#البارت ٤٦
********
رفعت
خوفي من خسارة درر كان كبير
ومااعرف شراح يصير ورى ما تستلم ورثها شنو الله ضاملها وضاملي احس نفسي مامستقر بعلاقتي حياتي
مضمونها شنو متزوج اثنين وماعندي أطفال والثانية حتى ناسية اني زوجها
كل مرة محمد يلمحلي إنه ياخذ زينب وياه ومااعرف شسوي
رجعت من الشغل لكيت محمد يخابر ومن كلامه جاي يقنع بشخص إنه هالفترة يرجع لمصر
تغديت وصليت ومحمد كالي اريد احجي وياك على انفراد
طلعنا بالحديقه الكعده حلوو والجو مشمس
محمد-: بصراحه مااعرف شلون افاتحك بالموضوع وكلش مستحي
رفعت-: خير ان شاء الله
محمد-: اني ممنون منك لأن تزوجت زينب وكنت مستعد تتكفل بتربية أطفالها بس حالياً اني موجود وزينب أمانه عندي من أبوي وامي وتعرف أنت شغلي وعائلتي بمصر واني بعد استقراري وشفت حياتي خارج العراق أحسن بهواي ومااكدر اعيش هنا واكذب عليك إذا كلتلك أسافر وكل فترة اجي اشوف أختي ماترهم صعبه اني زينب أريدها يمي حتى اتطمن عليها هي بس الي بقت من ريحه أهلي الله يرحمهم ومااتحمل بعدها ومااكدر ابقى بس عالاتصالات أتمنى تفهمني
رفعت-: اني ادري بيك بس بشنو تريد اخدمك يعني شسوي مااكدر أسافر واعوف اهلي وشغلي ولاتنسى اني متزوج غيرها يعني إذا سافرت شنو أشتغل شلون اعيشهن ثنينهن بركبتي ومنو كال اهلي يقبلون ودرر
محمد-: اني لكيتلك الحل الأسهل
رفعت-: شنو!!!؟؟؟
*******ً**
درر
من وصلت للمنطقه أول مانزلت من السيارة لزمت ايد عمتي قوي وكمت ارجف
ياربي شنو من عذاب هذا حسيت كل شي متعاون يعرضلي الأحداث مثل شريط كدام عيني ومن أصغر جرح لأكبر جرح
من وصلت لبيت عمي غمضت عيوني وين اكدر أتحمل
من دخلنا لبيت ام غيداء عبالك داخل عليهم جني
كلها تباوعلي النسوان وحده تشاور بالثانية
كل الكلمات الموزينه سمعتها وترن باذاني مثل الجرس
ام غيداء أول مادخلت سمعتها كالت ماجان عايزنا غير كح،ب يجن للعرس عمتي
ام رفعت : اكولج هاي عليمن تحجي كلش مامرتاحتلها
درر-:عوفيها عمه خلينا نسلم عالعروس ونطلع
ام رفعت-: خلي ننطي الهدية
عمتي جابت هدية ساعه كلش جبيرة انطيناها لام غيداء
ام رفعت-: واعذرينا من التقصير
ام غيداء-: معذورين عيني بس ماراح نقبل الهدية
درر-؛ ليش هي الهدية تترجع
سكتت عمتي بالكوة لازمه أعصابها سلمنا على غيداء وباركنالها
درر-: الف مبروك بالرفاه والبنين شايفه كل الخير
غيداء-: حبيبتي تسلمين شنو حتروحين بعد وقت
ضجتي من امي أعرف
درر-: لا يمعودة بس تأخرنا
غيداء-: إني أعتذر عن كل شي حقج عليا درر شنو ماراح احجي واكول ماراح أكفر عن خطأي وياج سامحيني خلينا نرجع صديقات مثل قبل وأحسن
درر-: مسامحتج كلنا نغلط قابل اني معصومه من الغلط حتى مااسامحج
غيداء-: هو إنتي منو بطيبة قلبج ياريت لو تبقين بعد شوي خلينا اشوفج والله مشتاقتلج
