# البارت الأول
#زهراء_محمد_السراي
#توأمي_الملعون
*********
دموع منهمرة
بكاء مرعب
أصوات الأسلحة
دقات قلبي المتسارعه
،،،
أيديا ورجليا مجتفات
وحاطين على حلكي وصلة
ومغطين عيوني بوصلة سودا
والدنيا ليل
كل شي مااشوف بالكوات أتنفس
ومااكدر أتحرك
الخوف مشنجني
-: يااابه طلعني والله مو انيييي
والله جبار يجذب عليكم
حرام عليكم ليش تقتلوني
عمي صرخ علية
وسكتني
عمامي كلهم وي أبوي محد راح ينقذني
وكفت السيارة
نزلوني كل شي مااشوف بس أسمع الأصوات
واميز اصوات عمامي من صوت أبوي
عمي وكعني بالكاع
ودفرني على بطني
دفرة خلاني انط من الوجع
اااه
يحجون بصوت ناصي
عمي الجبير عصبي ويصيح يلا فضوها
الجو بارد
ارجفف
بس فالينه لابسة ومن كد ماضربوني
تشككت شلون ماكان ساترة جسمي
وين راحت امي!
معقولة استسلمت
راح يقتلوني عمامي بدم بارد واني مامسوية شي
يقتلوني بس لأن ،،،
*********
صبا
مو ذنبي إذا امي شخصيتها ضعيفه
بس راح أكون مذنبه إذا صرت مثلها ونقلت هذا الضعف لبناتي بالمستقبل
صبا-: يوم حروح لبيت خالتي أقرأ
-: بس مو تتأخرين ابوج مايقبل
صبا-: اي راح اخذ القراءة
-: لا اخذي الجنطه كلها
أحسن مو كل شوي تتذكرين درس وتضلين رايحه جاية
صبا-: خوش
-: ولاتصيرين وكحه وتضوجين خالتج
صبا-: صار
طلعت من البيت اركض وشايلة جنطتي
وصلت لبيت خالتي دكيت الجرس
مرة مرتين
محد طلع
تالي دكيت الباب بقوة
طلعلي إيهاب عصبي
إيهاب-: علة كيفج شنو هادوده جاية
صبا-: امي دزتني حتى تقريني عندي دروس
تقريني لولا؟
إيهاب-: إذا خالتي دزتج طبعاً اقريج
بس مو تشلعين كلبي مثل البارحه ترا أيدي والعصا
صبا ': اف اي
سلمت على خالتي ام إيهاب
وبوستها
ام إيهاب-: شلونج يرويحتي جاوبتي اليوم
صبا-: اي صفكولي
أم إيهاب-: عفية بالسباعية
مسويتلج كيكه تخبل بالشوكولا مثل ماتحبيها
صبا-: اللله احبها
ام إيهاب-: بالثلاجه اخذيها واصعدي فوك حتى تقرين
وإذا تريدين اخذي فواكه هم
صبا-: خوش
إيهاب-: لعد شوكت تقرأ إذا هيج
تخلصها بس أكل
صبا-: أكل واقرأ
إيهاب-: نشوف تاليها وياج
ام إيهاب-: علة كيفك وياها
صعدنا فوك بالبلكونه
شفت أمير ومنير ذولي توأم إخوان إيهاب
أكبر مني بسنه وحده
بس ندرس بنفس المدرسة لأن مختلطه وأهلية
أبوي مايقبل أدرس بمدرسة مختلطه بس لأن إخوتي بيها
خلاني وياهم وماعندي أخوات بعمري
إيهاب بالمتوسطه
ومدرسته بصف مدرستنا بس ولد
وهو يقريني امي وابوي اميين
مايعرفون
إخوتي الولد كلهم يقرون عند مدرسين خصوصيين بفلوس
بس اني لا
بابا من ناحيتي بخيل
ومن امي كالتله إيهاب يقريهاا فرح حتى مايدفع فلوس ويخسر
يحب الولد ويكره البنات كلش
إيهاب قراني كل دروسي ومن خلصت بقيت العب وي أمير ومنير
لأن ماعندي صديقات
تأخر الوقت رجعت المغرب
بابا من شافني ضربني لأن تأخرت
بيبي فرحت كالتله حيل وياها الدايحه
وكامت تغلط وتفشر كالعادة
ههه عبالها راح ابجي
أصلا عادي قابل أول مرة يضربني بالسبحه على ظهري وتنكطع
ام صبا-: اني موكلتلج لاتتاخرين
صبا-:نسيت
بيبي ضلت تغلط على امي
تريدلها بس حجه حتى تغلط عالجناين وبالذات امي كلش تكرهها
بس تحب مرت عمي الجبير
لأن مثلها وتصير بت اختها
باليل امي سوت العشا واجوي عمامي ونسوانهم
عمامي كلهم شرانيين ومتخلفين
مايحبون الثقافه والتطور وكذلك أبوي عشقهم بالدنيا النسوان والذرية الي كلها ولد والفلوس
ثلاث عمام عندي
الأول عمي ابو جبار عنده أربع بنات وولد واحد إسمه جبار بعمري ويداوم وياي بالمدرسة
بناته متزوجات وكلهن ينكطن سم وشوفن امي الويل مناه لمن تزوجن
ويومية يذبن عليها تهمه
عمي ابو جبار متزوج بنت خالته عن حب وماتزوج عليها
رغم ماهي جابت بالبداية بنات
وبيبي عدها إذا واحد من ولدها مرته بكرها بنية كبل تزوجه
بس هاي لأن بنت أختها
امي شغل البيت كله عليها
بابا متزوج وحده قبل امي
عدها ثنين بنات
إخواتي أكبر مني بهواي
وحده متزوج وهذا زواجها الثاني
