احببتك والله يعلم بالخفاء

بارت 24

ومن بكره الساعه ٤ العصر والبنات يتجهزون عشان يروحون للرياض وبكل حمااااس
نزل بهاج الي ماكان يدري ان خكنوره والعنود بيروحون معهم بعد ماسلم على الجده والعمه عواطف
بهاج : وين امي والبنات ؟
العمه عواطف : الحين بيجون
بهاج : زين اجل انا بالسياره
الجده : تقهوا !
بهاج : ماعاد في وقت ياجده
صبت العمه عواطف قهوه لبهاج ببياله ومدت له : خذها عشاني
‏وماردها بهاج واخذها واتجهه للباب وشاف افنان و وراها نوره وهم لابسين ومتجهزين صد على طول وهو ينادي : افنان
جت افنان له ونوره راحت عند العمه عواطف والجده
افنان : هلا
بهاج بعصبيه : اجل مو برايح الا انتي وتغريد وامي هاه
افنان : وش نسوي لو قلنا لك ان البنات بيروحون معنا بترفض
بعدين ترا امي معنا
بهاج : لاااا ياشيخه
جت ام رعد وهي لابسه ومتجهزه : وش فيه ؟
بهاج : لا مافي شي بس ماقلتو لي بنات عمتي بيروحون
ام رعد : و وش فيهم لا راحو معنا ؟
بهاج الي تنرفز : يمه تدرين اني ماحب احد مو محرم لي يركب معي !!!
ام رعد : يا حبيبي ترا ماهم رايحين معك لحالك انا معكم يلا يابوي عيب علينا الحين نقول لهم
بهاج الي مستحيل يرد امه ابداً طلع وماقال شي وهذا يعني انه موافق
وبعد ماسلمو البنات على الجده و العمه عواطف اتجهو للسياره
الي كان راكب قدام ام رعد و المتربه الثانيه تغريد ونوره وافنان و الاخيره العنود وبهاج طووول الطريق ساااااكت مايتكلم بكلمه
الين مااتصل سعود عليه
بهاج : هلا سعود
البنات كانو يسولفون بصوت خفيف معدا نوره الي اول ماسمعت اسم سعود لفت انتباها
سعود : ها وين وصلت ؟
بهاج : باقي على الرياض ساعه ساعه ونص
سعود : اجل لا وصلت عطني خبر
بهاج : ابشر
وقفل بهاج
ام رعد : هذا سعود ماغيره ؟
بهاج : ايه
ام رعد : ياحليله
تغريد وهي تمسك نوره : ها وش قلتي
لفت نوره : وش قلت ؟
افنان : نوره انتي معنا ولا وينك
نوره : معكم معكم وش تقولون
العنود بضحك : معنا و وش تقولون
واستمر الطريق على سوالف البنات اما بهاج الي كان صامت و وده لو يوصل بأسرع وقت
________________
وعند رعد وساره الي جا وقت خروجهم من المستشفى وساره تتجهز وتساعدها امها ورعد الي طلع يكمل أجراءات الخروج
ورجع شافهم جاهزين اخذ بهاج الصغير بحظنه وطلعو متجهين لبيت اهل ساره تقعد عندهم مده وترجع
واول ماوصلو نزلت ام حسن ( ام ساره ) وهي تساعد ساره تنزل
ونزل رعد الاغراض ودخلت ام حسن وقعدت ساره عند الباب تسلم على رعد وبعد ما مد رعد بهاج لـ ساره اخذت ساره بهاج وهي مبتسمه
رعد : انتبهي لنفسك وعليه
ساره : من عيوني
باس رعد ساره من جبينها ورجع يركب السياره واول ماسكرت ساره الباب مشى رعد
________________
واخيراً عند اصحاب السفره اول ماوصلو الرياض بدو يدورون لهم على شقه طبعاً لازم تكون شقتين عشان بهاج يكون بشقه لحاله
والساعه ١٢ باليل وبهاج يدور وتعبانين وقف بهاج عند شقق ونزل وهو ميت تعب ونوم وبعد ماحجز معهم رجع للسياره
