#البارت ١٣
#شارع_حيفا
#زهراء_محمد_السراي
*********
رنده
كل يوم وكل ساعه نصحى على صوت الموت
لا إله إلا الله
لا إله إلا الله
لا إله إلا الله
أصوات التشييع وهي أصوات الموت
أصوات البكاء والصراخ نسمع صوت رجال جبير بالعمر يصرخ على إبنه إلي مات
لو ام تلطم وكاعده بالشارع ولازمه صورة أبنها متقبل تكوم
كل الشباب ماتوا بعمر الورد
أسمع الأم وهي تصيح أريد وليدي
شكد مايتقدم بية العمر مستحيل تروح
رنه هاي الأصوات الحزينه من بالي تبقى مدفونه بأعماق ذاكرتي للأبد
مو بس اني كل شخص عاش بذاك الوقت
وعاش هاي الظروف القاسية
الله أكبر على كل ظالم الله أكبر
أصوات الرصاص الظالمه أخذت أفراح ناس وأعمارهم
إنتهت
من أسمع ناس تشيّع بموتاها هواي أصوات أسمع
صوت الأم صوت الأب صوت الأخ
محد يعرف شنو سبب القتل والإجرام شنو سببنا إحنا
ناس عايشين ليش تحرمونا من الحياة باجرامكم سمعت اب يكول عليمن انادي اني عليمن والمن اشتكي هذا الظلم
يا الله كام يصرخ
موضوع الطائفية موضوع حساس كلش
ولحد الآن الناس تخاف منه وحقهم
أغلب الناس تبتعد عن هاي المواضيع وما تتطرقلها أبد
إحنا العراقيين الله خلقنا مزيج واحد
ناس تكمل ناس
إحنا نتميز عن كل بلدان العالم بشي واحد
إنه كل البلدان بيها قومية أو قوميتين أو ثلاثة أو أربعه
وما متواصلين تلكاهم
وإحنا وعينا عالدنيا مثل إلي صعد بكية
مايعرف منو إلي بصفه
منين مامنين
بس مستعد يدفعله الكروة
إذا ماجان شايل فلوس
وينزل يساعده إذا جان شايل اجياس
علاليك واغراض بدون متسأله منين وشنو وليش
يعني سوالف الطائفية العرقية والقومية والدينية يعني والله عيب
يعني خلوها ورانا شوية
ترا الراح راح
نزفنا دم هواي وبجينا هواية
ودفنا هواي من احبابنا
كافي ندفن والله كافي ندفن
خلونا نسمع بواحد ميت موته الله
نريد نصعد البناء ليفوك
نريد العراق يصير أحلى بلد بالعالم
شبابنا كافي بعد هذا التوتر إلي بيناتنا
...
مات خالي مؤيد ومنها مات كل شي
الإرهاب الي عود يجاهدون في سبيل الله بالبداية جانوا يقتلون بس الأمريكان
من تطب دبابة الأمريكان
بسرعه يفجروها الإرهابية إلي كانو بمسمى المجاهدين في سبيل الله
ومن الأخبار جانو يكولون إنه هدفهم
بس يطلعون الأمريكان من العراق
لأن الأمريكان بذيج السنوات جانوا تارسين العراق بدباباتهم وكل جمعه ينتشرون بالمناطق يفتشون كل البيوت
والإرهابية حاولوا يمنعونهم واي دبابة الهم يشوفوها يفجروها
ومنها شوية شوية بدأ الجهاد
وإلي معناه صار القتل مو بين الإرهاب والأمريكان
صار القتل بين الإرهاب والشعب الناس البريئة
ومنها صار القتل بين أبناء الشعب ناس تقتل ناس على علم هواي أشخاص
انقتلو بدون سبب
الله شاهد بس على مود انت سني وأنت شيعي
بسبب هذا الشي ومن ضمنهم خوالي
واحتمال حتى جسام
صرنا مجتفين ومقيدين الأيدي
لانكدر ندور على جسام ولانكدر نعرف منو كان السبب بقتل خالي سامر ومؤيد
منو نسأل
ولمنو نشتكي
صارت الدولة تايهه وإحنا حايرين إذا نريد ناخذ حقهم من منو
خليناها على الله
وحسبي لله ونعم الوكيل
دعوة الأمهات الثكالى ماراح تطفىء لوعتهم
وحركه كلوبهم
الأخبار ماتطمن بخير
خالاتي يسر وفضيلة بيوتهن قريبة علينا
بس من صارت الأحداث
رجل خالتي يسر كاللها لازم ننتقل بغير منطقه لأن منطقة شارع حيفا راح تصير تراب ومحد راح يعيش
جهزت أغراضها خالتي يسر
رحت اني وامي نرتب وياها
ونسالها إذا محتاجه شيء
يسر-: تهاني لو تحجين وي رجلج وتكوليله هم تشيلون ويانا احسنلكم والله محد ضامن
نفسه بهاي المنطقه
وإنتي تشوفين الأوضاع شلون صايرة
تهاني-: خية ابو لؤي مايقبل
يكول عيشتنا هنا وموتتنا هم