درر-: مااكدر ماتشوفين الناس بعد مااتحمل والله على أعصابي كاعدة أروح أحسن
غيداء-: بكيفج يعمري
مراليوم مثل غيره
وبس اني وعمتي نشتغل وحايرين بالخطوبة هالة اعتزلت كل شي وكلما نكوللها سوي شغلة تكول شعليا مخطوبة اني مرت منتظر تروح وتجي تشمر حجي مااعرف وين تريد توصل وزينب مامقصره خطية الخبز عليها ومرات إذا ذبحنا طلي هي تتولى الطبخ لأن نفسها كلش طيبة بطبخ الباجه عدها خبرة
كل يوم خميس عمي متعود يذبح ٣ دجاجات كبار بثواب الموتى ويوزع تمر ولبن وفواكه العصرية
اجوي بيت منتظر جنت انظف بالحوش عمي جابلي الدجاجات حطيتهن بالمطبخ وزينب بدأت تنظف بيهن شفت بتها وابنها يبجون ووسخين مسابحين عادي اني متعودة اسبحهم وابوسهم زينب ماتكول شي أصلا تفرح روحها طيبة صدك أغار منها بس مااكرها
ناديت بت زينب علمود اسبحها بس عاندت لأن شافت بنت منتظر وراحتلها تركض تلعب وياها
درر-: لج ماما تعالي اسبحج وامشي لعبي
زينب كلما اكول ماما تبتسم وتفرح اني بطبعي اي طفل اكوله ماما وماافرق أبد
أخذت إبن زينب سبحته الطفل يجنن ويحبني من اليفله يتدغدغ ويضحك ضحكته تخبل شكد بريئة
لبسته وين خفت عليه يتمرض كام يغفي ونام على جتفي ردت اخليه على الفراش مايقبل يعوفني يفز ويبجي نمت بصفه شوي وبعدين غطيته ورحت
درر-: سبحت ابنج ونيمته بغرفتي
زينب: مشكورة
ساعدتها بالمطبخ وغسلت المواعين عمتي جانت كاعده يم مرت منتظر
درر-: زينب راح أروح اكعد يم مرت منتظر شوي عيب هسة تكول شافتني وسوت روحها مشغولة
زينب-: اي روحي اني أخلص واجي وراج
درر-: وإذا تتعبين صيحيلي اني أكمل بدالج
زينب-: لا ماعندي شي
رحت سلمت عليها
شفت أبنها الصغيرة بوسته وخليته بحضني هي أخذته مني بسرعه
-: اريد ارضعه
درر-: أي
بت منتظر اجتني هي وبنت زينب بوسني وسولفلي عن العابهن كل شي يسولفلي مرت منتظر صارت عصبية على بنتها اخذتها وراحت للمطبخ
ام رفعت-: لا تضوجين نفسج
درر-: هي مو أول مرة كلما اتقرب لابنها تاخذه
عمتي سكتت واني هم كلت لنفسي بعد مااتقرب من أطفالها هي تخاف عليهم وعبالها اني احسدهم لأن ماعندي أطفال
مريت من المطبخ وسمعتها تحجي وي زينب
-: خايبة إنتي شبيج شلون تخلين جهالج بيدها ولج الدنيا تخوف كل شي تسوي حتى قتل تقتلهم شنو نسيتي هي شريجتج وتغار منج وشي اكيد تكرهج كره العمى
زينب -: لا لا
-: والله شبيج اني من ورى حسدها ونفسها على أطفالي ماتشوفين إبني بغيبوبة لو يطلع لو لا فكري هي ماعدها أطفال ورجلها تزوج عليها تلكيها تحسدنا وميته من الحقد اني زوجي على قلبي وما متزوج عليّ إسم الله وعندي أطفال وهي شنو رجلها موزين وياها وماضل دكتور يعتب عليها فرت الدكتورات وكلهن كاللها ماكو
ديري بالج منها لا عبالج فقيرة ومدري شنو ترا كلاوات هاي
