احببتك والله يعلم بالخفاء

بارت 7

الساعه ٥ العصر وبدو اهل بيت الجد الحمد يشيلون اغراضهم ويتجهون للمزرعه طبعاً بعد ازعاج الجد حمد وابو رعد

افنان وهي تشيل الاكياس وطالعه من باب البيت للمزرعه القريبه منهم : ااااه انا متتت معد فيني حيل
نوره : وانتي وش كالفك تروحين للمزرعه مشي ليش ماركبتي مع خالاتي ورعد بالسياره
افنان : وهو في مكان عشان اركب ؟
نوره : خلاص امشي امشي بس
افنان : عاد تغريد تشيل باقي الحلويات الي بالمطبخ يارب ماتطيح منها بس
العنود ويدها مليانه اكياس : تبوني ارجع لها ؟
نوره : اقول كملي بس هي بتلحقنا تغريد مو غبيه
سلطان وهو راكب سيارة بهاج الشاص ومر من عندهم ومسرع ويطق بوري : هيييه يلا شيل شيل انت وياه
اخذت افنان الحجر الي على الارض ورمته عليه : وقف خلنا نحط الاغراض معك
طبعاً وقف سلطان ؟ لا طبعاً كمل مشواره لين وصل للمزرعه
والبنات وصلو وراه وهم ميتيننن
عند تغريد في المطبخ بعد ما رتبت الحلويات وبدت تشيل اول صينيتين وجت تطلع من عند الباب وماانتبهت للعتبه وطاحت وطاح معها الصينيه شافها حمد من بعيد الي ماكان يدري في احد بالبيت باقي اول ماشافته تغريد رجعت الغطوه على راسها و وجها وجاها حمد وقال : سلامات صار لك شي ؟
طبعاً كانت تغريد ضايق صدرها على الحلا الي تعبانه عليه وخانقتها العبره : لا لا مافيني شي
حمد : روحي روحي انا اجيبهم
تغريد ماكان لها خلق وبصوت مرتفع شوي : وهو بقا شي عشان تجيبه ؟ انكبو كلهم
سكت حمد وحس بخنقة عبرتها الي مبينه من صوتها وقامت تغريد حطت الصينيه على جب ومشت بتطلع للمزرعه فكر حمد وش يسوي وجت في باله فكرة انه يروح يشتري حلا جديد وفعلاً ركب السياره وجا يمشي
شافه بهاج : ولد وش فيك وين بتروح ؟
حمد : بجي بجي ماني مطول
بهاج : جدي لا يشوفك
حمد : ماعليك
ومشا حمد وراح لمحل الحلويات وشراء افضل صينية حلا بالمحل ورجع وعطاها الخادمه توديها للحريم صح مابينهم شي لكن شاف خنقة عبرتها ومايبي يكسر بخاطرها
_________________
عند البنات الساعه ٧ المغرب وبدو الناس يجون للمزرعه
كانت تغريد تشتكي للفنان انها تعبت على الحلا وكان شكله مره حلو اخر شي طاح طبعاً راح عن بالها حمد ونسته تماماً

