မင်းရဲ့အမိန့်အတိုင်းတည်စေ (Complete)

Chapter 26

(Unicode)

၂ ဖက်လုံးမှ အကြိတ်အနယ်တိုက်ခိုက်နေကြသည်။ ဒီတစ်ခါတော့ရှောင်ကျန့်တို့ လက်ရုံးကျသွားခဲ့လေပြီ။ အကြာကြီးတိုက်ထားရ၍ ပင်ပန်းနေသည်ကတစ်ကြောင်း ၊ ရင်ဆိုင်နေရသောရန်သူမှာ အင်အားလုံးဝမမျှနိုင်သည်ကတစ်ကြောင်း စသဖြင့် အားအင်ကုန်ခမ်းနေခဲ့လေပြီ။ ရှောင်ကျန့် ၊ အိမ်ရှေ့စံဝမ်ကျင်း နှင့်တခြားမင်းသားတို့မှာ တောင့်ခံနေဆဲ။ လက်အောက်ငယ်သား စစ်သည်တို့မှာ ထပ်တောင့်မခံနိုင်တော့ဘူးထင်ရဲ့။ အထူးဖွဲ့စည်းထားသော ကိုယ်ရံတော်တပ်မှစစ်သည်များသည်ပင် အထိနာနေလေပြီ။ ထိခိုက်ဒဏ်ရာရပြီး သေဆုံးသူများမှာ မိနစ်ပိုင်းအတွင်းတွင် မြင့်တက်နေပြီး ၊ ထိုအရာကပင်စစ်သည်များ၏ တက်ကြွနေသောစိတ်ဓါတ်ကို ကြောက်စိတ်များဖြင့်ဖုန်းကွယ်လိုက်လေသည်။ ရှောင်ကျန့်ကတော့ ရသလောက်အားနှင့်တောင့်ခံကာ ကြေးစားများနှင့်အပြိုင်တိုက်ခိုက်နေရာမှ သူတစ်ချက်သတိလွတ်သွားသည့်အချိန်တွင် တစ်ဖက်ရန်သူမှဓါးချက်သည် သူ၏ ဘယ်ဘက်လက်မောင်းဆီသို့ သက်ဆင်းသွားခဲ့လေသည်။ အပေါ်ယံကြောကိုသာ ထိသွားသော်လည်း သွေးများက လျှံထွက်လျက်။ အခြေအနေကိုစောင့်ကြည့်နေသော ဝမ်ရိတစ်ယောက် ၊ မျက်စိပျက် မျက်နှာပျက်ဖြစ်ခါ ရင်ထဲတွင်ဗလောင်ဆူနေလေပြီ။ စိတ်ပူလွန်း၍ ဆင်းလာမည်လုပ်တိုင်း ရှောင်ကျန့်ကအမူအရာနဲ့ဟန့်လိုက်ပြန်ရင် သူ့ခင်ဗျာ မလှုပ်ရဲပြန်။ အရင်ကရှောင်ကျန့်ကိုဟန့်နေရသည်မှာ ဝမ်ရိ ၊ အခုတော့အရင်နှင့်ပြောင်းပြန်ဖြစ်လို့နေလေသည်။ ရှောင်ကျန့်ဒဏ်ရာကို လက်နှင့်အသာအုပ်လျက် သူ၏ဝတ်စုံမှ အဝတ်စကိုဆွဲဖြဲက ထိုအစပိုင်းနှင့် ဒဏ်ရာကို ဖိပြီးစည်းထားလိုက်လေသည်။ ရှောင်ကျန့်ဒဏ်ရာကို ပတ်တီးစည်းနေချိန် အိမ်ရှေ့စံဝမ်ကျင်းက ကာ၍ တိုက်ခိုက်ပေးသည်။ ရှောင်ကျန့် အနာကိုစည်းပြီးသည်နှယ် တစ်ပြန်ထ၌ တိုက်ပြန်သည်။ သူ့တစ်လှည့် ကိုယ့်တစ်လှည့်နှင့် အတော်အထိနာနေလေပြီ။

ရှောင်ကျန့်ခေါင်းမာသည်ကတော့လွန်သည်။ အမှန်အတိုင်းဆို ဝမ်ရိတို့ကိုဆင်းလာခိုင်းပြီးကူခိုင်းလျှင်ရသည်။ ဒါပေမယ့် မကူခိုင်းရုံတင်မကသေး ကျန်အားနည်းနေသည့်စစ်သည်တွေအတွက်ပါ ခေါင်းခံပြီးကာတိုက်ပေးနေသေးသည်။