زينب-: أستغفري ربج يمعودة البنية من عرفناها لهسة ماشفنا منها شي وماسمعنا منها حجاية تغث
-:ههه وإنتي منتظرة مناه لمن تسوي
زينب انتبهت عليّ واكفه بباب المطبخ اشرت لمرت منتظر بعيونها ومن دارت وجهها ولا اهتمت
-: شنو حاجية جذب الحق ينكال
اجاني برود مفاجىء لأن حتلو حجيت شيفيد أكو ناس مايفيد وياهم لو تنطيهم ماي عيونك وتشعل العشرة شمع
رحت لغرفتي مناه لمن عمي صاحلي
درر-: ها عمو
ابو رفعت-: يلا عمو رتبي التمر والفواكه علمود اوزع
درر-: أي عمو تدلل
اني متعودة دايما كل خميس اسوي صواني الثواب وعمي مايقبل أحد يسويهن غيري ومرت منتظر كالتله اسويهن اني عمي انحرج منها واني هم
خلت بكل صينية موزة وتفاحه برتقالة وحده ومواعين تمن صغار كلش ولبن وتمر بدون لاراشي ولا سمسم
عمي من شاف هيج ماقبل الا اني
بكل صينية اخلي نص كيلو موز ثلاث تفاحات وبرتقالتين والتمر اطعمه بسمسم وفستق وجوز وراشي
حتى يصير طيب عمتي تطبخ جدر جبير كلش تمن أبو الماش ومانوزع بمواعين كله بسفري
مرت منتظر زعلت وبقت تخزر بية طول الوقت
عمي رجال متدين كلش ومعطاء إذا تطلب منه شي أخذ الثوب الي عليه وايده فلته يعني إذا يريد يشتري شي لو يصرف فلوسه كلهن مايهتم
وزعنا للجيران ورفعت يعرف ناس فقرة كلش دزالهم هم عمي كاله اخذلهم كونية طحين وكونية تمن
تعشينا تعللنا بالحديقه
باجر خطوبة هالة اتصلوا الجماعه سألونا خاف محتاجين شي
منتظر وعائلته باتوا يمنا ومر اليل
الصبح على صوت رفعت كعدت
رفعت-: شنو راح تبقين نايمه
درر-: اامم نعسانه
رفعت-: امي تكول درر هي ايديا وهي رجليا مااكدر اسوي شي بدونهاا كومي تصيحلج
درر-: شوي الله عليك والله نعسانه
رفعت-: كومي
لزم كلاص مي وهددني بيه
درر-: لا لا راح اكوم والله اوف اوف
كمت منزعجه ماشابعه نوم بس لازم اساعد عمتي إذا مو اني محد يساعدها
أخذنا هالة من الصبح للصالون وهناك ترزلت لأن شعرها مبلل وكله زيت ومخليه مكياج ام الصالون كلش تعبت وياها
رجعنا بالاربعه العصر مرت منتظر منظفه البيت والكل كاشخ ومرتب أهل العريس بعدهم ماجايين
اني وعمتي صلينا وتغدينا لأن بالصالون أكلنا بس لفات ماتشبع
ام رفعت-: يمه هالة جوعانه
هالة-: لا
درر-: اسويلج لفه تاكليها عالسريع قبل لايجون
هالة-" لاتلحن مااريد
درر-: عوفيها عمه اجتها الطنكورة خلينا نتغدة علمود اكشخج وتلبسين الثوب الاشتريته الج على ذوقي تطلعين أحلى وحده
تغدينا وصلينا نسولف ونتشاقة اني وعمتي مرت منتظر من تشوفنا تضوج وتغار لأن هي اقرب بالنسب لعمتي مني
قبل لا أسبح كلت لعمتي تسبح قلبي علمود اتطمن
سبحت ولبست الثوب يجنن عليها عمتي وجهها أبيض احمراني وخدودها تخبل عبالك تفاحه مدبدبة
لبست الشيلة وبخرتها
درر-: روحي اكعدي يم هالة
