[Unicode]
လယ်တောဆီမှ လုပ်ကြံသတ်ဖြတ်သူ
အခန်း ၈။ ။ ထွက်ခွာရန် ပြင်ဆင်ရပြန်ခြင်း"အထုပ်တွေ ပြင်တော့။ ဒီတောထဲကနေ နှစ်ရက်အတွင်း ထွက်မယ်။" စစ်လင်တစ်ယောက် စားသောက်ပြီးသည့်နောက်တွင် ထိုစကားတစ်ခွန်းတည်းကို တည်ငြိမ်အေးချမ်းစွာ ပြောလိုက်သည်။ သူ့စကားကို ကြားလိုက်ရသည်နှင့် စုရွှေလျန်မှာ မျက်လုံးများ ပြူးကျယ်လျက် စစ်လင်ကို အတန်ကြာပင် တအံ့တဩ ကြည့်နေမိသည်။ ပါးစပ်ထဲက အစားအစာကိုပင် အနိုင်နိုင် မျိုချပြီးနောက် စုရွှေလျန် လေးတွဲ့စွာ မေးမိသည်။ "ရှင်...ရှင် စကားမပြောတတ်တာ မဟုတ်ဘူးပေါ့။"
စစ်လင်က စုရွှေလျန်၏ စကားကို ဆန့်ကျင်သည့်အနေဖြင့် မျက်ခုံးပင့်ပြလိုက်လေသည်။ "ကျုပ် စကားမပြောတတ်ဘူးလို့ ဘယ်သူက ပြောလဲ။" စစ်လင်၏ အေးတိအေးစက် မျက်လုံးများနှင့် အသံကြောင့်သာ မဟုတ်လျှင် သူစကားပြောနေပုံမှာ စုရွှေလျန်ကို လှောင်ပြောင်နေသကဲ့သို့ပင် ထင်ချင်စရာကောင်းလှပေသည်။
"အိုး..." စုရွှေလျန် အောင့်သက်သက်နှင့် ရယ်လိုက်လေသည်။ ပြီးတော့ သူ့ပခုံးသားများ နိမ့်ဆင်းသွားပြီး သူ့မျက်နှာသူ လက်ဖြင့်အုပ်၍ လေသံသဲ့သဲ့လေးဖြင့် မေးလိုက်သည်။ "စကတည်းက ဘာလို့ မပြောခဲ့တာလဲ။ ဒီက ဘာမှမသိဘဲ နေနေတာကို ကြည့်ပြီး အတော့်ကို အပျင်းပြေခဲ့တယ်ပေါ့ ဟုတ်လား။"
စစ်လင် ရင်ထဲတွင် တိတ်တခိုးလေး သက်ပြင်းချမိသည်။ စုရွှေလျန်ကို နှစ်သိမ့်ပေးရန် စစ်လင် လက်ကို ရှေ့ထုတ်မိသော်လည်း လေထဲတွင် ရုတ်တရက် တန့်သွားသည်။ သည်မိန်းကလေးနှင့် သူ့မှာ ဘယ်လိုဆက်ဆံရေးများ ရှိနေလို့လဲ။ ဒီလိုမျိုးနှစ်သိမ့်ပေးဖို့ တကယ်လိုလို့လား။
သူနှင့် ဤမိန်းကလေး၊ ယောက်ျားတစ်ယောက်နှင့် မိန်းမတစ်ယောက်၊ ဆိတ်ကွယ်ရာအရပ်မှာ တစ်လခွဲလောက်ကြာအောင်ပင် နှစ်ယောက်တည်း အတူနေခဲ့ပြီးပြီ။ ဒီလောက်ဆိုလျှင်ပင် လွန်လှပြီ မဟုတ်လား။
ပြီးတော့ သူသည် အညတြ လူထဲကလူတစ်ယောက်သာ ဖြစ်သည်။ ငယ်စဉ်ကတည်းက မိဘမဲ့ဘဝရောက်ခဲ့သည်။ အရပ်ဒေသပေါင်းစုံသို့ လေလွင့်လျက် ရောက်ခဲ့သည်။ ယခုတော့ သူသည် ဖုန်းယောင် ရုံးတော်ဘက်သားတစ်ယောက် မဟုတ်တော့ပေ။ ဆိုတော့ သူ ဖုန်းယောင် ရုံးတော်၏ အနှောင်အဖွဲ့မှ လွတ်မြောက်ခဲ့ပြီဟု ဆိုနိုင်သည်။ သူ့ဘဝတွင် နောက်ဆုံးကျန်နေသော အနှောင်အဖွဲ့မှ လွတ်မြောက်ခဲ့ခြင်း ဖြစ်ပေသည်။
YOU ARE READING
လယ်တောဆီမှ လုပ်ကြံသတ်ဖြတ်သူ (MM-translation)
RomanceName - Jiǎn méi shā shǒu zuò nóng fū English Name - Assassin Farmer Author - Xi Zhen Genre - Fantasy, Martial Arts, Romance, Slice of Life Chapters - 160 + 12 extras Update - Mon,Wed,Fri Su Shuilian သည် ကျော်ကြားသော ပန်းထိုးမိသားစုတစ်ခု၏ ပထမဆုံးတရာ...