بهاج : يلا
ام رعد : اخذت الشقه ؟
بهاج : ايه
رجع بهاج لشنطة السياره يعطي العامل الشنط والاغراض
وبعد مادخلو البنات الشقه وهم ميتين تعب
نادت ام رعد بهاج
بهاج : لبيه
ام رعد : يلا نم عشان بكره العصر نطلع نشوف اغراضنا
اشر بهاج على خشمه وهو ميت نوم
بهاج : ان كانكم تبون شي اتصلو علي تراني هنا بالشقه الي جبكم
ام رعد : الله يسر لك امرك
وقفلت ام رعد الباب ويوم جا بهاج بيدخل الشقه تذكر انهم جايين من طريق طويل ولا مرو مطعم ولا معهم اكل ولا شي واتجه للسياره بكسل
وجاب لهم عشاء واغراض من البقاله واول ما وصل لباب الشقه اتصل على تغريد لان يدري ام رعد بتنام على طول
تغريد : هلا بهاج
بهاج : نمتو ؟
تغريد : لا مانمنا انت ليش مانمت
بهاج : اطلعي لي عند الباب
تغريد : زين
وقامت تغريد من جلسة البنات الي كانت في غرفه بنور خافت وكل وحده ببجامتها وعلى وشك ينامون وهم جوعانين
واول مافتحت الباب انصدمت من المنظر والاغراض الي جايبها بهاج تكفي دوله
تغريد بشهقه : وشو ذا ؟
بهاج الي ماكان له خلق وميت نوم وتعب : بعير
ضحكة تغريد وهي تقول : لا صدق بهاجي انت رايح تجيب لنا اغراض وعشا ؟
بهاج : وش تشوفين ؟ بعدين كم مره قايل لك لا تقولين لي بهاجي
تغريد : يا حبيبي انا وانت مانمت؟
بهاج : بنام الحين بس اخذي الاغراض يلا
وتقدمت تغريد شوي برا باب الشقه تاخذ الاغراض ومر من عندهم واحد
بهاج بسرعه وهو يرجع تغريد ورا
تغريد : وش فيك
بهاج : خلاص ادخلي انا بحطها عند الباب بس لحد يطلع لي
تغريد الي ابتسمت وعرفت وش قصده : طيب انت اخذت لك اكل ؟
بهاج : اي معي من البقاله
وتقدم بهاج يشيل الاغراض يحطها عند الباب وطلع على طول
تغريد وهي تنادي البنات بصوت خافت عشان ام رعد ماتقوم من نومها : بنات يا بنات
جو البنات وهم مصدومين من كثرة الاغراض
العنود : اللله من جايب ذا ؟
افنان : اكيد بهاج
نوره وهي تتقدم تاكل : اففف والله اني ميته جوع
تغريد : بنات مو هنا اخذو العشا للغرفه امي لا تقوم مسكينه توها نامت
وشالو البنات العشا واتجهو للغرفه اما تغريد شالت اغراض البقاله وحطتها بالمطبخ ورجعت للبنات
وعند بهاج الي اول مادخل الشقه فصخ ثوبه وارتما على السرير بتعب وماجت ٥ دقايق الا هو نااايم
وعند البنات الي اول ماخلصو عشا كل وحده دخلت في نومه عميقه
_________________
ومن بكره في الديره الساعه ٢ الظهر عند غداء الجده الي كان موجود فيه سلطان ومحمد والعمه عواطف والجده
اما الجد حمد الي اخد ابو رعد و رعد وحمد يخلصون اشغال بالمزرعه وعند العمال
العمه عواطف : ياغلي على العيال ماتغدو معنا
سلطان بضحك : موفرين
العمه عواطف وهي تضرب سلطان مع كتفه بمزح وضحك وهي الي تحب سلطان وطقطقته دايم
وبعد ماخلصو غداء تربع سلطان وبدا يسولف مع الجده والعمه عواطف
سلطان : والله بتاخذون عامود بيتنا يا عميمه
الجده بمزح : ليه تبيها تقابل وجهك دايم
ضحك محمد وهو يطقطق على سلطان