ام رفعت-: إنتي هم البسي بسرعه وتعاي مااحب أبقى وحدي تعودت عليج
درر-: فدوة اروحلج عمه
ام رفعت-: كو تتاخرين يرويحتي
درر-: دقايق
سبحت وحرت شنو البس بعد التفكير لبست فستان بيجي مرتب تقريبا يشبه فساتين الخطوبة والسهرات تحفه مو فستان يخبل صورت كم صورة بموبايلي
تالي رحت لعمتي اني بس عمتي أحب اسولف وياها
صورت وياها وهي تستحي
صورنا هالة وبس ضايجه اجوي أهل العريس لبسهم ابدا مامحتشم وكدام الرياجيل فساتين ضيقه وقصيرة بحيث الي تكعد ملابسها الداخلية كلها تبين الاماية حاطه الشال شلون ماكان ومخليه المكياج كله بناتها مغرورات بجمالهن ويخبلن وكلهن مومحجبات والشعر سرح اشقر والعيون زرق وخضر اباوع لهالة دمعت وماعرفت شنو سر هالدمعه إحساس بالنقص غيرة انعدام الثقه بالنفس مافهمتها
دخلن وكامن يعيبن على المكياج
يحجن وي عمتي
-: عوع شنو هذا المكياج جان كلتولنا نكوللكم على صالون براسه حظ متكلولي شنو هذا
درر-: حبي شنو شبيج
جانت تحجي وي عمتي وعمتي فقيرة بقت ساكته ومرت منتظر حايرة بجهالها هي وزينب ومامهتمات بشي هالة وجهها صار أحمر
درر-: إذا عندج شي احجي وياي اني المكياج مابيه شي ماشي غلاتي
-: شلون مابيه شي ماحلو ويخزي جايين كرايبنا من الخارج وناس أغنياء خوما يشوفون مرت أخونا الوحيد شكلها عبالك قرقوز
درر-: كرايبج الخابصتنا بيهم جايين من الخارج مو جايين من المريخ شنو المميز بيهم حالهم من حالنا هذا الكلام كولتيه مرة ثانية مااسمحلج تحجين وتجرحين بكيفج
-: على كيفج اعصابج عيني لو دازته لنفس الصالون الرايحتله إنتي جان صار أحلى
درر-: مارايحه لأي صالون وبعيد عن هاي الأمور أشوف الكلام الحلو لازم ومفروض ومرة ثانية لاتحجين هيج وتعلقين وتجرحين بكيفج حتى ماتصير مشاكل الطرفين في غنى عنها أعتقد فهمتي قصدي كلش زين
-: إنتي منو شنو تعوديلهم
درر-: جنتهم عيوني
سكتت واعتذرت ورى شوي اجه السيد عقد
هلاهيل وجكليت وبناتهم يركصن وي الشباب وعدهم عادي الرياجيل يدخلون عالنسوان لأن منفتحين رفعت اجه وكاللهم مايصير بس العريس شافني بقى يباوعلي بإعجاب فرحت وخجلت بنفس الوقت البنات كلهن يباوعن عليه ويأشرن يكولن هذا الولد أخو العروس يخبل حتى أحلى منها
انزعجت شبيهن ذني
العريس كعد يم العروس بس ضايج وعبالك مغصوب حتى ماحجى وياها واخواته يكولله تعال اركص مايقبل وكلما يريد يكوم أمه تباوعله بنظرات غريبة جنت منتبهه عالكل وفهمت الوضعيه مالت عائلتهم خلصت الخطوبة وكلمن راح لبيته
هالة جانت فرحانه بالذهب والهدايا الجابوها ومن ضمن الهدايا ام امير جابتلها موبايل حديث وامير مانطق وياها حرف هالة اتكبرت علينا ورى الخطوبة وتكبرها ماجان اله مبرر تصرف أحمق وماله داعي الشي الي الكل مستغربه إنه مرت أيام وامير ولا اتصل ولا اجه
ليش !؟
محد يعرف السبب !
