#البارت الثالث
#زهراء_محمد_السراي
#توأمي الملعون
*********
...مقهى وأنت مع الجريدة جالسٌ
الا لست وحدك
نصف كأسك فارغ والشمس تملأ نصفها
الثاني
ومن خلف زجاجي ترى المشاة المسرعين
ولاترى إحدى صفات الغيب ترى
ترى ولكن لا تُرى
كم أنت حر أيها المنسي في المقهى
فلا أحد يرى أثر الفراشة فيك
لا أحد يحملق في ثيابك ... محمود درويش
.........
صبا
... قوتي هي عنواني
لن أستسلم ولن امشي على خطى من هو ناكر لي
...
طلعت من غرفتي الوقت متأخر
وكلها نايمه
عمامي وابوي باليل يطلعون برا يسهرون لله أعلم وين
وامي تهلك من التعب وتنام من الساعه ثمانية
وسمعت شخير جدتي
طفرت طفرة جان وكف كلبي
البيت الي عايشة بيه بس اني وامي وابوي وبيبي والباقين كلمن بيته وحده
حتى ضراير امي
أبوي يومية عد وحده بس امي بالسنه حسنه يجيها مايحبها ويحجي عليها لأن هاملة نفسها
صعدت الدرج وميته من الخوف
هسة اني شعندي صاعده
بس طبعي فضولية كلش مااتحمل الا أعرف
فتحت باب البلكونه
ومااحس الا ايد انحطت على حلكي والايد الثانية حاوطتني من بطني
منير-: اشش لتخافين اني منير
يشهد الله ردت أموت بوقتها من الخوف
حتى من وخر أيده وشفته بقيت خايفه منه
منير-: آسف لأن خوفتج
كلبي صار طبول هندية تتراكع
صبا-: اوففف لك كلبي جان وكف
شعندك فوك هنا شلون صعدت ليش موببيتكم
بقى ساكت
صبا-: صاير شي!؟
منير-: صبا ميخالف بعدين اكولج كل شي هسة جوعان حتى لو لفة وكلاص جاي
صبا-: تدلل بس توعدني تكولي شجابك هنا واصلا كعدتك مو قانونية ليش مادكيت الباب واجيت يمنا كعدت بالاستقباال
هم باوعلي وسكت
ماردت احرجه الظاهر صاير وياه شي مايريد أحد يعرفه
جبتله لفه مال كص وكلاص جاي معروف منير يحب الجاي واخوته يحبون القهوة بكل شي مختلف عنهم
حاولت مااطلع صوت حتى محد يكعد
صبا-: هاك تفضل بعد محتاج شي
منير-: لا شكرا
صبا-: يعني أريد اسألك هواي أسئلة بس اكل بالبداية
لأن بصراحه ميصير تبقى فوك السطح
اكل اللفة وحسيته ماشبع شكد غبية اني ولد شكبره شكده عشاه لفه لو جايبتله لفتين خطيه
صبا-: اجيبلك بعد
منير-: لا شكراً
صبا-: أوك
منير-: صبا
صبا-: ها
منير-: ضربت أمير بدون ماانتبه
صبا-: شلون ضربته بس على كلبه ضربه قوية؟
منير-: رجعت للبيت بليل وأول مادخلت إيهاب تعارك وياي وتجاوز علية راد يضربني دفعته واجه أمير
يحجي وياي ضربته على كلبه ضربة مفاجئة خارج عن سيطرتي عبالي إيهاب
صبا-: وش صار
منير-: تخربط واخذوه للمستشفى وابوي طردني من البيت
ردت أروح لبيت عمي بس ماعندي كروة
صبا-: وهسة شراح تسوي شي أكيد خالة هسة بالها يمك اني اكول ترجع للبيت أحسن
منير-" أبوي طردني شلون ارجع
صبا-" عادي أعتذر منه وان شاء الله أمير مابيه شي هو كل مرة يتخربط
ولاتنسى يجوز مو من ضربتك تخربط احتمال ماتحمل التوتر والضغوط مال المشاكل ومن تعاركت أنت وايهاب هو تخربط لهذا السبب
منير-" ما ادري
باوعلي ودنك راسه
انتبهت لنفسي لابسة فالينه وزنودي طالعه
الحجاب المن لابسته بعد!
