#البارت ٣١
*********
درر
كنت أقنع نفسي وأدعي ربي ينطيني القوة والصبر حتى اكدر أتحمل رفعت أول سبب لأني أحبه والثاني لأن ماعندي غيره وحتى إذا أكو اني مااكدر اعوفه
حرك ركبتي بالجكارة شاغت روحي من الألم
وشفت جهازه وحده تدك عليه إسمها أنغام منو هاي
طلع من الحمام شافني لازمه موبايله
رفعت-: منو سمحلج تلزمين موبايلي
درر-: منو هاي
رفعت-: معليج كومي حضريلي ريوك بسرعه
حضرتله ريوك حطيت الصينية كدامه لزمني من أيدي حيل
رفعت-: شنوهذا
ويأشر لثوبي
درر-: شنو
رفعت-: صدرج كله طالع ماتشوفين إنتي ليش متنتبهين على نفسج الاتك والست،،، شنو انتي من بشر
درر-: والله ماانتبهت نسيت الدكمه مفتوحه
رفعت-: الله يطيح حظج يا أدب سز
درر-: اصبلك بعد جاي
رفعت-: أي
كمل ريوكه
رفعت-: جيبي قميصي الأسود
درر-: صار
لبسته قميصه وسديت الدكم حتى جواريبه اني لبستهن اله هو واكفلي ويباوعلي ومركز بعيوني
درر-: مشط شعرك قبل لاتطلع
رفعت-: مالي خلك
درر -: لحظه
جبت مشط وسبريه مشطتله ورشيتله شوي سبريه
اجيت ابوسه بس تراجعت
راح لشغله اني رجعت نمت شوي مر وقت وكعدت
شفت عمتي صبحت عليها بستها براسها
ام رفعت-" حروح للسوك رايدة شي
درر-: لاعمه سلامتج
ام رفعت-: يمه درة مااوصيج زينب من تكعد ريكيها زين البارحه مانامت أبنها اليل كله كاعد ويرضع محتاجه مداراه واكو دجاجه سوي مركه وتمن بعد حيلي
درر-: صار
ام رفعت-: عمج ياكل كله سلك لو هالة هنا جان كلتلها بس ولت للمدرسة
درر-: أي عمه اسلكله بيض واشويله طماطه
ام رفعت-: اي عفية يلا اني رايحه
درر-: الله وياج
عزلت البيت سويت ريوك لزينب وسويت غدا اجت عمتي باستني براسي من شافت شغلي معدل ونفذت كل شي كالته إلي بالحرف الواحد ام مصطفى اجت سلمت وكعدت شوي وراحت عبالك غريبة وخطار كلتلها ابقي تغدي ماقبلت كالتلي البيت مومثل قبل محد يرحب بينا وخلت وراحت شسويلها كلت لعمتي كالتلي عوفيها هي حامل ومشوشة
تغدينا اجه منتظر تغدا يمنا بس ام مصطفى مااجت استحيت منها جهزت إلها صينية وكلت لعمتي تاخذها إلها خطية هي حامل وتتعب هالة رجعت من المدرسة شمرت ملابسها بالحمام وكالتلي غسليهن باجر اريدهن مغسولات ومكويات مالي خلك اتعارك وياها
ورى الغدا غسلت المواعين وكل واحد راح لغرفته ونامو الظهرية بقيت بس اني منتظرة رفعت شوي واجه تعبان كلش
درر-: الله يساعدك
مارد عليا
نزعته ملابسه حتى حذائه وجواريبه جهزتله الحمام
دخل وصاحلي
رفعت- تعاي وينج
درر ': ها
اخذتله المنشفه عبالي يريدها
رفعت-: تعالي ليفي ظهري
شوي استحيت بس ليفت ظهره شفته تعبان غسلت شعره ونشفته اله
صبيتله غدا وتغدا
اني كعدت اباوع عالبلازما
رفعت-: جيبيلي مي
درر-: أي
كل شوي يكومني يريدني بس اكول شي منتظرني بس ازل شوي بس ماانطيته مجال
********
ضياء
رجعت من السفر خوالي كالو انتقل ببيت غير بيتك