إمتحانات أخير السنه راح تبلش وشديت حيلي هاي فرصتي الوحيدة محد ضامن مستقبله
كنت أحاول بهالفترة انظم وقتي بدقة للدراسة ولشغل البيت ورفعت
ماراح اكول سهلة وعادي جانت فترة صعبه وبالكاد كدرت اوازن بين واجبي المدرسي وواجبي العائلي وكزوجه والحمد كدرت اعدي هاي المرحلة وامتحنت الإمتحانات كلها بمعدل ٨٨ عمي وعمتي مايعرفون بالمعدلات أهم شي نجاح وفرحتهم جانت ماتنوصف
وعمي كال الا اسوي عزيمه وبالفعل
هم وانزاح واخيراً حصلت شهادة السادس الإعدادي
صليت ركعتين شكر
رفعت مااهتم لنجاحي
درر-: أنت أكثر شخص جنت تريدني أحصل هالشهادة
رفعت-: أي جنت هسة كل شي تغير
درر-: ماكو أمل نتغير للاحسن
يكره هيج نقاشات طلع من الغرفه بعد مالبس ملابسه
وراح وياه محمد وزينب وين راحوا
سويت جاي وكعك أخذته لغرفه عمتي
درر-: مساء الخير
ام رفعت-: مسية العافية
درر-: جبتلكم جاي وكعك طيب
ام رفعت-: اي والله راسي يوجعني دايخ
درر-: هسة ادلكه
دلكت راسها وسالتها
درر-: عمه رفعت وين راح وماخذ وياه محمد وزينب
ام رفعت-: يطلقها
درر-: يطلق زينب!؟
ام رفعت-: اي بعد شنو علاقتهم وهي تريد تروح وي أخوها خطية إذا بقت هنا تنظلم ورفعت مايحبها ولا هي أصلا لحد ذاك اليوم وتصيحله خوية بعد عليمن متزوجين خلي البت تروح وي أخوها أحسن
درر-: يعني حتسافر وي أخوها
ام رفعت-: أي
درر-: والله ماادري شكول وحده غيري تكون أسعد وحده بالعالم لأن زوجها راح يبقى إلها
ام رفعت-: يمه هو الطلاق موزين ابغض الحلال عند الله الطلاق
درر-: أي عمه زينب فقيرة راح نشتاقلها ولجهالها الله يسعدها ويريح بالها
ام رفعت-: ويريح قلبج بجاه كلمن عنده جاه وان شاء الله يجي يوم وتحبلين وتجيبين
يوم عيد عندي يصير درة العزيزة تحبل وتجيب حفيد حنين مثلها ومثل طيبة قلبها وحنيته
درر-: ههه يا عمه شلون احبل
ام رفعت-: إنتي لحي بالدعاء ولا تأيسين من رحمه الله
درر-: ونعم بالله العلي العظيم
كانت مشاعري مختلطه بس مابيها فرح يعني زينب راح تروح وتغيب وغيبتها مو يوم ولا يومين احتمال للأبد بعد مانشوفها سبحان الله ذاك اليوم كانت من أكبر مشاكلي واليوم راح تختفي واني حزنانه
وفرحت الها لأن عالاقل عدها أخو وماقبل يروح الا يأخذها وياه الله يديمه الها
كنت اشبه حالتها بحالتي هواي نتشابه لأن ثنينا أيتام مرت أيام وشهور
هالة قرب عرسها وبفترة الخطوبة بس مرتين أمير اجاها وماكو اتصالات بس من يريد يجي يدزلها رسالة وبس
زينب سافرت وي أخوها وكان لسفرها حزن و وحشه
كبيرة لامبالغه ولاتمثيل بس هاي ادق إحساس حسيته لأن يمكن اعتبرتها اخت بالوقت الي كنت وحيده وماعندي اخت ولاحاسة بهيج إحساس
...يتبع
#البارت ٤٦
#أبقى معي للأبد( أستاذي العاشق )