استحيت منه
هاي لو جبار جان اكلني بعيونه
نزلت لبست بوليرة طويلة
وردانها طوال
سترتني
حرت شنو أسوي
هذا منير راح يبقى فوك بالبلكونه
أخاف يجي أحد ويشوفه
صبا-: جبتلك بطانية تغطى بيها
لو تجي تنام بالاستقبال
بس بالاول دك الباب أحسن
منير-: أخاف اسببلكم إزعاج
صبا-: لا بالعكس
دك الباب وكعدت امي
وسولفلها كل شي
نام بالاستقبال
سويتله عشا من جديد صينية مرتبة
وفرشتله فراش
تعشى ونام
سدينا عليه الباب
امي صاحتلي
ام صبا-: تعاي ولج هاي يمكن خالتج داكه علية واني ما ادري نايمه وماسامعته
امي عدها موبايل قديم بس يتصل
لايكنك ولا شي وكل شي ماتعرفله اني اخابرلها ومن يدك عليها أحد اني أرد
شكد علمتها بس هي ماتتعلم وتنسى
اني ماعندي موبايل
أبوي مايقبل
خابرنا خالتي وطمناها على ابنها اجه أبوي وكلناله
همزين ماكال شي
بس ماافتهمنا من خالتي شي لأن جانت يم الدكتور وهوسة يمها
حتى ماسألناهه على أمير
عدى اليوم على خير
الصبح كعدت بطني تأذيني
تجاهلت لبست صدريتي
كصرانه علية
رحت اليوم ضايجه
صبا-: يوم يعني شلون ماجاي تشوفين الصدرية شلون صغرانه
ماناوية تكولين لبابا حتى كمت استحي أروح للمدرسة صدريتي صارت قديمه وملحه لونها راح ثلث سنوات اني اغسلها وأرجع ثاني يوم البسها
اي مو راح تتشكك علية
ام صبا-: شسويلج جا
ابوج مصرف الي مايطيني انوب ينطيج
صبا-: حاجيه كوليله بنتك كبرت
يمه اني حسرة علية اللبسة كل شي ماعندي روحي شوفي كنتوري كله تراكات ولد حتى استحي والله
أحس نفسي ولد موبنية
أبوي شنو ناقصه
السوك كله اله ولعمامي
كلهم كصاصيب
أبوي فوك ماهو كصاب عنده مجموعه محلات لكل شي واخواني وشرايكج يلعبن بالخير والفلوس وإحنا ضالين هنا
الخدامه وبتها
لج يمه اصحي الخاطر الله مو و الله
العظيم روحي لعبت من حياتي
وحياتج
أربعه وعشرين ساعه تشتغلين ببيوتهن ذني الخايسات الجايفات
هاملتني وهاملة روحج
شوفي هنة شنو يلبسن
عماتي ونسوان عمي مجلجلات بالذهب
واني ترجية ذهب ما باذاني من اختلقت
والله بس لأنه بنية
وبس لأني بنتج
مرت عمي الجبير شو ذني بناتها مدللات وكلهم حايرين شنو يسوولهن
ليش بس اني نابذيني
إلى متى تبقين هيج
عيوني دمعت بس ماخليت امي تشوف دموعي
هي بقت ساكته ومقهورة
تعرف كل كلامي صحيح بس مستسلمه.
والظاهر عاجبتها الخدمه
رحت للمدرسة وحدي
عناد ادري محد يقبل
بس عاندت وخلي شيصير يصير
رحت مشي
وكل ولد يفوت مني يشمرله حجاية
أخير واحد نفسه الي انطاني رقمه بأيدي
واتعارك وياه إيهاب
-" هذا جسمج لو شكر
الشفايف اوف يالشفايف كرز
داوكفي شبيج
خلنحجي
تجاهلت بس بداخلي بركان
مااعرف شوكت انفجر
أمشي بطريقي متجاهلته بس هو ماعافني بقى يلاحكني
ويحجي يريدني احجي وياه
وتالي وكف بطريقي
مخلاني امشي
-: بس اسمعيني اني قبل فترة اجيت خطار هنا بهاي منطقتكم بيت خالي جيرانكم يصيرون
وشفتج كلش انعجبت بيج
انطيني فرصه
خلينا نتعرف على بعض
صبا-: اللهم يصبرج ياروحي
على هاي الشكول الزفرة من الصبح مدري منين يطلعولي ذولي القرود
هو اني ناقصه
كلش كافي علية البغولة الي بالبيت
من خرب عيشتي اي والله
توخر مني لا الم عليك أمه لا اله إلا الله
وافضحك وافضح روحي
وللجهنم شنو مايصير
-: اي وصرخي عادي
صبا-: لك أنت صدك ماتستحي على نفسك يا أدب سز
بلا تربية
أخلاق جايفه أهلك ماعلموك
عيب تتحارش ببنات العالم
لو عادي عدهم.
