(لماذا لم يستجب )
أكثر سؤال جان بعقلي من جنت صغير هو ليش من نتمنى شي الله ما ينطيه النا ويعطينا بس الأشياء الي يريدها هو !!!
ندعي الله ونبجي حتى نحصل الشي الي نريده .. بس مو دائما يستجاب ليش شنو السبب !؟
ليش الله هو الي يختارلنا الأمور وما يعطينا الأمور الي احنا نتمناها شنو السر !؟
فقير حال ومال ابوي.. جنت صف اول ابتدائي عندي قميص واحد بس وجنطه ماعندي اروح بعلاكه
وامي مريضة سرطان الرئة
ابوي جان يبيع ببسطية بالشارع رجال جبير
يعني حال الضيم حالنا
وبيوم من الأيام توني راجع من المدرسة شفت ابوي يصلي كعدت اباوع عليه وصافن افكر ليش يصلي وهو يكول عدنا الله اذا نصلي وندعي ونتمنى كل شي يتحقق
بس ليش ابوي ما يدعي امي تطيب من المرض ونصير أغنياء حتى اشتري ملابس واكسر عيون الطلاب الي بالمدرسة ...
خلص صلاته وسألته جان جوابه من انطاني مصلايةوكالي صلي وادعي
وبقيت اصلي واصلي وادعي سنوات مرت لحد ما صرت ولد مراهق وتغير تفكيري وصرت اتعمق بالتفكير
وضعنا من سيء إلى اسوء كبرت ومالكيت شغل
طفولتي خلصتها بالحسرة والحرمان والحزن على امي المريضة ماعدنا فلوس نعالجها
صرت اشتغل عمالة ويوم عن يوم يزيد حقدي على المجتمع وعلى كل شي
وصرت اتنرفز من ابوي يكولي التزم بصلاتك يوم عن يوم يزيد كرهي للصلاة
طول السنوات اني ادعي وماكو فايدة انعكس الدعاء وصار عكس الي دعيته
ومن اكول لابوي ليش الله ما يستجاب دعائي يكولي ادعي بنية صافية
ودعيت بنية صافية جنت كلما ادعي ابقى ابجي أتمنى اخلص من وضعي واتمنى امي تشفى من مرضها
بس كل الطرق مسدودة بوجهي
أسباب هواي ابوي كان يقنعني بيها ويفهمني ليش الله ما يستجاب دعائنا
جان يكولي الله يريد النا الزينه وهو ارحم الراحمين علينا حتى من امنا وابونا
هذا الكلام ما جنت افهمه جان كلام جبير استغرق فهمه فترة عمري كله ..
امي ساءت حالتها وتمرضت وبعدها ماتت من ماتت دخلت بحالة نفسية صعبة وجنت بعمر حرج
ابوي ظاهريا مااهتم وهذا الشي خلاني اكرهه من ماتت مانزلت منه دمعه وخلصها يقرأ القرآن ويصلي واني أتذكر بالفاتحه مالتها كمت اكفر بالله الخالق سبحانه وتعالى...
من بعد الوفاة صادقت أصحاب السوء وانجرفت للهو واللعب والبنات وحبيت بنية حب جبير وردت اتزوجها
بس إمكانية ماكو
ابوي ينهاني عن هاي التصرفات ويترجاني بس للاسف جنت ابن عاق
وعلى مود البنية هاي سويت هواي أشياء سيئة واولها السرقة أصدقائي علموني وكمت كل يوم اطفر على بيت وابوكه
يوم فلوس ويوم ذهب ويوم يلزموني وانسجن بس يطلعوني اصدقائي بواسطاتهم
