💎 السفاح العاشق 💎
🎭 الفصل الثالث : بارت 232 🎭
ليان : ندمت الي ماجيتش للمغرب قبل ... خسارة نتا ' Taken ' مخطوب " حطات يدها على القاميجة جهة الصدايف المفتوحين " لكن على الأقل كسبت صداقتك ... عرفت رجال قبل لكن نتا مختالف بزاااف
رئبال : " بسخرية " باين أنك كنتي كتعرفي بزاف
ليان : عادي ... كبرت فأمريكا و عشت لايف ستايل مختالف على هنا ... و ماكندعيش أنني عكس الي أنا عليه ... أنا ماشي ديك البنت الخجولة و لا الساذجة ... عايشة حياتي كيف بغيت ... لكن هادشي ماشي سبب يخلي لاخرين مايحتارمونيش ... حينت بعض الرجال كيمشيو غلط
رئبال : " واقف و يديه فجيابو " منين الوحدة كتفرض احترامها ... كتخلي الآخرين يحتارموها ... واخة فينما كبرات و كيفما عاشت حياتها
ليان : قلت ليك ماشي كلشي بحالك ... و ما كيفكروش هاكة
رئبال : " حيد ليها يدها الي كتلعب بالصدافي " لأن تصرفاتك كتوحي بحاجات أخرى ... عطي قيمة راسك و حتى واحد مغادي يشوفك بديك الطريقة
بعد من حداها و مشا فاتجاه الباب ... خرج و شاف فالطبلة ... كان الأكل باقي محطوط و باينة حتى حد ماقاسو ... تنهد و طلع مع الدرج ... وقف قدام غرفتها شحال و ضار دخل لغرفتو و مشا مباشرة للدوش ...
ليان شافت فأنحاء المكتب ... بانت ليها الكاميرا و هي تهز صاكها و غادرات ... لقات السائق ديال رئبال واقف جنب السيارة ... حل ليها لباب ... بقات كتشوف فيه بتساءل ...
السائق : موسيو رئبال قال ليا نوصلك
طلعات و هو يسد لباب و مشا ركب ... هبطات الزاجة كتشوف فالڤيلا و ابتسامة مرسومة على شفايفها ...
فاليوم الموالي زينب خرجات بكري و توجهات لڤيلا ... بالها بقى مشطون مع جولان و بغات تعرف شنو وقع ... دخلات و طلعات لعندها لبيت ... مالقاتهاش و هي تهبط عند نوال ... خبراتها أنها خرجات كتمشى فالجردة ...
خرجات زينب كتقلب عليها ... تمشات شوية و هي تبان ليها ... چالسة فالحاشية ديال الخصة ... قربات عندها سلمات عليها و هي تچلس جنبها ...
زينب : هضرتو باقي ؟
جولان : لا
زينب : و علاش لا
جولان : مجابتهاش الوقت ... هو مشغول و مغاديش نجرو بزز باش نهضرو
زينب : آه ... و لكن لا قلتي ليه يخصص وقت ليك ... مغاديش يقول ليك لا
جولان : " ببرود " ماعرفتش ... ممكن مانهضروش فهادشي
زينب : أوكي ... على راحتك
بقاو بجوج ساكتين حتى نطقات جولان ...
جولان : غدا غنمشي للشركة نشوف بهاء
زينب : " باستغراب " بهاء ... علاش باغة تشوفيه ؟
جولان : بغيت نرجع نخدم
زينب : و علاش غتقوليها لبهاء و ماشي ل
جولان : " قاطعاتها " بهاء هو الي مكلف ... و غادي يقولها ليه هو
سكتات زينب و بقات مستغربة من كلام و تصرفات جولان ... كتهضر ببرود و على غير عادتها ... مابقات فهمات فيها حتى حاجة ... مابغاتش تحكر عليها بالأسئلة و اكتفت بقات كتهضر معها فمواضيع أخرى ... من بعد غادرات و جولان طلعات لغرفتها ... زينب كيف وصلات للدار ... طلعات لبيتها و اتاصلات بسمية ...
سمية : الوو
زينب : الغابرة لباس عليك ؟
سمية : لباس اختي زينب ... نتي اش خبارك و جولان ... توحشتكم
زينب : هي لا جيتي
سمية : ماكرهتش ... مي راك عارفة مانقدرش نخلي جدي بوحدو
زينب : واخة غير يومين !
سمية : علاش ... واقعة شي حاجة ؟
زينب : لا هانية ... غير جولان كتبقى بوحدها فالدار ... قلت نشد شي يومين و تجي نتي ... نتجمعو و نخرجو نفوجو شوية
سمية : واخة ... غنشوف كيف ندير
زينب : لا كنتي جاية قوليها ليا ... نسيفط الي يجيبك
سمية : واخة
زينب : يلاه بسلامة عليك " قطعات "
🍁 يوم جديد ...
فاقت سمية بكري كيف موالفة ... دارت المهام ديالها كلهم و وجدات الفطور لجدها ... جلسات معاه حتى فطر ... ناض خارج و هي ترافقو للباب ...
سمية : غدا غنرجع اجدي
سي عباس : لا بغيتي تچلسي كثر جلسي
سمية : لا لا غدا إن شاء الله غنرجع
سي عباس : شكون غيجي ليك ؟
سمية : يمكن غيسيفطو ليا الشيفور ديال سي رئبال
سي عباس : واخة ابنتي ... وصلي ليه سلامي
سمية : تحنات باست ليه على يدو " مبلغ اجدي
غادر سي عباس و دخلات سمية جمعات الطبلة ... نصبات طاجين لغدا و خلاتو ليه ... غالبا غيرجع من بعد صلاة المغرب و غيتعشا بيه ... توجهات للبيت فين كتنعس ... فيه سرير صغير و بلاكار ... بدلات حوايجها و لبسات أحسن ماعندها ...
بان ليها لبلاك الي خلات ليها جولان ... هزاتو و بعد تردد قررات تقاد بيه شعرها ... شعرها متوسط الطول و لونو بني غامق ... دغيا قداتو شافت راسها فالمرايا عجبها مطلوق ... هزات الصاك دارت فيه باش غتبدل و لوازمها ...
لبسات سبرديلة متماشية مع لباسها ... شافت فالساعة و خرجات ... سدات كلشي و جلسات فالكرسي الخشبي الي جنب لباب كتسنا ... بعد لحظات و هي تلمح سيارة كتقرب ... الصور الي ضاير بالدار قصير ...
و لكن مع الزاج فيمي مابانش ليها شكون داخل اللوطو ... هزات صاكها و تمات غادة فاتجاه السيارة ... غير وصلات تحل لباب و هبط ... شافتو و هي توقف فبلاصتها ...
✨ يتبع ✨