...
البارت الخامس
# زهراء_محمد_السراي
*********
أطياف
أول ماسجلت بالمدرسة أروح كاشخه مرتبه يوميه شعري احطله قراصه جديده وطباقات اتباهى كدام البنات رندة تسويني فلة إني ورودينا بس كسولة ومااهتم لدروسي وهاملتها ورودينا نفسي بس تبجي صف ثاني ابتدائي تركت المدرسة لأن أهلي يخافون عليها والأوضاع هم جانت ماتسمح اني قوية بسرعه تأقلمت بالمدرسة أشتري والعب بس رودينا تبجي وخابصه الدنيا اشتريلها مايفيد تخاف تكول المعلمه تضربني وكل يوم غايبة وبالكوات تكعد الصبح للدوام بالأول الابتدائي بالدفرات نجحنا لأن محد يعلمنا ولا احنا نحب ندرس وبالثاني رودينا تركت المدرسة بقيت اداوم وحدي نفس المستوى كل درجاتي متدنية الأحرف مااعرفهن ولا الأرقام وصلت صف خامس ابتدائي واني مااعرف لا أقرأ ولا أكتب بعد مابيها مجال رسبت بالخامس وعدت السنه وبالكوة استوعبت شلون اتهجأ وكمت اشارك يعني شوي صرت شاطرة واعتمدت على نفسي مروة أختي جانت شاطرة من زمان امي بطلتها من المدرسة علمود تساعدها بالشغل ومن هي صغيرة ربت إخوتي كلهم صارت هي امهم واخوي قيصرصف ثاني متوسط وترك هم بسبب الضروف وريما من الثاني ابتدائي وهي من وحدها كامت متدوام لأن ماتحب المدرسة ويومية مسوية مشكلة وي المعلمات لأن لسانها طويل ومتبري منها أهلي مخلينها براحتها كل شي تسوي محد يحاسبها تلعب بايسكل وتتعارك وي ولد المنطقه اي شخص مايعجبها ويغثها بحجاية تندمه على زمانه جنت أخاف منها فارضه نفسها وشخصيتها قوية ومن تحط شي ببالها ماتتخلى عنه ريما أقوى وحده بيننا حتى رندة فقيرة ومو مثله شخصيتها لطيفه وحساسة جان حلمها تكمل دراسه شاطرة وذكية عدها طموح بس امي كسرت ظهرها أول ماجابت رودينا كالتلها اكعدي من المدرسة ختولي متفيدج وأختي ربت رودينا من أول يوم إلها بالدنيا
*********
رودينا
من تركت المدرسة ارتاحيت بس ألعب اني وأطياف وعلياء وبذاك الوقت المدارس قفلوها لأن يخافون عالطلاب خاف يصير انقلاب وكالعادة الظهر سبحتني رندة ورحت لبيت جدي علمود ألعب وي أطياف ونروح لعلياء
رودينا- يلا أطياف نروح
أطياف- مااروح
من كالتلي مااروح اني ضجت لحيت عليها حاولت اقنعها ماقبلت تجرأت لأول مرة أروح وحدي محد يقبل رندة كالتلي لا تعوفين أطياف ابقن سوى دير بالجن تجاهلت كل الكلام والتوصيات رحت لعلياء طلعنا سوى وجان أكو شرطه وناس تفتر علياء خافت إني هم خفت ماكدرنا نرجع للبيت
علياء- نرجع للبيت؟
رودينا- ولج بعيد مانكدر نرجع خلنفتر ويروحون الشرطه وبعدين نروح لأهلنا
علياء- أخاف
رودينا- حتى اني
*********
رندة
مواصفاتي حنطاوية وجهي عريض عندي شامه بخدي وبطرف شفتي رشيقه مو كلش سمينه من عمري ٧ سنوات امي منعتني من المدرسة ومن الطلعه كالتلي انتي بنتي الكبيرة وميصير تلعبين ومن ذاك عمري كمت مااطلع بالشارع وحتى من يجن صديقاتي علمود نلعب امي تطردهن انحرمت من طفولتي كبرت وتعلمت اخبز واعجن واطبخ اكثر من مرة احتركت لو بالتنور لو بالمي الحار كل شغل البيت تعلمته بصغري وامي علمتني شلون اربي إخوتي واغسلهم وجنت اسهر الليل كله لأن رودينا جانت ترضع وماتقبل بالممه إلا امي بس امي ماتقبل ترضعها تخاف على جسمها ومتحب تكعد باليل اسويلها ممه وكل شي بس علمود تسكت وحمودي مريض كلش وكل شي جواه باليل ٣ مرات اغسله وهم يبجي ويصيح أبقى للصبح سهرانه اغفي ومااشبع نوم ومن اكعد الصبح اضل اركض أغسل لاخوتي واسبحهم اسويلهم ريوك كلهم يسمعون الكلام بس ريما تشلع كلبي ومرات تتجاوز وتغلط محد يحاجيها بس هي تحبني كبروا إخوتي تعودت على وضعي
مؤيد- اختج وين تأخرت
رندة- يابة الظهر راحت لبيت جدي تلعب وي أطياف
