#زهراء_محمد_السراي ❤
#توأمي-الملعون
*********
صبا
دخلت لعمتي بالمطبخ لكيتها متخربطه
جفلت
رحت أركض لابوي
رشينا عليها مي ماكو ماكعدت
نقلوها للمستشفى
الدكتور جاس نبضها كال البقية بحياتكم
انتقلت الى رحمه الله
ماتت عمتي بسبب ارتفاع السكر
ومااعرف اوصف مدى صدمتي
محد تأثر بوفاتها بس بدرية
بيبي تبجي بالسر عليها
عمامي عادي وزوجها ولا كأنه صار شي
بدرية بقت عدنا شهرين ورى وفاة عمتي
زوجها كلما يريد يأخذها ماتقبل تتعارك وياه
أخير مرة اجاها طردته من البيت
بعد مرور شهرين من الوفاة
رجع الوضع مثل ما هو
بيبي رجعت نفس قساوتها
وكرهتني وكرهت امي بالزايد
لأن ماتت بتها وإحنا عايشين
هاي عقلية بيبي الي ماتنفهم
والي ماتعرف القضاء والقدر
وانه الأعمار بيد الله
خلال هاي الفترة الواتساب امتلى رسايل من رقم مااعرفه
أخير شي كلت لازم افتهم هو منو وشيريد هاكد يراسلني ويتصل
قبل لا ادزله رسالة شفته مغير صورته الشخصية
وجانت صورة محمد لابس نظارة حتى يغطي الجرح الي جوة عينه
تأففت سألت نفسي منين جاب رقمي بعد مافكرت
تذكرت من ضاع موبايل خالتي ام سعاد
وشي اكيد من عنده أخذ الرقم مستحيل محمد يضيع هيج فرصه بحياته
ترددت بين ادزله رسالة أو لا
تالي دزيتله سمايل😒
ونمت
ثاني يوم داومت انطونا جدول الإمتحانات
لازم أنتبه وابتعد عن الإنترنت حتى لو اريد اتعلم أمور تهمني
بالعطلة راح استغل الإنترنت وكل شي أتعلم
راح أقرأ كتب واطور معلوماتي بالإنجليزي
الإنترنت جان اله هواي فائدة الي
تغيرت شخصيتي للأحسن
بديت أستوعب حياتي واتأقلم وياها
اهم قرار اتخذته إنه لو مهما كلفني الأمر لازم ما اكون ماشية على خطى عائلتي
بعد ماخلص الدوام
لكيت مراد منتظرني بباب المدرسة
وانتبهت عللى سيارة محمد وجانت وياه ريم صاعدة وياه ومندمجين بالكلام
مثل شخص يقنع شخص ثاني بموضوع مهم
رجعت للبيت
مثل روتيني المعتاد
بدرية تلعب بموبايلها
اتصلت بشخص ماعرفت منو
توترت لأن مايرد.
اني عبالي تتصل على زوجها ومايرد لأن أخير مرة تعاركت وياه
صارت عصبية كالت هسة غير يرد
ليش مايرد علية
من رد هالشخص صعدت للغرفة بلهفه
بيبي كاعدة تحسب بفلوسها
العلاكه السودا ماكامت تكفي الفلوس
ومن غير هاي العلاكه عدها ربطه( حجاب)
تحط بيها فلوس وتسويه مثل الصرة
هاي فلوسها ماتصرف منهن ولافلس
مرة بالسر حسبت الفلوس الي بالعلاكه طلعن أربع ملايين ونص
مااتذكر يوم وزعت عيديات النا أو لأي طفل
ماتحب تنطي اي شي
حتى صدقات ماكو
مرات أبوي ينطي بس رياء حتى ناس تمدح بيه
ورغم التمثيل بهالشي والرياء بيه الناس كلها تكره أبوي وعمامي لبخلهم ولمشاكلهم بالسوك
إذا شافو طفل يبيع علاليك أو مي بالسوك
يضربوه ويطردوه من السوك يكولوله تخرب رزقنا
يومية مشكلة بالسوك
وحالياً يريدون يبيعون البيت الي كاعدين بيه
على مود الورث
وكل فترة تصير مشكلة مااعرف شنو راح يصير
ابتعدت عن كل الأفكار السلبية ووجهت انتباهي كله تجاه دراستي والامتحانات
أول مفتحت الكتاب
اهتز موبايلي
ردت اقفله وانتبهت على إشعارات من الواتساب
الرسايل الي واصلتني من محمد ١٢٠ رسالة
شنو سالفته هذا
فتحت رسايله
كلها أشعار غزل شعبي
أكثر العجبني وحسيتهن ينطبقن عليه
ذني
مارديت عليه
وماجنت أعرف شنو حظر
أو شلون احظر شخص من الواتساب أو من اي برنامج