هسة تقبلها على أخواتك
-: كمتي تتجاوزين واني ساكت ماحجيت شي
وبمزاجي وصدكيني لو وحده غيرج
الا
صبا-: اي بلة الا شنو
شوف لك لا انت ولا الأكبر منك يخوفني لو بيك خير مالاحكتني
ونزلت كرامتك
بس أنت منيلك كرامه
تعرف شنو كرامه
هه ولله يا الله
-: بعدج ماتعرفيني لاتخليني احطج بعقلي
واقفل عليج
والله تتمنين الموت وتتحسرين عليه.
صبا-: ماداعي اعرفك
هه واحد هتلي سرسري
حياتك بس تلاحك بنات العالم
عفتها وردت أروح لزم أيدي بالشارع صار عصبي
صبا-: هاي صارت ثاني مرة
وقسماً بعظمه الله إذا مديت ايدك علية الا اكسرها الك
دفعته ورحت
بس من العصبية ارجف
الناس كلها تباوع علينا
امشي وادعي عليه
الله لايوفقك
منين طلعلي هذا ماجان ناقصني غيره
بطني كامت توجعني كلش
وأسفل ظهري
يجوز من العصبية
خلصت الدروس
وبأخير درس اجتنا مدرسة الأسرية
جانت تجينا بالأول والثاني متوسط
بس من صرنا بالثالث
بعد مااجتنا لأن بكلوريا
جانت تعلمنا عالنظافه الشخصية
والترتيب
امي كل شي ماعلمتني
ولا افتهم اي شي بسوالف البنات
كل الي أعرفه لازم يومية أسبح واغير ملابسي
من وصلت بهاي المرحلة سمعت البنات يحجون بالدورة الشهرية
حسيتها شي غريب مااعرفه
وعبالي بس البنية الموزينه تصير عدها
للعلم مااعرفها شنو لأن ماجايتني
أعرف بس الإسم
اكعد يم البنات اسمعهم يحجون بيها
ومن كل عقلي عبالي بس المتزوجه لازم عدها هذا الشي المجهول والغريب
واي بنية أسمعها تحجي بالدورة اخلي عليها علامه اكس
وأخاف منها
ومااصاحب أي بنية
لأن أخاف تعديني هاي الدورة
وابوي يقتلني لأن عيب. بس المتزوجه تصير بيها
صار عندي فضول أعرف هي شنو
حتى لو عيب بس لازم أعرف
بالاحياء انطوها النا بس مافهمت ومحد شرح
مجرد درس درخته وبس
صرت اكعد قريب من تجمعات البنات
واسمعهن يحجن أشكال وألوان
ومرة سمعت كالن العادة السرية
وشوي تعمقن بالحجي
اني لعبت نفسي وخفت
ومن دمجت الأفكار
عبالي هي هاي الدورة الشهرية
كلش خفت بوقتها
ومااحجي وي اي بنية
خلص الدوام طلعت شفت أبوي بالباب مالت المدرسة
من شافني عصبي مبين من عيونه
يارب سترك
معقولة الولد راحله وكاله بنتك تجاوزت علية لو واحد من الي شافوني
... لا يأتي الحب بالاجبار
متوهم الرجل إذا تعامل بقسوة مع المرأة بحجه أنه يحبها
لن تحبك ياعزيزي
المرأة تحب الرقة والتعامل بلطف
نحن إناث مهما بلغت قسوتنا
لن ننجذب لقساوة رجل وعنفه
نحن إناث وهذه الكلمه كافية لفهمك...
...يتبع
سؤال البارت/// شنو تتوقعون دور هذا الولد !؟
لاتنسون التصويت إذا عجبتكم القصة أو البارت ❤❤❤
