#البارت العاشر
#زهراء_محمد_السراي
#شارع حيفا
*********
رندة
كل شخص عنده طريقته الخاصة إلي يعبر بيها عن حزنه والرياجيل يختلفون عن النساوين
أبوي جان شخص كلبه طيب كلش واي شي يأثر عليه
وطبعاً مصيبة جسام أثرت بيه
لأن جسام إبن صديقه الي هو خالي صباح الله يرحمه
بابا مثل الي يحس بذنب وقهر وحزن على صديقه
وجسام جان نصيبه من الدنيا نفس نصيب أبوه
أبوي من ينقهر يزيد بشرب الخمرة
هو يشرب بعادته ومن زمان
بس من ينقهر يثكل بالشرب
هواي يشرب
بس مايبين عليه
ويستحي من عدنا إذا شفناه
يجي باليل سكران بس مايأذي أحد
مثل خالي سعيد
يعني أبوي شوي يسيطر على نفسه
عكس خالي سعيد
إلي مايعرف شنو يسوي مايدري بروحه
الظهرية من جنا ببيت جدي اجوي الأمريكان
خبصوا شارع حيفا كل يوم والثاني يجون
يفتشون
باليل رجعنا لبيتنا اني وامي
أبوي طلع يشرب
امي نامت بدون عشا
كالتلي عشي اخوانج ونيميهم
سويت الي علية من واجب يومي ونمت
مرت كم ساعه من اليل
وسمعت دكه الباب
امي حست وكامت فتحت الباب
اني من جوى البطانية طلعت راسي اباوع
شفت أبوي سكران وبالكوات واكف على رجليه
يحجي وي امي بس ماميزت الكلام
يعني حجي عتاب وملامه
من يحجي احسه مختنك ومقهور
يلوم امي ويعاتبها
حسيت اكو سر بيناتهم قديم
الله أعلم شنو ؟
امي سندته واخذته للغرفه بهدوء على مود مانكعد
ونشوف ابونا بهاي الحالة
ثاني يوم
طر الفجر وبداية يوم جديد
نفس روتيني اليومي المعتاد
أنظف البيت واهتم باخوتي.
بابا راح لشغله وضايج كلش. امي بالكوة تاكل
وجهها شاحب وذبلانه من القهر والضيم
هالفترة محد جان مرتاح وكلنا كلوبنا تلعب
الجيران كل يوم سامعين واحد شايل منهم
اكو ناس سافرت للخارج لأن خافوا تضطرب أوضاع العراق وتزداد سوء
فوك ما هي سيئة كل يوم والثاني نسمع بموت وقتل وخطف ومحد يعرف شنو المصدر
ولاشنو سبب القتل هذا
امي راحت لبيت جدي تطمن عليهم ورودينا وياها راحت تلعب وي أطياف
مر اليوم بهدوء رهيب!
الصبح جيراننا شالوا والناس الي ورانا سمعت راح يسافرون لأن قبل فترة انقتل ابنهم
كل العوائل نفس القصص ونفس الوجع
الظهر اجه أبوي ومبين عليه التعب
تلكيته سلمت عليه
باسني براسي وكالي حضريلي ملابسي
حتى يسبح
سبح صبيتله غدا مااكل زين
ومن سمع جيراننا شالوا انقهر
منطقه شارع حيفا شهدت هواي أحداث
ويمكن أقوى من أحداث داعش
الله شاهد محد سلم لا طفل ولامرة لاشيخ لاعجوز محد سلم
بابا يسمع الأخبار طلع بالباب
اجاه خالي صابر بقوا يسولفون بالباب
تالي كعدوا بالحديقه واجوي رياجيل جيراننا هم
اني اسمعهم
صابر-: الأوضاع تعبانه وبس الله الي يستر شنو تاليها الي يروح بمنطقه شيعية وهو سني ينقتل
والي يروح بمنطقه سنية وهو شيعي ينقتل بس مجرد سني وشيعي
مؤيد( ابو أطياف ) -: محد راح يسلم
صابر -: الله كريم
بابا صاحلي اسوي جاي
اني أسمع سوالفهم ومركزة كلها عن أوضاع العراق والسياسة
كلام افتهمه وكلام ماافتهمه
سويتلهم الجاي
قيصر أخوي اخذه
هم جان كاعد يمهم
من خلال الكلام جابوا طاري أخوي لؤي
استوه بلغ سن الرشد وقدم على الحرس الوطني
واحد من الرياجيل الي كاعدين كال لبابا
إنه لؤي لازم يعوف سالفة الحرس الوطني لأن اي شخص بالحرس الوطني يعتبرونه مايخاف من الله ومرتد عن الدين هذا حسب منطق الإرهابية هذا الرجال جيراننا أعرفه أربعه وعشرين ساعة لازم الراديو ويسمع الأخبار وكال لبابا ترا ابنك يعتبرونه الإرهابية مرتد عن الدين والإسلام