مؤيد- ولج ماكو مساعه شفتها أطياف بالباب وحدها تلعب
رندة- لعد وين راحت
أبوي صار عصبي على امي وعلينا شلون تطلع من البيت وإحنا ماندري بيها
مؤيد- وين راحت رودينا الدنيا مكلوبة شرطه وخطف وقتل وينها
اباوع على بابا وجهه صار أحمر طلع من البيت امي لبست عبايتها وتدك وتلطم وتصيح يمه بنتي وين راحت طلعوا يدورون عليها اني كمت ارجف من الخوف لأن أسمع شكد خاطفين جهال وشلون يذبحونهم كلهم بعمر رودينا وإحنا منطقتنا خطرة مو امان
ريما- شكو شصاير خبصتونا شبيج تبجين
رندة- ولج رودينا ضاعت
ريما- هسة أروح ادور عليها
رندة- وين تروحين دنيا ليل أبوي مايقبل استري علينا يمعودة معايزين مصيبة
ريما- معليج
صعدت بالدراجه وما يهمها أكبر واحد
رندة " ولج ريما لاتنكلب بيج الدراجه
طنشتني وراحت ولا تعترف بأي شخص الي براسها تسويه يعني تسويه
اني بقيت وحدي كلها تدور على رودينا حمودي يبجي اني خايفه اجاني خالي سرمد
رندة- ها خالو لكيتوها
سرمد"" لا والله خالو رندة لا تطلعين انتي ولا تخافين هسة نلكاها قابل وين تروح
ضليت ابجي على رودينا لأن اني من الصغر مربيتها
ومتعلقه بية أكثر من ماتتعلق بأمي
إذا اصبعها ينجرح ابجي أكثر منها
صرت أم لرودينا وحمودي من صغري
خالي سرمد كلش انقهر من شافني ابجي مقهورة
كلش كلبه طيب وحباب
ويصير توأم خالي صابر
بالشكل كلش متشابهين
لدرجه مرات مااعرف أميز بيناتهم
لأن نفس الطول والضخامه ونفس ديرة الوجه
خالي صابر أحلى من خالي سرمد
لأن شخصيته مرتبة
وعنده كاريزما
ثكيل كلش
أنيق دايماً يلبس لبس كشخه حتى لو ماعنده طلعه لمكان أو مناسبة
بحيث يبين كأنما كاتب أو يشتغل بمجال حلو
من كد الرقي الي هو مبين عليه
اما خالي سرمد
مخربط بكل شي
وشخصيته مختلفه جذرياً عن خالي صابر
تصرفاتهم مو نفس تصرفات بعض
من صغري عرفت خالي صابر هو الأحسن بكل شي من إخوته كلهم
وههه بالذات من خالي سرمد
صابر عليه الإعتماد لأن يعرف يقنع المقابل ويعرف يتصرف
بالمواقف الصعبة
رجال معدل على كولة بيبي
خالي سرمد من اجاني
أول مافتحت الباب وشفت وجهه عبالي خالي صابر
بس من لبسه عرفته خالي سرمد
لأن لابس برمودا وجواريب مال طوبة
وحذاء
وانوب شماغ
هههه
واني بحالتي الكسيفه وكاعده ابجي وحالتي حالة
بس من شفته ضحكت
بهالصيف والحر كاتلنه
وهو لابس هيج يريد يلعب طوبة
محد معتمد عليه بشي
لأن بسيط كلش وفقير بنفس الوقت
بالمشاكل هو مايتدخل خوالي الباقين هم يحلونها
هو يكتفي بالصمت
حتى مايفكر يتزوج أو يكوّن عائلة
ماعنده هدف
خوالي كلهم عدهم شغلهم ثابت واشوفهم كلمن حاير بمستقبله
إلا هو أبد مايفكر
اكو شغل يشتغل
ماكو شغل يكعد ويسكت
ولو بيبي تنطيه فلوس لو خوالي يصرفون عليه
ومرات خالاتي هم ينطنه
وحتى امي
مامهتم لأي شي
يريد بس تمر الأيام شلون ماكان
على عكس البقية كلها متزوجه وكلها تريد الإستقرار بالشغل
ماعداه!
الكل قلقان واني مخليني وحدي بالبيت
والدنيا ليل
خالي سرمد راح وكالي لا تخافين هسة يلكوها
من إخوتي محد بقى عالبيت
لؤي وقيصر طلعوا يدورون عليها
سويت عشا
أبوي يشتغل بالمشاوي
ودايماً يجيبلنا
ثلاجتنا مليانه لحوم
لأن رودينا كلش تحب اللحم
خليت الجدر عالنار
وحمودي بس يصرخ
حرت شسويله
حتى أصابعي احتركت من نار الطباخ
من كد ماتوترت
شلت حمودي وحطيته بحضني
سويتله ممية حليب
شربها كلها
ونام
يمكن لأن جوعان
كام يبجي
نظفت البيت وايديا كامن يوجعني
من كد ماخايفه على رودينا
حاولت اشغل نفسي بأي شي
تالي طلعت بالباب وابجي
كلت بلكي يجي أحد بخبر
...يتبع
سؤال البارت// رودينا تضيع!؟
لو يلكونا
# البارت الخامس
#شارع حيفا