وسلطان الي رغم الذبه عليه ضحك وقال : مالك دخل انت بيني وبين رفوعه اسم الجده ( رفعه )
ضحكت الجده الي تحب سلطان بجنون وماقالت له شي معن ماتحب احد يناديها بأسمها
العمه عواطف : عشنا وشفنا يا سلطانوه اجل رفوعه هاه
سلطان وهو يغمز : يعني بينا قصة عشق وكذا
الجده : قل يالله
سلطان وهو يعدل جلسته ويقول : بدت جلسة الدعاوي المفضله لي هاه يلا يالله
الجده : اني اختار لك بنت الحلال الي تصونك وتحفظك
اختفت ابتسامة سلطان لحظه ورجعت اول ماذكر الهنوف وقال بمزح بصوت شبه عالي : امييييييين
ضحك العمه عواطف والجده
محمد : توك توك حبيبي على الزواج انت خلص جامعتك بالاول
سلطان : اصص انت مالك دخل
______________________
وفي الرياض بعد صلاة المغرب عند بهاج الي ينتظر البنات بالسياره يطلعون من الشقه عشان يروحون للسوق ومستحيل ابداً يدق بوري
واخيراً جت ام رعد
بهاج بملل : وين البنات ؟
ام رعد : هذاهم جو
فتحت الباب افنان ودخلت و وراها العنود وتغريد ونوره
بهاج بصوت خفيف على ام رعد الي بجبه : يمه الباب
فتحت بابها ام رعد ورجعت سكرته
بهاج : لا الي وراك ( قصده باب نوره )
سمعت نوره ورجعت فتحت الباب وسكرته
وبدا بهاج يمشي
وفي الطريق جا اتصال لـ ام رعد ( ام سياف ) ال
ام رعد : هلا وغلا ومرحبا
ام سياف : وييين الناس جايين للرياض ومادرينا
ام رعد : والله جايين ناخذ لنا اغراض للعرس وبنرجع ماحنا مطولين
ام سياف : تعالو القهوه الحين
ام رعد : لا الله يكثر خيرك يا ام سياف
شد بهاج على الديركسون اول ماسمع انها ام سياف
ام سياف : لا والله ثم والله لتجون الحين قبل ماتروحون للسوق
ام رعد الي ماقدرت تقول شي : طيب طيب ابشري بس هاه ماحنا مطولين
ام سياف : هاذي الساعه المباركه
وقفلت ام رعد ولفت على بهاج وقالت : رح بيت عمك ابو سياف اعزمونا على القهوه
البنات الي استانسو ومن زمان عن اديم ومشتاقين لها مررره
وبهاج الي توتر هو يفرح ولا وش يسوي
افنان : اللللله مره مشتاقه لا اديم
نوره بصوت خفيف : والله حتى انا
بهاج : مانقدر الحين مستعجلين
افنان : لا بهاااج
بهاج الي مايحب احد يترجاه قدام احد سكت ماقال شي
ام رعد : لا بنت الحلال حلفت لازم نروح وعمك بعد تقول موجود
بهاج ماقدر يقول شي واتجه لبيت ابو سياف
وعند ام سياف الي فتحت باب غرفة اديم تعلمها انهم بيجون واديم توها طالعه من الحمام وبروبها
ام سياف : اديممم
اديم : لبيه
ام سياف : يلا البسي بسرعه واطلعي عمتك ام رعد والبنات جايين
اديم بصدمه : من ؟؟
ام سياف بضحك : مسرع نسيتيهم يلا يلا يااديم
اديم بفرحه : ياللله من زمان عنهم ليش جايين ؟
ام سياف : جايين ياخذون اغراض للعرس يلا انا بنزل الحقني
اديم : تمام
وعلى طول اول ماطلعت ام سياف من الغرفه اتجهت اديم للدولاب وبعد مالبست وزينة شعرها وحطت مكيجها الخفيف نزلت وهي مررره متحمسه
ورتبعت الحلا والقهوه وجلست تنتظرهم بحماس
دخل ابو سياف : ماشاءالله قرة عينك يا اديم هاه
