#البارت السادس
#زهراء_محمد_السراي
#توأمي الملعون
*********
إيهاب
تتغير مشاعر الإنسان من عمر لعمر
وحب المراهقه يختفي وتضحك عليه
رجعت للبيت أول مادخلت لكيت عمي ابو هاجر وزوجته سلمت عليهم ورحت أسبح
تعبان ومنايم كلت ورى مااسبح أنام
لكيت هاجر بغرفتي
هاجر-: هلو اهاوي شلونك
إيهاب-: اهاوي؟
هاجر-: هههه متعودة ادلعك بهذا الإسم من الصغر شنو نسيت شنو جان الكل يدلعونك
إيهاب-: المهم اني بخير وانتي
هاجر-: منيحه
إيهاب-: شنو لهجتج مضروبة
هاجر-: هههه من كد مانسافر ومن كد اللغات الي ادرسها
إيهاب-: هه تباهي بطريقه جديدة
هاجر-:شخبارك بصراحه اشتاقيتلك ماتبين مختفي
إيهاب-: مشغول بدراستي
هاجر-: شيصير عليك حتى ماتتصل بية وادزلك رسايل متجاوبني
إيهاب-: كولتلج مشغول والله
هاجر-: بس تشوف الرسالة ومتجاوب ليش!؟
إيهاب-: راح تبقين تحققين وياي
هاجر-: لا بس كلش تغيرت بأخير سنوات مو إيهاب الي أعرفه انت مو كلتلي مرة احبج وبس وياج راحتي
إيهاب-؛ هاجر كلش تعبان ممكن نحجي بهذا الموضوع بعدين رجاءاً
هاجر-: أوك آسفه إذا ازعجتك
طلعت بس زعلانه مبينه
قصتي وي هاجر بدأت من عمر المراهقه أو من الطفولة
من صغرنا جانوا يحجون بالشقى ويكولون هاجر لايهاب
اني وهي صغار وصار بيناتنا تجاذب وصارت بيناتنا إتصالات
بالبداية عادي مجرد إعجاب السوالف بيناتنا على كد السلام ونسولف سوالف عادية بس ثنينا معجبين ببعض
واني جنت معجب بيها لأن مثقفة وحنونه كلش ارتاح من اسولف وياها هي أكبر مني واطول هم
جنت صغير ومراهق ماهمتني هاي الأمور
مشيت ورى عاطفتي واحساسي
وكان مجرد إعجاب إحساس ناتج من المراهقه ومن شده هذا الإحساس عبالي حب
وتأثرت بالأفلام وقصص الحب وكنت بعالم ثاني اعترفتلها بكلام جبير كلش للأسف
وطلع كلامي مامتأكد منه ومااله اي صحه
من كبرت أختفى بسرعه ماطولت علاقتنا كم شهر
مليت
ولاحظت الفرق بيننا وخصوصاً بالشكل
مو كل شي بقصص الحب حقيقة
وسالفة إنه الجمال مومهم حسب تفكيري خاطئة
الشكل مهم
ماكو رجال يحب بنت موحلوة أو هو أحلى منها واوسم
وهذا الشي اكتشفته من خلال الكتب الاجنبية الي قريتها
ومن خلال تجربتي وي هاجر
هذه الحقيقة ولازم هاجر إذا كلتلها ماتتأثر وتعتبر الموضوع عادي
نمت
على صوت امي كعدت
ام إيهاب-: اكعد إيهاب شنو ماتتغدا
إيهاب-: تعبان هسة أريد أكمل نومتي
ام إيهاب-: لك ماما اكعد ابوك وعمك كل شوي يسألوني عليك يلا حبيبي كوم
إيهاب-: صار
كعدنا عالسفرة وعمي وبابا حجيهم كله عني شوكت ناوي أتزوج
عمي يلمحلي شوكت أقرر اخطب بنته هاجر
وهاجر عاجبها الوضع
كلش منزعج من هيج حالة
*********
صبا
عرفت من خلال امي السبب إلي خلى أبوي يضرب أختي بهالوحشية
بس لأن حماها متحرش بيها وزوجها بالواجب ومن شاكية لعيالها طارديها من البيت وطاعنينها بشرفها متهميها هي إلي محاولة تغري حماها
عيالها جابوها بعد ماعمتها مشبعتها كتل
