💎 السفاح العاشق 💎
🎭 الفصل الثالث : بارت 237 🎭
وقفات فمكانها و عنيها عليهم ... مع الازدحام الي داز يخبط فيها او يتحاك معها ... لكنها كانت مرفوعة و محاسة بحتى حاجة ... قلبها هو الوحيد الي تكسر لأشتات صغيرة ... من الواضح أن بيناتهم شي حاجة و إلا مكانش چالس معها بأريحية و هي حاطة يدها على فخضو ...
بقات كتشوف فيهم حتى عمرو عنيها بالدموع و حجبو عليها الرؤية ... الموسيقى كتسمع بعيدة و صداها الي كيوصل لمسامع جولان ... دقات قلبها المنكسرة كتسمع أعلى من أي صوت آخر ... و صدرها كيطلع و يهبط فمحاولة أنه يلتاقط أكبر كم من الأوكسجين ... لأنها حاسة بالخنقة و روحها غتطلع ...
فاللحظة الي حطات يدها على فخضو ... تلفت و شاف فيها ببرود ... دغيا سحباتها و ابتسامة بلهاء على وجها ... هزات مشروبها الي عبارة عن مرتيني و شربات منو ... خدات الزيتونة بجوج صباع و لاحتها فمها بطريقة كلها إغراء ...
كان كيشوف فحركاتها بدقة ... و هي فرحانة لسبب ما ... يمكن حينت لاحظات أنه مراقبها ... عارفة ماشي شخص سهل تجذبي اهتمامو ... حيدات رجلها من على الرجل الأخرى ... و وقفات كتنزل فأطراف فستانها القصير ... تحنات لعندو حتى بانو مفاتنها بوضوح و قالت ...
ليان : غنمشي للطواليت ... مغاديش نتعطل
حرك طرف شفتو العليا كأنه مسوق لفين غادة و لا لفين جاية ... تحركات قدامو كتمشى بأنوثة ... جسمها ممشوق و ملامحها فاتنة تجذب أياً كان ... و بزاف ديال الأعين كانت متبعها فالكلوب ... ماعداه هو الي مشافش فاتجاهها منين تفاوتات من حداه ... مشات ليان فاتجاه الطواليطات ...
جولان كانت متبعها بعيون حاقدة ... لكن جزء منها حس بالنقص منين حققات فيها مزيان ... كأنها قارنات بينها و بين نفسها ... بعد لحظات بانت ليها راجعة و هازة سيجارة بين صباعها ... و هي غادة فاتجاه الطبلة الي چالسين فيها ... رمات ليان السيجارة و عفطات عليها ...
عارفة رئبال مكيدخنش و بغات تكسب مودتو ماشي العكس ... فطريقها وقف ليها شاب طويل و من ملامحو باينة فيه شارب ... هزات ليان حاجبها و نطقات ...
ليان : حيد من الطريق
الشاب : ممكن نعرض عليك كاس
ليان : لا
الشاب : علاش لا ... مال الزين معفر !
ليان : بديت كنتعصب ... حيد الق**** من قدامي
الشاب : اووه واعرة مع راسك " بعد " دوز الزين ... نخاف على راسي
خنزرات فيه و تحركات ... غير فاتو و هي تحس بيدو شحطاتها على مؤخرتها ... ضارت مغزفة شافت فيه ... ضحك و غمز ليها ... كانت باغة ترجع تجمعو بنص ... و هي تكتم غضبها خاصة فاش شافت رئبال مراقب الوضع ... بغات تبين ضعفها قدامو واخة هي قادرة تخلي لهاد خونا داربوه ...
رجعات كملات طريقها و چلسات جنب رئبال ... بان ليها هزو يدو شوية جا شخص ضخم البنية لعندو ... نعت ليه رئبال فاتجاه خونا ... حرك ليه راسو رجل الأمن و مشا ... تبسمات و القلوبة كينقزو من عنيها و هي كتشوف فيه ... عادة فاش كتكون فبحال هاد الأماكن مع خليل ...
كتعرض للتحرش و كانت كتصرف راسها ... عمر خليل تدخل و لا دار شي حاجة ... و رئبال الي بالكاد كتعرفو تصرف على قبلها ... عجبها الحال ... الإبتسامة ما فارقاتش شفايفها مزال ...
رجل الأمن مشا عند الشاب فين كان واقف و شدو من الكول باغي يخرجو ... تنطر منو الشاب و قال ليه غيغادر راسو ... جولان الي كانت واقفة جهة الباب شافت كلشي على عنيها ... الإحساس الي حساتو فهاد اللحظة صعب يتوصف ...
قررات تغادر ... قلبها مابقاش قدر يتحمل يشوف أكثر ... كيف ضارت و هي تضرب بكتفها أحدهم ... زادت خطوة و هي تحس بشي حد جرها من دراعها ... ضارت كتشوف فيه بعنيها المدمعين ... كان نفس الشاب السكير ... شافت فيه بتساءل و هو ينطق ...
الشاب : زعما راك دايرة النظارات
جولان : سمح ليا مشفتكش " بغات تجر دراعها و هو يزير بيدو " ممكن طلق مني
الشاب : " قرب كيهضر و انفاسو الكريهة بالشراب كضرب فوجها " كنتي خارجة ... حتى انا خارج ... شبان ليك نمشيو لشي مكان آخر ... فيه خصوصية أكثر
جولان نطرات يدها منو و دفعاتو حتى جا طايح فلرض ... ضارت كتجري خارجة من تماك ... ناض هو كيسوس فحوايجو و كيعاير ... يالاه بغا يخطو خطوة يتبعها و هو يحس بشي حد شنق عليه من اللور ... ضار بتثاقل لقى عنين كيف الجمرة على وشك يحرقوه ... حل فمو بغا يهضر و يستفسر علاش و كيفاش ...
جاتو لكمة لفكو حتى ضار كولو ... كان غيفقد توازنو لولا رئبال شدو من جديد ... حكمو و انهال عليه بالضربات وحدة تابعة لاخرى ... طلق منو طاح فلرض و نزل عندو كيضرب و يعاود ... وجه لاخر مابقاش كيبان بالدمايات و رئبال مابغاش يوقف ... تدخلو رجال الأمن بعدوه عليه قبل لا يقتلو ...
تنطر منهم و تحرك غادي فالكولوار ... وقف خارج لكلوب كيقلب بعنيه عليها ... جبد لفون من الجيب و اتاصل بيها ... بقى كيصوني حتى قطع ... حس بيد تحطات على كتفو ... تلفت لقاها ليان الي مزال مصدومة من شنو دار ...
ليان : رئبال ... " كتشوف فيديه " يديك عامرين دم " حلات صاكها و جبدات كلينيكس مداتو ليه "
✨ يتبع ✨