افنان : يبنت حصل خير اصلاً شوفي الطاوله مليانه حلويات
تغريد : انا مو عن كذا وانا تعبي وين راح اف
افنان : عاد انتي بعد لو سمحتي في احد مايشوف عتبه الباب
تغريد : افنانوه لا تزيدين علي ماني ناقصتك
دخلت الخادمه عليهم ومافي في المجلس الا البنات و الجده اما ام رعد و ام سياف كانو في المطبخ يعدلون الاشياء الباقيه
وكانت العنود عند السماعه تضبطها ونوره جالسه مع افنان وتغريد
الجده للخادمه : وشو ذا ؟!
الخادمه : هذا حمد يعطي انا
نوره بصوت خفيف جب البنات : حمد ؟
تذكرت تغريد الموقف المحرج الي صار بينهم وانها رفعت صوتها عليه وقالت : اللله يلعني بعدد !
افنان و نوره : ليه ؟
تغريد : بنات انا نسيت اقول لكم يوم طحت شافني حمد
نوره : وطبعاً حمد جاب الحلا هذا نيابه عن الحلا الي طاح
تغريد بفشله : ايه
نوره : طيب وش فيها
افنان : اي عادي مافيها شي
تغريد : المشكله مو هنا المشكله انا كنت زعلانه ونفخت عليه
نوره : يابنت الحلال عادي حمد مايركز وبسرعه ينسى
تغريد : يافشلتي
افنان : احسب عندك سالفه والله
وكملو البنات السوالف والضحك الا تغريد الي كانت متفشله جداً منه وفكرت كيف جاب الحلا وهو ماله دخل
الجده : الا وين اديم وسياف يا ام سياف ماشفناهم
ام سياف : بيجون ياعمه بس انا سبقتهم عشان اساعدكم بشي ولا شي
ام رعد : ماقصرتي والله
ام سياف : ماسوينا شي
دخلت العمه شيخه وبناتها : السلام عليكم
الكل : وعليكم السلام
العمه شيخه وهي تسلم على الكل بعدين راحت تسلم على الجده شالت الجده يدها وقالت : وينك من اليوم لا جيتي ساعدتي ولا شي جالسه في بيتك وبعد المغرب شرفي ليش ماتشوفين ام سياف مالها دخل بالاشغال هاذي والله يعافيها جايتنا من العصر تساعد ولا قالت انا وش دخلني
عما الصمت على الكل وبصوت افنان الخفيف حق البنات تغريد ونوره والعنود : اوووووه بردت كبدي احسنننن
تغريد : اصص لا تسمعك وتلعن خيرك عاد مو ناقصين لها
افنان : تخسي هي و وجها
نوره : يبنت اسكتي لا تجيبين فينا العيد
العمه شيخه وهي تطالع في ام رعد وام سياف ومتفشله : هذاني جيت يا يمه وزي ماقلتي ام سياف جتكم تساعدكم خلاص انا وشهوله
الجده : وبنتي منهي انتي ولا ام سياف وام سياف ماهي مكلوفه لكن انتي المكلوفه بس الله يخلف
ام رعد : خلاص يا عمه حصل خير !
العمه شيخه بعصبيه : انتي اسكتي لا تدخلين
سكتت ام رعد
افنان : وش فيها ذي تنافخ على امي ؟
تغريد وهي توقف وتقول : لو سمحتي يا عمه لا ترفعين صوتك على امي وامي مالها دخل بهواش جدتي لك
هدى : وانتي وش دخلك الحين ؟
قامت افنان : اساساً انتي الي وش دخلك
تغريد : اذا فيه احد بيرفع صوته على امي بيلقنا قدامه سواً عمه او غيره
العمه شيخه : والله وطلع لنا لسان
العمه عواطف : تعوذو من بليس وش فيكم الضيوف بيجونا بعد شوي
ام رعد : خلاص يابنات اجلسو حصل خير
جلسو تغريد وافنان بعصبيه
هند : ايه كذا يا شطار
افنان وهي تبي تقوم بس مسكتها نوره : احترمي نفسك احسن لك
الجده وبصوت عالي وبعصبيه : وجعععع الله يوجعكم مافي احترام ولا تقدير لي وانا جالسه هنا كأني طرطور
عم الصمت على الجميع ..
الجده : انثبري يا شيخه انتي وبناتك ولا اسمع لكم صوت
ولا انتم يا تغريد وافنان خلاص عاد ماعاد بقا حيا
جلسو الكل في اماكنهم وكانو البنات يكرهون بنات العمه شيخه بشكل مو طبيعييي وبعد هاذي السالفه خلاااص ماعاد يطيقونهم
____________________
عند اديم وهي تتهاوش مع سياف وملابسه الي مأخرها