وطبعاً كلام الرجال كله صحيح وابوي عنده أولاده بالدنيا كلها إحنا بالنسبة اله النفس الي يصعد وينزل وياه
والإرهاب بذلك الوقت جانوا اسمهم المجاهدين في سبيل الله
ياجهاد لعبوا بالعوائل لعب
مرت الأيام وتقريباً كم شهر
الكل يتوقع الأوضاع تسوء مانسمع خبر غير الموت والقتل
وفلان انقتل وفلان انخطف
بيبي وام جسام كل يوم والثاني يروحن يدورن على جسام
ما الأخبار الي سمعناها ماموثوقه
انكسر كلب ام جسام كسر ماينجبر أبد
كلما تروح وتدور على أبنها
ماكو أي خيط امل ولا رجعه مانعرف عنه شي
كل يوم العصر والمغرب ام جسام تكعد بالباب وتون ونين يهد الحيل
بيبي تبجي وتكول ليش اربعتهم قصدها على خوالي خالي صابر اسمعه يكول بصوت مخنوك حسبي الله ونعم الوكيل
والله أكبر
تخطينا هالمرحلة متمنين مانفقد بعد شخص عزيز
خالي سعيد هجر مرته وبقى أربعه وعشرين ساعة سكران بالشوارع
خالي تأثر بموت جسام كلش كل يوم يشرب
شرب شرب ويبجي اليل كله الجيران بس تتشكى منه خوالي يكولون فضحنا همل بيته ومرته وبناته عبالك الدنيا وكفت على موت جسام
زوجته كلش ملت من هالحالة وضالة على خوالي ينطوها مصرف إلها ولبناتها خالي سعيد ترك شغله
خيانه بس شرب ماتحملت خالتي ام جسام طلبت الطلاق وتطلقوا
ام جسام أخذت بناتها وراحت يم أهلها بالفلوجه
من راحت شلعت كلوبنا بقينا يوم كامل نبجي عليها وعلى بناتها وعلى جسام
كل شي تذكرنا بيبي راحت ذكرياتها لخالي صلاح بكرها الوجع الأكبر والي مستحيل تنساه
خالي سعيد ازدادت حالته سوء ماهمه بناته ولامرته باله كله بجسام
أربعه وعشرين ساعة يبجي عليه من اشوفه اموت قهر
ضل خالي سعيد يم بيبي مثل الطفل كلها تخلت عنه خوالي وخالاتي بس بيبي احتوته رغم كل شي
خالي سعيد جان من يسكر يغلط ويضرب خوالي زعلوا منه وخالاتي مايكدرن يتحملنه لأن من يسكر مايدري بنفسه
بس أمه وياه ماعافته
خالي سعيد حياته صارت بس شرب
حاولنا نرجع مثل قبل وبدينا نجتمع جمعتنا المعتادة بالساحه مالت خالي سامر الله يرحمه
والي استلمها خالي مؤيد وخالي صابر هم يحرسون بيها
امي كالتلي سوي أكل هواي لأن جان يوم خميس
نسوي ثواب لموتانا
أبوي جاب لفات هو جان شغله زين بمطعم مشويات
أطياف رشت الحديقه وصارت ريحه طيبة
طلعنا التلفزيون جانت غايتنا نسعد بيبي لأن مرة جبيرة كلش ومريضه وهي خيمتنا نخاف عليها أكثر من مانخاف على أرواحنا
خوالي يخافون عليها ومنعوا اي شخص يذكرها بجسام أو يبجي كدامها لأن مريضه وعمرها مايساعد بعد هي مواليد ١٩٢٢
أكلنا وقرينا الفاتحه والحمد لله على كل حال
خوالي يسولفون وي بيبي ويواسونها على فقدان جسام يكولولها ان شاء الله هاي آخر احزاننا وبعد محد يموت ان شاء الله ونعيش بأمان وان شاء الله أوضاع العراق تتحسن ماكو شي ان شاء الله كلامنا كله تفاؤل
وكله مبني على ان شاء الله
خالي مؤيد اجاه صديقه
وراح لغرفه الحراسة إلي بالساحه
الغرفه للاستراحة
كعد هو وصديقه يسولفون
صديق خالي مؤيد
ولد فقير وحباب من زمان نعرفه ماكدر خالي مؤيد يكعده يمنا لأن خالاتي ونسوان خوالي كاعدات وعيب
كعدوا بالغرفه
جنت اعزل بالمواعين مامرت على كعده خالي مؤيد وصديقه خمس دقائق
ومانشوف غير سيارة بيها كم شخص ملثمين أسود باسود
وكل واحد بعرض الحايط اجت على بالي من جنت أخوف رودينا من جانت صغيرة وتعاندني واخوفهاا بالوحش والشيطان
يمكن من خوفي حسيت ذولي هم الشياطين والوحوش
...يتبع