وابوي هم استلمها لأن ماعنده ثقة بأي وحده من بناته
أختي تحلف هي مامسوية شي وهو حماها من زمان يتحرش بيها وخايفه تكول ومحد يصدكها
رجلها باليل اجانا أعتذر عن كل شي صار لأن يعرف أخوه يكبسل وأهله ناس باطلين يحب أختي كلش
وكال راح نعزل ببيت وحدنا
وزوج أختي شايف كل التسجيلات مال بيتهم والي تثبت إنه أخوه هو الي تحرش باختي وأكثر من مرة لأن الحمد لله كل شي صار كدام الكاميرا بالحديقه الامامية
والكاميرا كدرت تصوّر كل شي
أبوي كان ظنه إنه أختي هي الي حاطه عينها على حماها لأن ماعنده ثقة بأي وحده من عدنا
جنت واكفه بباب الإستقبال اتصنت امي تكولي وخري لايشوفج ابوج ويكتلج
بس اني كان عندي فضول
من سمعت كل شي
رحت لأختي ركض
صبا-: ولج اجه رجلج جاي يحجي وي ابوي ويريدج
أختي نايمه بفراشها تون من الوجع
مرت أبوي يمها تبجي
صبا-: خالة شبيها سعاد
اجت امي وراي كالتلي اطلعي
كلش انقهرت من شفتها تتوجع
حليمه( ام صبا) -: اكلج خية لازم ناخذها للمستشفى
خاف الفرخ مات ببطنها وانوب رجلها اجه ويريد يأخذها
-: ما ادري البت تنزف من البارحه وتون من الوجع
صبا-: يمه سعاد حامل!؟
حليمه-: امشي ولي عيب
صبا-: كل شي عيب شنييي
طردتني من الغرفه
بيبي لاكتني تمشي على عوجيتها
الجده-؛ سعاد وين؟
صبا-: بغرفتها تون من الوجع
الجده-: مابيها شي تتعاير
صبا-: حامل شنو مابيها شي مبينه متأذية وبلة الطفل مات شنو رجلها يسكت عبالكم ومن غير كل شي لو يدري أبوي ضاربها ببوري والله يكلب الدنيا على راسنا هذا ضابط مولعبه
ضربتني على رجلية وراحت لسعاد
رحت وراها اريد أعرف شنو راح تسوي
دخلت للغرفه طردتني امي
بس سمعت بيبي تكول جيبولي مي دافي
بيبي كل عماتي ونسوان عمي هي تجيبهن بدون اي حاجه لروحتنا للمستشفى
ومرات حتى جيرانا هي تجيبهن وبمهارة كل الناس تحجي بخبرتها يسموها جده مدري جلدة
واي وحده حامل أو تريد تحبل هي تساعدها
وإذا الحنين مهدد بالاسقاط هي تثبته ومااعرف شلون
بيبي مرة جبيرة كلش عمرها ٨٩سنة ومارة بكل الأجيال تعرف كل جبيرة وصغيرة من خيرها وشرها
بس ماتعرف تقرا وتكتب
ورى شوي سمعت سعاد تصرخ
صارت عندي رغبة قوية وفضول قاتل اريد أشوف بيبي شتسوي بس امي وكفتلي مثل الشوكه ببلعومي ماخلتني افوت للغرفه
مدري شكد مر وقت طلعت بيبي وكالت لام سعاد
-: خليها ترتاح المسعده وماتروح وي رجلها اليوم نكوله تريد ترتاح من يشتري بيت الها وحدها عود ياخذها وتتطلع وياه عساها روحه بلا ردة
كون طمرة من هاي الطمرات الي تطمرج وتطمر بناتج
شكد انطمرت ناس
ماعايزين مشاكل عود كولي لبنتج موتكول لرجلها أبوي ضربني
وهم عوزها تكول حتى اكص لسانها بجلابتين وماارحمها
دخلت للغرفه سعاد نايمه
وبيبي تمشي وتدردم
امي تحب ام سعاد
حليمه-: خية لاتبجين كطعتي كلبي ميخالف اصبري وهاي عمتي متعودين على دعاويها شنسوي الله كريم وبنيتج مابيها غير العافية ان شاء الله ورجلها خوش رجال وادمي شفتي شكال ببيت وحدها