أجرت بيت امي صحتها شوي زينه بس ماتمشي على كرسي متحرك ولازم عملية ثانية خوالي دزولها مرة جبيرة تداريها اني كعدت بلا شغل فلوس ماعندي بعت البيت وفلوسه خلصت عالايجارات المدرسة صارت بقيادة خوالي وماينطوني فلوس منها بس لعلاج امي ومصرفها فقط واني مااكدر اشتغل ولا أطلع من البيت لأن الشرطه تلقي القبض عليا
نفسيتي متحطمه إحباط في إحباط كنت بحاجه لشخص حقيقي مالكيت غير مرام هي الوحيدة الي تفهمني بس المشاكل إلي صارت شي أكيد حتغيرها ويصير حاجز اتصلت بيها
ضياء-: الو شلونج مرام
مرام-: ضياء؟
ضياء-: أي حبيت اتطمن عليج اتمنى المشاكل الصارت ماتأثر على صداقتنا
مرام-: شلونك
ضياء-: بحاجتج
مرام-: بشنو اكدر أساعدك
ضياء-: يصير نلتقي بس مو بمكان عام
مرام-: يعني انت تعرف إذا أهلي عرفوا بيا على تواصل بيك ماراح يقبلون لأن أنت حتى مافكرت تسال عن عنود شنو صار بيها من بعدك
ضياء-: آسف بس والله موبيدي
مرام-" اني الشي المتأكده منه الشخص الي عفت عنود علموده هو هم تركك وبهذلك
ضياء-: اني غلطان وماجاي اتوب من غلطي وصدكيني لو ينعاد الزمن هم راح اكرر الغلطه لأن الحب موبيدي شي خارج عن سيطرتي اريدج تساعديني
مرام-: أوك نلتقي
التقينا بمكان هادئ وبسيط سلمت عليها كلش متغيرة مومثل قبل كانت إذا تشوفني بنظراتها لهفه وانتظار هسة مااشوف غير البرود والقسوة سولفتلها كل شي صار وياي
مرام-: يعني هذا الكلام مو مال شاب بعمرك المراهق يستصعب يسوي هيج أنت ماجاي تستوعب الخطأ السويته بسبب انانيتك لحد هاي اللحظه الي جاي أشوفه انت حاير بس بنفسك وتفكيرك بس بدرر حتى حزن لحالةامك ماكو وعنود الي حبتك ماسالت عنها ومافكرت شنو صار وياها من بعد رفضك الها
ضياء-: لا تظلميني
مرام-: انت تظلم ماتنظلم حتى درر الي على أساس تحبها شوف شنو سويت بحياتها دمرت عائلتها وكنت سبب بقتل شاب بريء كل هذا بس حتى ترتاح وتأخذ درر مو لأن تحبها بس لأنك اناني وفوك ماتتصور نصيحه مني راجع نفسك
ضياء -: كوني وياي لأن ماجاي أعرف أتصرف محتاج شخص يساندني
مرام : بعد الي سويته منو تتوقع يوكف وياك شي أكيد الكل راح يتخلى عنك بس راح أحاول أساعدك وراح اوكف وياك
رجعت صداقتنا اني ومرام اتصالات ولقاءات بس هي كانت تتكلم وياي بضمن الصداقه فقط لاغير يمكن كانت قبل عدها مشاعر تجاهي بس اختفت
حسيت تجاها بارتياح ومودة بس موحب ولا جاب ذرة شعور من الي حسيته تجاه درر
فكرت أسوي علاقة حب وياها بلكي تكدر تنسيني درر
خابرتني كالت راح تجي لبيتنا تشوف امي
اجت هي وزوجه أبوها لأن صديقه امي ابو مرام مايعرف لأن حاقد عليا وزعلان من خوالي
كنت بغرفتي طلعت سلمت عليهم وبنظرات عيني كدرت اكول لمرام تجي وراي
كعدنا بالبلكونه وسولفنا اني بديت انظرلها نظرات موزينه اباوع لجسمها لأن لبسها ضيق وحلوة رشيقه دايما انيقه واني كنت محتاج صارلي هواي ممعاشر والي بعمري كلهم متزوجين