اديم بضحك : الف من زمان عنهم
وطق الباب وراحت الخادمه تفتحه ودخلو البنات قسم الحريم وراح بهاج عند عمه لمجلس الريجيل
تقدمت تغريد حضنت اديم واديم حضنتها بكل حب وتجمعو البنات على اديم وكل وحده تحضن
ام رعد : يا عيبيكم عيباه سلمو على عمتكم بالاول
تقدمت ام سياف تسلم على ام رعد وبضحك قالت : خليهم يا بنت الحلال مشتاقين
ام رعد : وشلونك عساكم بخير
ام سياف : الحمدالله كلش تمام
وبعد ماخلصو البنات اتجهو لـ ام سياف يسلمون عليها وبعد ماسلمو الكل جلس ويسولف بلهفه وقامت اديم تصب لهم القهوه وتوزع الحلا وهي مررره مستانسة بوجودهم
ام رعد : اخبارك يا اديم
اديم : بخير الحمدالله ياعمه انتي اخبارك
ام رعد : بخير يا عيني بس والله ياام سياف جيتكم للديره وروحتكم منها بسرعه خليتونا نشتاق لكم
ام سياف : ههههههههه شفتي كيف الا صح الف الف مبروك يا ام رعد بزواج تغريد ومبروك يا بنات بزواج حمد
ام رعد : الله يبارك فييك وعقبال سياف والحلوه
نوره : الله يبارك فيه ياعمه بس هاه لازم تجون !
ام رعد : عاد اذا ماجو صارت علوم
ضحكت ام سياف : ومعقوله مانجي نجي وحنا نركض وعاد معنا اديم الي حبت الديره بتجيبنا غصب
ضحكو الكل بس لفت انتباه تغريد لما قالت اديم تحب الديره وابتسمت على خفيف وتذكرت بهاج
ام رعد : الا صدق وين سياف
ام سياف : ياحبيبي من اليوم يلعب وتوه غط في النومه
ام رعد : الله يصلحه
وبدو ام رعد وام سياف يسولفون والبنات بزاويه يسولفون مع اديم
___________________
وفي مجلس الرجال عند ابو سياف وبهاج وبسوالف العاديه
ابو سياف : مبروك زواج تغريد وعقبالك يا الامير
بهاج الي اخذ الدله من ابو سياف بالغصب يصبها عنه مد له فنجال وهو يقول : الله يبارك فيك ياعمي
ابو سياف بطقطقه : هااااه درينا جانا العلم
بهاج بخوف : وش علمه؟
ابو سياف : ماشاءالله عليك طلعت شاعر من ورانا
بهاج بعد مانزل راسه ورجع رفعه : مايتسما شاعر بس ابيات اكتبها
ابو سياف : مايتسما شاعر وقصيدتك كسرت الجولات
بهاج بخوف : وصلت لك ؟ شفتها ؟
ابو سياف بضحك : وكيف ماشوفها بس صح لسانك وانا عمك
بهاج الي كان خايف القصيده توصل لـ اديم وتسمعها قال في نفسه ( حسبي الله عليك يا سعود )
__________________
وعند البنات وهم يسولفون عن الاسواق
تغريد : اديم بمأنك من اهل الرياض وتعرفين الرياض علمينا بأهم المولات عندكم
اديم بعد ماعدلت جلستها : غاليه والطلب خريص شوفي
وبدت تسولف عن الاسواق بكل ماااافيها والبنات وبالاخص تغريد يسمعونها بأنتباه
واذن صلاة العشا
ام سياف : اديم امي جيبي لعمتك والبنات سجادات
قامت اديم : ابشري
قامت والبنات يراقبونها ويراقبون جماللللها الناعم وهم للحين معجبين فيها
ورجعت عطتهم السجادات وبدو يصلون وطلعت اديم فوق تصلي وترجع لهم
وعند ابو سياف وبهاج الي طلعو للمسجد يصلون
وبعد الصلاه ومع رجعت بهاج وابو سياف من المسجد وقف بهاج عند السياره وقال : حنا نستأذنك ياعمي تأخر الوقت وحنا مارحنا للسوق
