လယ်တောဆီမှ လုပ်ကြံသတ်ဖြတ်သူ (MM-translation)

ဖန်းဟွာမြို့၏ ခေါင်းမာသောလယ်သူမအမျိုးသမီးကြီး

[Unicode]
လယ်တောဆီမှလုပ်ကြံသတ်ဖြတ်သူအခန်း၁၄။ ။ ဖန်းဟွာမြို့၏ ခေါင်းမာသောလယ်သူမအမျိုးသမီးကြီး

ဖန်းဟွာမြို့သည် နာမည်သာမြို့ဖြစ်သော်လည်း အိမ်ဒါဇင်အချို့သာရှိသောရွာတစ်ရွာထက်မပိုပေ။ ရွာသားများသည် ထိုသို့ခေါ်ရသည်ကိုသာအသားကျနေကြသည်မှာ ဖန်းလော့မြို့အနီးအနားတွင် အခြားမြို့မရှိသောကြောင့်ဖြစ်သည်။ ဖန်းဟွာ(ပွင့်လန်းနေသောပန်းများ) ဆိုသောနာမည်သည် လွန်ခဲ့သောနှစ်များမှ ဆင်းသက်လာခြင်းဖြစ်ကာ ထိုနေရာသို့ ပထမဆုံးရောက်လာခဲ့သောလယ်သမားများက မက်မွန်ပန်းပင်မျိုးစေ့များစွာအား ထိုနေရာတွင် စိုက်ပျိုးခဲ့ကြသောကြောင့်ဖြစ်သည်။ ထိုမျိုးစေ့များမှပေါက်ဖွားလာသောမက်မွန်ပင်များသည် နွေရာသီကာလတွင် အားလုံးပွင့်ဖူးဝေဆာကြကာ ရင်သပ်ရှုမောဖွယ်မြင်ကွင်းအား ဖန်တီးပေး၏။ အလွန်ပင် လှပတင့်တယ်ပေသည်။

ဖန်းဟွာမြို့တွင် စုစုပေါင်း မိသားစု ၂၈စုသာရှိသည်။ မများလှသော်လည်း အခြေချနေထိုင်မှုသည် အနီးအနားရှိ ချင်ထျန်းမြို့နှင့် လော့ရွှေမြို့တို့နှင့် နှိုင်းစာလျှင် အတော်လေးနေထိုင်ကြသည်ဟု စဉ်းစားနိုင်ပေသည်။

"မြင်ကွင်းကဒီလောက်ကောင်းလိမ့်မယ်လို့ မျှော်လင့်မထားဘူး"

စုရွှေလျန်သည် နှစ်မီတာပတ်ချာလည်နေရာတိုင်း၌ မက်မွန်ပန်းများဖူးပွ့င်နေသောမြင်ကွင်းကို မချီးကျူးဘဲ မနေနိုင်ပေ။ ရွာလယ်ရှိရေကန်ငယ်လေးတစ်ခုအပေါ်သို့ အုပ်မိုးနေသောမိုးမခပင်တစ်ပင် ပင်ရှိသေး၏။

"မင်းတို့က ဒေသခံမဟုတ်ကြဘူးမလား"

ပုခုံးထက်တွင် ထယ်တစ်လက်ထမ်းထားသောလယ်သမားတစ်ယောက်က မေးလိုက်သည်။ သူသည် စုရွှေလျန်ဘေးမှ လယ်တောဆီသို့ဖြတ်သွားခြင်းဖြစ်သည်။ သူကပြုံးကာမေးလိုက်၏။

"ဟုတ်ပါတယ်။ ဦးလေးကြီး။ အလုပ်သွားမလို့လား"

စုရွှေလျန်က ပြန်ပြုံးပြကာမေးလိုက်၏။

"ဟုတ်တယ်။ စောပြီးအေးသေးတယ်ဆိုပေမဲ့လို့ အဲ့ကိုလမ်းလျှောက်သွားရင် အချိန်ယူရတယ်လေ။ နောက်ကျရင် ပူလာလို့ ဒီလိုသွားနိုင်မှာမဟုတ်ဘူး"