم بخفه وهو يفكر بنوره
انهو سلامهم وركبو السياره سعود يسوق وبهاج بجمبه ومطلق ورا
رعد : هدو السرعه
سعود : لا توصي
رفع يده : فمان الله
وبدا سعود يمشي يطلع برا الديره
مطلق من ورا : عاد انت عندك ماضي بالسواقه بس الله يستر
سعود : اقول اسكت
وبنص الطريق تعب سعود من الم رجله الي من الحادث للحين يحس فيها
بهاج : وش فيك ؟
سعود : لا بس رجلي شدت
مطلق : وقف وقف يمين انزل انا بسوق
التفت سعود لبهاج بضحك : خايف علي
وقف سعود ونزل مطلق وقال بضحك : لا والله عشان ماتودينا في مصيبه
ابتسم بهاج من مناقرتهم في بعض
بعد ماقطعو نص الطريق وفي اخر الليل ارتمى سعود بينام ورا بس مطلق وبهاج مافيهم نوم ابداً
بدا بهاج يحط الشيله الي يحبها وتطربه دايم وبالصدفه مطلق طلع يحبها وبدا مطلق يرفع الصوت عناد في سعود رفع راسه سعود ورجعه وهو يقول : مرضى
بدت الشيله تبدا ومطلق كل شوي يعلي الصوت

نظره تداوينا وتروي ضمانا
نظره تداوينا وتروي ضمانا

اعتدل بهاج بجلسته جمب مطلق الي يسوق وبدا يغني ورقص مع المنشد بحماس ومطلق معه وقالو بنفس اللحظه مع المنشد
اووووووووه
نظره تداوينا وتروي ضمانا
خلك معنا
خلك معنا
اووووووووه

ورجعو بنفس الحماس وبهاج يرقص بيده وعقاله في راسه ومنطرب
ومطلق عينه على الطريق بس منطرب ويرقص بنفس حماس بهاج وسعود خلاااااص طافي يحاول ينام في المرتبه الي ورا
ورجعو يكملون يغنون مع المنشد
العمر مايسوى بدونك دقيقه
مقدر على فرقاك هذي الحقيقه

العمر مايسوى بدونك دقيقه
مقدر على فرقاك هذي الحقيقه

بدت الموسيقى وبدا تصفيق بهاج ومطلق الي كان بنفس اللحظه





لاتنسون النجمه ⭐️

احببتك والله يعلم بالخفاء حيث تعيش القصص. اكتشف الآن