ابو سياف : طيب تعشو عندنا ؟
بهاج : لا الله يغنيك ياعمي بس والله معاد بقى وقت
ابو سياف : الشكوا لله بس دقايق اسلم على البنات وبيطلعون لك
بهاج : ابشر
وقف بهاج مستند على السياره
وعند ابو سياف الي دخل وهو ينادي : ياولد
ام سياف : دقايق
لبست ام رعد عبايتها
ام سياف : خلاص تعال
ودخل ابو سياف وهو يقول : السلام عليكم
الكل : وعليكم السلام
ابو سياف : اخبارك يا ام رعد
ام رعد : بخير عساك بخير
وتقدم على البنات يسلم عليهم ويطقطق معهم
ابو سياف : اخباركم يا اجمل بنات
نوره : بخير ياخالي انت اخبارك
ابو سياف : ههههههه بخير بخير
ولف على تغريد وهو يقول : مبروك يا عروسه الله يفتح لك باب الخير
تغريد بخجل : امين
ام رعد : يلا يابنات
ام سياف : وين والله كنا نبيكم تتعشون عندنا
ام رعد : تعشت عندك العافيه وانا اختك بس ماعاد بقى وقت الجايات اكثر
تغريد وهي تقول لـ اديم بصوت خافت : اديم عادي تروحين معنا بس تساعديني على المحلات الكويسه ؟
اديم : ابشري من عيوني بس اول لازم ناخذ موافقة ابوي وامي
جمعت تغريد البنات وقالت لهم انهم بياخذون اديم معهم والبنات طبعاً ماقصرو بفرحتهم الى ماسمعت ام سياف
ام سياف : شعندكم
البنات الي لفو بسرعه : ماعندنا شي
تقدمت تغريد وقالت : الحقيقه ياعمه ودنا ناخذ اديم معنا عشان تساعدني بالمحلات وهي اخبر بمولات الرياض
لفت ام سياف على اديم الي كانت ساكته وعينها بالارض
ام رعد : اي والله والبنات صادقات خل ناخذ اديم تروح معنا ونرجعها لا خلصنا
ابو سياف الي يحب اديم والغالي يرخص لها بالنسبه له : الي تقوله بنت طلال يصير
فزت اديم تحظنه : هذا ابوي الي اعرفه
ام سياف : الشكوا لله الامر جا من فوق
ام رعد : هههههههههه يلا يااديم البسي وتعالي مع البنات
ام سياف : ماتشوفون شر
راحت اديم ركض لغرفتها تلبس ونزلت للبنات وطلعو سوا وهم مبسوطين و قدامهم ام رعد بس الي ماكانت تعرفه اديم ان الي جايبهم بهاج والي بيوديهم بهاج
وصدمتها اول ماشافته مستند على السياره
ام رعد : يلا يا بوي مشينا
لف بهاج ويوم فتح الباب بيركب سمع تغريد تقول : يلا اديم اركبي
ولف بسرعه وجت عينه بعين اديم الي امتلت دموع
ورجع صد وركب السياره وبعد ماركبو البنات ومابقى الا اديم وتغريد سمع اديم تقول : اءء تغريد انا برجع شوفي بعد السياره مارح تكفينا
تغريد : لا والله ماترجعين والسياره بتكفينا
اديم الي كانت مصره ترجع : تغريد
تغريد الي نزلت راسها لـ ام رعد وقالت : يمه اديم تقول برجع
سكت بهاج وشد على الديركسون و وده يقول ( تكفين اركبي ) ووده ماتركب
البنات وهم يقولون : لاااا اديم
ام رعد : والله ماترجعين بس اركبي
اديم الي مابيدها شي اطرت تركب وبعد ماركبت تغريد سكرت الباب ومشا بهاج متجهين للمول
واول ماوصلو للمول نزلو البنات اما ام رعد الي استندت على يد بهاج وراهم وهم يمشون من محل لمحل
ودخلو البنات