والثانية مطلقه
زوجه والدي الأولى جان عدها ولد أبنها الجبير بس صار وياه حادث ومات
وجابت وراه اثنين بنات
وبعد ماخلفت
وبيبي تكرهها ماتحبها
وسوست براس أبوي وخلته يتزوج امي
امي ماعدها إخوان بس أخت وحده أكبر منها ام إيهاب
جدي زوجها لابوي لأن جان مريض ويريد يأمن مستقبلها وزوجها شلون ماكان
وبعدها مات
جدتي ام امي ميته من زمان
امي جابتني وبعد ماصار عدها حمل
وبابا تزوج الثالثة
جابتله خمس ولد
اني اكبرهم كلهم بس مو بهواي تقريباً سنه
الكل انجمع على سفرة الأكل
جبار كعد بصفي
شكد أكرهه
حتى ماالعب وياه
احب ألعب بس وي أمير ومنير حبابين يحبوني
جبار يسوي أشياء عيب
ويكرص برجلي واني كاعده
أصلا ولااحب جمعتنا
لأن كلها نفاق وغيبة
عماتي ثلاثة نفس بيبي بالضبط
وتروح سنين وتجي سنين
ومايتغير شي بس كبرنا
ودخلنا مرحلة المراهقة
صرت صف ثالث متوسط وبعدني ادرس يم إيهاب
واخيرا طلعت من مدرسة الولد
لعبت نفسي من التحرش
وصارت شخصيتي صبيانية كلش
لأن من الصغر وي إخوتي ماعندي أخوات ولاصديقات
ومخلصتها العب وي الولد
وملابس محد يشتريلي البس تراكات مال ولد من إخوتي الابسهم لأن هم اسمن مني
ومن ملابسهم تصغر عليهم اني البسهن
بالمدرسة كنت أكثر بنية أتعرض للتحرش
وبالذات من جبار
على أساس إبني عمي والمفروض يحفظ عرضه
بس هو من طفولته سافل
كل الأخطاء يسويها ومحد يحاجيه أهله والكل مدللينه
وبيبي تموت عليه تكولي تروحيله فدوة وتندارين عليه
اكو تفرقة جبيرة بين الولد والبنات
جنت منبوذة كلش وعمامي وعماتي يكرهوني لأن لساني طويل ووكحه على عكس اخواتي الكبار فقيرات ولاعبين بمستقبلهن لعب
أبوي يزوجهن لناس أغنياء كبار بالعمر ويرجع يطلكهن علمود الفلوس
وامهن ماتكدر تسوي شي
ام صبا-: اطلعي سلمي على عماتج اجن مو تسوين مشاكل مثل كل مرة
صبا-: مااطلع
ام صبا-: اطلعي لاتسوينا طلابة نسوان عمج هم اجن ويسالن عليج
صبا-: ماميتات على سلامي بس يريدن يسمعني حجي مسموم
يمه فدوة اروحلج عوفيني بهمي
ام صبا-: وإذا رسبتي على أساس محد راسبة من بناتهن شو مدرسين خصوصين وكل شي ويلزكن بنفس الصف
صبا-: حتى لو ترا جايات يتشمتن بيا
اني حظي هذا مدري شبيه خلاهن يشدن وياي
وقرن براس أبوي لحد مامنعني من بيت خالتي
منو يقريني غير إيهاب بس عليه افتهم وموبايل ماعندي من كل شي حارميني
ضليت ابجي بحركه
لأن رسبت بالرياضيات والجغرافية
الشهر الأول
ام صبا-: لاتبجين
صبا-: ليش منعني أروح
ام صبا-: والله حجيت وياه كالي كبرت وهم ماعدهم بنات بس ثلاثة شباب وعيب من حجي الناس بنت شكبرها أربعه وعشرين ساعه يمهم
وتعرفين ابوج يشك
صبا-: كله من بيبي بس عاندتها وكلتلها راح أكمل دراستي غصباً عن اليرضى والمايرضى هي كالتلي بسيطه اني اعلمج ثاني يوم أبوي كتلني كالي اكسر رجليج إذا تروحين بعد لبيت خالتج
وبس تسقطين ابطلج وهسة اليوم راح علية وماداومت
المن بطلني حتى اكرب للجناين
اصير خدامه
بقيت أسبوع مااداوم ومخلصتهابس ابجي اني احب الدراسة بس أنسى
ومااعرف أقرأ إلا إيهاب يفهمني
كلش مطفية بالدراسة بس عندي طموح
أسبوع انشلع كلبي
اتوسل بابوي وهو مايقبل أرجع للمدرسة
اي خطار يجينا مااطلع حابسة نفسي بغرفتي
عماتي كل ساعه يجن يذبن سمهن ويروحن
نسوان عمي كل وحده بيتها
بس يجن بيهن سولة وهم يتشمتن وخلصت أسبوع بس اتعارك وياهن
مكافش من الروس
عمامي كالو همزين بطلت قبل لاتجيبلنا العار
كلها فرحانه لأن بطلت
امي تكول أحسن تبقين يمي وماابقى خايفه عليج
اني صرت نار دخلت لغرفتي أرتاح
حتى عشا ماتعشيت
كلها متفقة علية
ورى شوي اجت امي
صبا-: شتريدون مني أريد أنام
جنت مطفية الضوى ومتغطية بالبطانية وابجي
كلش مقهورة جنت
انفتح الباب عبالي امي
شغلت الضوى
صبا-" يمه شتريدين مااطلع اسلم على أكبر واحد عوفوني بحالي الخاطر الله والله متت منكم
انجرت البطانية
من رفعت راسي شفت،،،
...يتبع