هي كامت بحركه مفاجئة مني لزمتها من خصرها وبستها
ضربتني راجدي حيل ضاجت مني رادت تروح لزمتها من ايدها
مرام-: عوف أيدي
ضياء-: آسف
مرام-: انت صدك متستحي على نفسك
ضياء-؛ بس اهدأي اني أعتذر صارلي هواي المحلج بحبي
مرام-؛ ههه ياحب هذا ضياء شبيك أصحى
ضياء-: اني معجب بيج مرام
مرام-: وتريد تجر وياي علاقه حب كاذبة وماوراها لازواج ولاشي الهدف منها إني اعوضك عن غياب درر عنك اني مو بدل ضياء كافي تلعب بمشاعر البنات حرام
عليك
ضياء-: بس احبج منو كال مااتزوجج بس إنتي تشوفين ضروفي
مرام-: لتكذب كنت محترمك أو يمكن شفقانه عليك بس هسة كلش نزلت من عيني ماتوقعتك تستغل صداقتنا لرغباتك الدنيئة مع الأسف
عافتني وطلعت كلامها هزني هز حيل صغرت أمام نفسي
بقيت كاعد بالبيت لا شغل ولا عمل
باليل خابرتني عنود تبجي
عنود-: ضياء أحبك والله ليش عفتني
ضياء-: اني آسف عنود خلص انسيني وعيشي حياتج
عنود-: مااكدر من عفتني اني تركت المدرسة وكل حياتي واكفه وكل يوم ناقليني للمستشفى تدري كم مرة حاولت انتحر بس لأني أحبك
ضياء-: اني ماافيدج بشي ولا راح اكدر احبج ومااعرف أكذب عليج
عنود-: ليش ماتحبني شنو البيها مابيا اني احلى منها وعندي أهل أغنياء كل شي عندي ليش تحبها ماتحبني
ضياء-: عنود أصلا زواجي منج غلط إنتي بعدج صغيرة اكبري واتزوجي واحد بعمرج أحسن
عنود-: مااكدر خلينا بعلاقة حتلو ماتتزوجني عادي بس لا تعوفني خليك وياي كل شي تريد وشنو محتاج اني البيلك
ضياء-: لاتنتظرين مني شي
عنود-: مو مشكلة
رجعت بعلاقة وي عنود كانت علاقه مزيفه مبنية على شهوات فقط مني وهي كانت مراهقة متهورة وغبية كل يوم نسهر للصبح تحير شنو تلبسلي تدزلي صور
مريحتني كلش من هاي الناحية
وكامت ماتتحمل تكون علاقتنا محدودة بس بالموبايل طلبت مني اجي لبيتهم
ضياء-: شلون اجي لبيتكم من كل عقلج إنتي شجاي تحجين لج بابا إذا ابوج يعرف غير يذبحج ويذبحني
عنود-: أبوي ماله علاقة مايعرف هو ماعايش ويانا بس اني وامي بالبيت
ضياء-: وشنو تكولين لامج
عنود-: عادي اكولها راح أرجع للمدرسة اداوم بس بشرط ضياء هو المدرس الخصوصي الي يدرسني غير هيج ماارجع للمدرسة
ضياء-: ماراح تقبل
عنود-: تقبل اني من إتصل بيك تعال ونتفاهم ومنها هم تحصل فلوس وتجي اريحك نستمتع شوي حبيبي
ضياء-: أوك
عنود-؛ أحبك حبيبي وعمري وقلبي وكل شي أنت أوف شوكت تجي شنو تحب البسلك
ضياء-: بكيفج
عنود-: أحمر أدري بيك تحب هاللون
ضياء-: عنود إنتي مقتنعه بالشي الي جاي تسوينه
عنود-: أي أنت حبيبي ومستعدة كل شي اسويلك حتى انسيك عنود وتحبني يعمري
ضياء-: تعرفين كلش زين بعدني ماناسي درر وماراح أنساها صدكيني
عنود-: ملييييت من درر وين مااروح درر يادرر شوكت أخلص منها
ضياء-: إذا ماتريدين علاقتنا تخرب بعد لا تجيبين إسمها على لسانج
عنود-: أوك
خابرتني ثاني يوم ورحت كنت متردد
... يتبع