المحل ومعهم ام رعد اما بهاج الي دق عليه صديقه تركي وبدو يسولفون عن الشغل وعلمه بهاج انه مايقدر يجي الدوام لان زواج ولد عمته واخته ومن هل الكلام
وبعد ساعه بالظبط وايادي البنات امتلت اكياس تجمعو على طاوله في الكوفي يرتاحون شوي اما بهاج الي كان يتمشى بالمول لين مايخلصون
قامت تغريد : يوووه نسيت حاجه
ام رعد : وشهي
تغريد : انتم خليكم بروح انا واديم نجيبها ونجي بسرعه
ام رعد : لا تطولون عشان نطلع
تغريد : من عيوني
وقامت اديم معها متجهين للمحل وبعد مااخذت اغراضها طلعو من المحل راجعين الكوفي واديم منتبه ان في واحد قاعد يلاحقهم وبالاخص اديم
بس اديم ماقالت شي وساكته وماتبي المشاكل والرجال ماسك تليفونه ويمشي ورا البنات ( تعرفون هاذي العينات )
واديم خوفها كل شوي يزيد ودها لو يرحون للكوفي بسرعه
بس المصيبه الاكبر كان بهاج يتمشى في المحلات حولين اديم وتغريد وطلع من المحل وانتبه لـ تغريد وبجبها اديم الي ماسكه يد تغريد بخوف ولفت انتباهه الرجال الي يلاحقهم من مكان لـ مكان واذا وقفو وقف معاهم واذا مشو مشى معاهم
كشر بهاج بعصبيه وجنون الارض تجمعة براسه تقدم للبنات وهو يناديهم : تغريد
وقف تغريد واديم بجبها وهنا اديم صابتها ام الركب وتقول في داخلها ( اكيد الحين بتصير مصيبه )
والي قهر بهاج اكثر لما وقفو البنات وقف معهم هذا الرجال
تقدم بهاج له وهو يقول : خير ؟
الرجال : تكلمني ؟
تقدم بهاج ويمسكه مع صدره ويرميه : لا اكلم الي وراك وش تبي ورا محارمنا ؟؟
الرجال بخوف : هاه من محارمك
بهاج بعصبيه الي خوفت اديم بس تغريد متعوده على عصبية بهاج
تغريد لـ اديم : وش يصير ؟
اديم : هذا الرجال يلاحقنا من اليوم
تغريد بصدمه : من حنا ؟
اديم : ايه بس ماقلت شي قلت يمكن انه يروح بس ماراح
تغريد : ياااويلي بهاج اكيد بيذبحه
سكتت اديم بخوف
بهاج : ولددددددد
الرجال الي ماقدر يقول شي : اءءء
وعلى طول لف وراه ومشى بخطوات كبيره
اما بهاج الي مسكه واحد من المول : صل على النبي
ورجع بهاج يلف على البنات بغضب كبيييييير
وتقدم وهو يقول ويطالع في عين اديم : امشو قدامي
تغريد : بهاج والله مادرينا
بهاج بصوت خافت وبغضب : خلاص يا تغريد امشي
ومشت تغريد ومشت معها اديم الي صابها رعب من نظرة بهاج وبهاج وراهم وهو حاقد على الرجال للحين
واول ماوصلو
بهاج : يلا يمه مشينا
ام رعد الي انتبهت ان بهاج معصب : وش فيك ؟
بهاج : مافيني شي
نوره لـ تغريد بصوت خافت : وش فيكم ؟
تغريد بخوف : كان يلاحقنا واحد وشافه بهاج وصدق كان بيذبحه
مسكت نوره قلبها وهي تقول : يممممه
بهاج : يلا يا ولد
ومشو البنات وفي النهاية اديم الي ودها تبكي من الخوف و وراهم بهاج
واول ماوصلو لـ بيت ابو سياف نزلت اديم
ام رعد : مع السلامه يا حبيبتي
اديم : مع السلامه يا عمه باي بنات
البنات كلهم : باي
ودخلت وهي قلبها مع بهاج وقلب بهاج معها
واول ماتأكد بهاج انها دخلت وسكرت الباب بدا يمشي متجهه للشقه

.