يسر-: والله موهينه اعوفج واعوف امي
بس رجلي دك رجله إلا نشيل
تهاني-: طاوعيه والله كريم إحنا ان شاء الله
ماعلينا شي يجي يوم وتنتهي هاي الظروف
جهزنا كل شي باليل ورجل خالتي يسر كال باجر ان شاء الله
من الصبح طالعين
وراح ينتقلون لمنطقة حي الجهاد
هناك شوي الأوضاع أحسن
باليل سويت عشا ودزيت لخالتي يسر
جانت مقهورة على بيبي
امي دزتلها العشا
واني بقيت أنظف بالحديقه لأن العصر أبوي كاعد وي جماعته وتارسيها جكاير
بين ماجنت أنظف واكنس بالحديقه
انشمرت على ظهري مثل الحجارة صغيرة
اني هيج عبالي
تقربت من شفتها
لكيتها ورقه ملفوفه
فتحتها
بيها دم ورصاصه
والورقه بيها كتابة اني مااعرف أقرأ
رحت أركض لابوي
قرأها لكاها تهديد
إنه أخوي لؤي لازم يبطل من شغلة الحرس الوطني
واخوي مبطل من زمان
حتى مااشتغل هواي
بقى شهر أو أقل الشهر
مع إنه بالبداية لؤي عاند ماراد يعوف شغلته
ولد شاب وشهم كل ولد بعمره يحب يبين إنه شجاع ولؤي يحب شغله لأن يحسيه بقوته
عباله هذا الشغل راح يحميه
بس بالاسم هيبة
امي توسلت بيه بالكوة عاف الحرس الوطني
أبوي راح كال لخوالي
واجتمعوا من قرأوا رسالة التهديد
كلنا خفنا
قبل بزمن الطائفية
إذا شخص يريدون يقتلونه
يدزوله رصاصة تهديد
امي من سمعت خافت كلش صارت ليلتنا جحيم
وبقينا نفكر ومتوترين أبوي وامي قرروا لازم بسرعه
يروح وي خالتي يسر لمنطقه حي الجهاد
لأن خافوا عليه كلش
امي حجت وياه بس منهارة من البجي
ماكادرة تتحكم بمشاعرها
تهاني-: يمه لؤي بعد رويحتي انت
تروح وي خالتك يسر وماتطلع من بيتها
وماتجي هنا
مناه لمن تصفى الأوضاع
واني بنفسي اكولك تجينا
لؤي-: لالالا أأأ يمه مامماكدر اعععوفكم
أخوي يفحط من يحجي لأن لسانه ثكيل وفطير كلش
كلبه طيب إلى درجه
امي تبوس بخدوده بالشامات مالات وجهه
هو باس رأسها
لؤي-: يييمه خخخليينا كككيلنا نيروح
تهاني-: لايمه مو مهم اني المهم أنت
أهم شي احسك بمكان امن يبعد روحي إذا تحبني وتريد راحتي
تروح وي خالتك يسر
وتوعدني ماتطلع لأي مكان
وإياك تجي لشارع حيفا
عسى ماتسمعنا كلنا تكتلنا
حضنته حيل
وكلنا نبجي لأن راح نشتاقله
ثاني يوم الصبح راح لؤي
وي بيت خالتي يسر
لمنطقه حي الجهاد
بقينا بس إحنا
وبيت جدي
بمنطقه شارع حيفا
تحملنا كل شي
ضلينا عايشين برعب لا ليلنا ليل ولا نهارنا نهار
نكعد الصبح على أصوات
ضرب طلقات نار
أبوي كعد من الشغل وخوالي كذلك لأن أي شخص يطلع من بيته ينقتل وإن لم يكن له عداوات
أو أي شي
ينقتل بطلقة تايهه بكل بساطه!!
مانعرف مصدر الطلقات منين !
لأن المنطقه تحاصرت من ثلاث جهات
صارت منطقه شيخ علي بالنص
الأطفال تتراجف من الخوف
بيبان البيوت تتراكع من القصف
نحط ايدينا على اذاناتنا حتى ماننطرش
لأن الصوت مو بس قوي
كلش عااالي
العوائل كلها حابسة أرواحها بالبيوت
وإحنا من ضمنهم أكيد
مر أسبوع ...
إحنا ماطالعين من غرفنا ولا من البيت
لدرجه الحوش ماشايفينه
أبوي منعنا نطلع
اباوع من الشباك على حوش بيتنا واشوفه كله رصاص
والحديقه يابسة
لأن ماساقيتها
صايرة مثل الصحراء
بيت جدي ماشايفتهم ولا نعرف عدهم أكل أو لا
إحنا عدنا أكل بالثلاجه مجمدينه وناكل بيه شوية شوية
حتى مايخلص ومنين نجيب ومنو يطلع نخاف على ابونا
أمي ضل بالها يم بيبي وخالتي فضيلة لأن جان بيتهم قريب علينا
بس مانكدر نروحلهم
خوف ماينوصف
مر الأسبوع واذاناتنا توجعنا من الأصوات العالية مال الرمي وإلي مانعرف منين
من هدأ الجو طلعنا بالحوش شوي
حسيت نفسي أول مرة الشمس تشرق علينا
امي كالت لازم أروح أشوف جدتج
لبست عبايتها
وبس فتحت الباب
القناص قنص،،،
... يتبع
لاتنسون التصويت ❤❤❤
سؤال البارت/// القناص قنص منو !؟