-: ان شاء الله
حليمه-: ديري بالج عليها ولاتنسين الله ماينسى عبده
-: لله لايشوفج شر ببنتج كولي آمين
حليمه-: آمين يارب العالمين
خالتي ام سعاد حبابة وتحبني وتحب امي ماعدها حقد بكلبها هم شايفه الضيم من ابوي وعمامي وبيبي ورغم كل شي ساكته على مود بناتها
وأهلها نفس طينه أهلي من جابت بنات كرهوها أكثر من عيالها
لهاي الدرجه التخلف وأكثر بعد
مر اليوم نفس مرارة كل يوم
كله غلط وفشاير ودعاوي من بيبي علية وعلى امي
مااعرف شنو الحلو بالغلط
شنو راح تستفاد بيبي من تغلط وتزرع الحقد بكلب الناس عليها وهي بهاي العمر شنو الفائدة من شرها بشنو راح يفيدها
،،،
الصبح
رحت للمدرسة مرادأخوي وصلني
ونفس الولد الي تحرش بية وانطاني رقمه شفته بسيارة
شافني وغمزلي
لا وفوكاها وياه أهله هالمرة
داومت دوام عادي
من حلينا للبيوت شفت أمير بس منير مو وياه
صبا-: هلو
أمير-: هلو صبا
صبا-: لعد منير وين !؟ شنو مامداوم اليوم
أمير-: ها
أمير ارتبك وتوتر ماعرف شيكول
أمير -: إذا كلتلج ماراح تكولين لأحد وبالذات لأمي
صبا-: كول شصاير
أمير-: بصراحه م
اجه منير فجأه يركض وفحطان
منير-: ها اموري خوما تأخرت عليك
أمير-: خلينا نروح ماما راح تقلق علينا
صبا-: وصلوني وياكم مراد مااجاني
منير-: يلا
وصلت للبيت لكيت خالتي كالتلي لبسي وتعاي اريدج
امي كالتلي ابوج يدري بس لاتتاخرين
رحت وي خالتي جاي خطيب طيبة واهله كلهم
ابو إيهاب عازمهم حتى يتعرف عليهم لأن من انخطبت طيبة هو ماحاظر الخطوبة لضروف
خالتي ماتلحك تشتغل وحدها رحت وياها اساعدها
بنات ابو هاجر ماجاسن اي شي وعود الخطار الي جاي عيال طيبة
يستنكفن من الشغل ومايعرفن أصلاً
لأن عدهم خدامه
ودايماً يكولن لخالتي جيبي خدامه وفضي الموضوع علويش تتعبين نفسج بشغل البيت
بس خالتي متقبل
دخلت وياها للمطبخ محضرة أربع دجاجاتت
وسمجتين
هاجر من شافتني أنظف بالسمج انصدمت
مريم تلعب نفسها من السمج من شافتني طلعت
طيبة كالوا كاعده يم رياض خطيبها
صبا-: اكولج خالة منو جاي وياهم
ام إيهاب-: هو رياض وأخوه الأصغر منه وامه وأبوه
صبا-: هاي أول مرة تشوفوهم
ام إيهاب-: اي بس يكولون كرايبهم هنا جيراننا نعرفهم
قبل فترة جاي أخو رياض هنا بس ماعارفينه
وعلى أساس إيهاب شايفه
صبا-: صار عندي فضول شو
اجت هاجر وكفت يمنا شكد سولفت علينا
وتمدح بعيال طيبة وبفلوسهم
وشرحتلنا بالألف مرة شكد هم ناس أغنياء ومعروفين و و
انثولت من سوالف هاجر انوب تحجي بعلو صوتها وباذاني ردت بس اطلع من المطبخ
صبا-: خالة راح أطلع اشوي السمج ورى البيت
ام إيهاب-: البسي شالج
هاجر-: وحدج تشوين؟ متخافين تحتركين!
صبا-: لا
هاجر ': لعدد أروح وياج حبابة والله ضوجه
هو اني شردت منج
شلون حظ
طلعنا وسمعت طيبة تضحك
تكول لا محمد عفية والله أيدي توجعني
...يتبع
لاتنسون التصويت إذا عجبتكم القصة أو البارت ❤❤❤
